Wuradźowanja dale live
Inwentura w kniharni
Budyšin. Smolerjec kniharnja wostanje inwentury dla wot 2. hač do 12. januara 2024 zawrjena. Wot póndźele, 15. januara 2024 je kniharnja zaso wšědnje wot póndźele hač do pjatka w času wot 10 do 17 hodź. wotewrjena. Sobudźěłaćerjo so na wopyt kupcow wjesela.
Pytaja kandidatki za Martu
Wojerecy. Kóždej dwě lěće počesći město Wojerecy žonu z města za wosebite zasłužby z plastiku Marty. Tak hódnoća čestnohamtske dźěło abo skutkowanje w towarstwje abo susodstwje. Klětu 8. měrca chcedźa dalšu žonu počesćić. Za to pytaja kandidatki. Hač do 26. januara móža wobydlerjo namjetować, kotra žona z města měła wuznamjenjenje přijimać.
Koncertuja z dźěćimi
Radwor. Swój kóždolětny hodowny koncert wuhotuje chór Meja sobotu, 6. januara, w 17 hodź. w Radworskim hosćencu „Meja“. Nimo chóra tež Radworske dźěći sobu skutkuja. Hanka Rjelcyna budźe hodowno-zymske teksty.
Koncert w cyrkwi
Chrósćicy. Hodowny koncert Chróšćanskeho cyrkwinskeho chóra wotměje so njedźelu, 7. januara, w 14 hodź. w farskej cyrkwi. Šoli a dujerjo jón sobu wuhotuja.
Boža mša w radiju
Smochćicy. Radijowy sćelak MDR Kultur wusyła Nowe lěto, 1. januara 2024, w 10 hodź. Božu mšu live z cyrkwje Smochčanskeho kubłanišća swjateho Bena. Celebrantaj staj farar Michael Kleinert a tachantski kapitular Bernhard Dittrich, kiž zdobom prěduje. Hudźbne wobrubjenje na starosći změje chór muži Drježdźanskich kapałnikow. Na pišćelach zahraje Felix Wunderle.
Tež klětu budu zhromadnje spěwać
Budyšin. Wjednistwo Zwjazka serbskich spěwarskich towarstwow (ZSST) tež w lěće 2024 zhromadne spěwanje planuje. Přichodne terminy su 9. januara, 6. februara, 5. měrca, 9. apryla, 7. meje a 4. junija. Zajimcy zetkaja so wot 18 do 20 hodź. w chórowej rumnosći Serbskeho ludoweho ansambla. Organizatorojo wokoło Lubiny Žurec-Pukačoweje nadźijeja so mnohich wopytowarjow.
Koncertuja za dobry skutk
Nowe widejo widźeć
Chrósćicy. Nowe serbske hudźbne widejo kapały Horjany je wot dźensnišeho na YouTube-kanalu „Serbska hudźba – Sorbian music“ widźeć. Kaž Sonja Hejdušcyma z kapały zdźěli, zwjazuje hudźbne widejo „Hindraško“ tradiciju z modernu. Za swój projekt su starej serbskej ludowej spěwaj za wobsadku dujerskeje kapały aranžować dali a z tym spěwaj w modernym stilu dźensnišemu časej wotpowědujo wožiwili. Nastał je medley „Hindraško“ zdźěla w rytmje Balkana. Nimo nahrawanja noweho medleyja přez kapału Horjany w studiju w Bretnigu su k tomu widejo natočili. Awdijoprodukt so přez znate streamingowe słužby (na přikład spotify) šěrokej zjawnosći spřistupnja, wosebje tež młódšej generaciji. Kapała Horjany je tutón projekt za hajenje serbskeje rěče a serbskeho spěwa z podpěru wubědźowanja „simul+ čiń sobu“ zwoprawdźiła. Zakład medleyja stej skerje njeznatej ludowej spěwaj „Hindraško, ty synko mój“, po ludowym teksće a melodiji wobdźěłany wot Bjarnata Krawca, a „Šěrik, měrik bałdrijan“ na tekst Jana Lajnerta a melodiju Bjarnata Krawca.
Wustajeńcu podlěša
Chcedźa zhromadnje spěwać
Za kubłanski dźeń so přizjewić
Budyšin. „Žiwy być kaž w paradizu?!“ rěka hesło kubłanskeho dnja, na kotryž přeprošuje dekanatne dušepastyrstwo wšitkich młodostnych a młodych dorosćenych w starobje 18 do 30 lět sobotu, 6. januara 2024, do Ewangelskeho centruma za dźěći a młodźinu TiK w Budyšinje. Za zastaranje, program a zawěsćenje zběraja přinošk dźesać eurow. Přizjewjenja přijimuja hač do wutory, 19. decembra, online. Link je pod wozjewjeny.
Kónclětny hudźbny nyšpor
Baćoń. Woblubowany kónclětny hudźbny nyšpor w Baćońskej cyrkwi wuhotuje njedźelu, 31. decembra, w 17 hodź. „Chór Šnajdrec wnučkow & co.“ Ćěleso wobsteji z 13 potomnikow njeboh Hany Šnajdroweje a Bena Šnajdra ze Smječkec a jich mandźelskich resp. partnerow. Nawod změje Jadwiga Kaulfürstowa, tohorunja jedna z wnučkow. Na wopytowarjow čaka pisany rjad kěrlušow z wjacehłósnym chórom we wulkej a mjeńšej wobsadce z mnohimi solemi, zdźěla z hudźbnym přewodom kaž tež instrumentalny přinošk z dwojimi huslemi a klawěrom.
Porěči wo Mongolskej
Chrósćicy. W rjedźe kulturneje zymy w Chróšćanskej putniskej hospodźe přednošuje jutře, sobotu, Beno Bělk wo swojej jězbje do Mongolskeje. Započatk budźe w 19.45 hodź. Hižo w 16 hodź. su dźěći znowa na serbske kino přeprošene.
Šulerjo koncertuja
Pančicy-Kukow. Tradicionelny adwentny koncert „Šule Ćišinskeho“ wotměje so njedźelu, 17. decembra, w cyrkwi klóštra Marijineje hwězdy w Pančicach-Kukowje. Započatk budźe w 15 hodź. Zastup je darmotny, pjenježny dar je witany.
SKI jutře wočinjena
Budyšin. Runja zašłymaj adwentnymaj sobotomaj budźe Serbska kulturna informacija w Budyskim Serbskim domje tež jutře wot 10 do 15 hodź. wočinjena. Nimo toho maja wopytowarjo składnosć, sej rjany hodowny darik zhotowić. Pod nawodom Annelie Rjelkec přewjedu tam dźěłarničku debjenja hodownych kulow.
Štomik wupytać a podrězać
Brigada koncertuje
Budyšin. Chór 1. serbskeje kulturneje brigady wuhotuje swój tradicionalny adwentny koncert sobotu, 16. hodownika, w 17 hodź. w Budyskej Marje Marćinej cyrkwi. Zaklinča serbske a mjezynarodne adwentne twórby we wotměnje ze solistiskimi přinoškami brigadnikow. Wuměłski nawod změje prěni raz Judit Kubicec. Na pišćelach hraje Korla Bajer. Zastup budźe darmotny, wo kolektu so prosy.
Dwójce „Zymski čas“
Budyšin. Pjatk a sobotu, 15. a 16. decembra, stajnje w 19.30 hodź., předstaja rejowarjo, spěwarjo a hudźbnicy Serbskeho ludoweho ansambla dalšej razaj scenisko-koncertantny adwentny program „Zymski čas“. Na žurli SLA w Budyšinje zjednoća so při tym najrjeńše twórby adwenta ze serbskimi zymskimi nałožkami. Zawěsće je to rjana składnosć, so w hektiskim dohodownym času trochu adwentneho měra nasrěbać. Wšitcy su wutrobnje přeprošeni.
Adwentne wiki w klóštrje
Pančicy-Kukow. Adwentne wiki klóšterskeho wobchoda w klóštrje Marijinej hwězdźe w Pančicach-Kukowje wotměja so sobotu, 16. decembra, wot 10 do 18 hodź. Nimo horceho wina a praženych kołbaskow změja w poskitku Ochranowske hwězdy, wot sotrow zhotowjene likery, wolije a sele kaž tež jabłukowy punš z klóštra w Oseku a wjele dalšeho. Wot 8 do 13 hodź. předawaja čerstwe hodowne štomy.
Adwentna hudźba w cyrkwi
Chróstawa. Třeću adwentnu njedźelu wot 17 hodź. zaklinči tradicionelna adwentna hudźba w cyrkwi w Chróstawje (Crostau) pola Korzymja. Pod nawodom kantora Hansa Christiana Martina zaspěwa Chróstawski chór. Pozawnowy chór nawjeduje Volkhart Häntsch. Nimo toho zaklinča Silbermannowe pišćele. Na programje steja mjez druhim kantata Telemann a adwentne kěrluše za spěwanje. Zastup je darmotny.
