Radźićeljo wuradźuja
Róžant. Hnydom tři parlamenty gmejnow zarjadniskeho zwjazka Při Klóšterskej wodźe so jutře, štwórtk, k wuradźowanju zetkaja. Wot 18.30 hodź. zaběra so gmejnska rada Ralbic-Róžanta w Róžeńčanskej gmejnskej sydarni z dalšimi nadawkami za nowotwar Ralbičanskeje pěstowarnje, mjenujcy za třěchikryjerske dźěła, lift a za meblěrowanje. Dale póńdźe wo twarske wustawki za Róžant.
Chrósćicy. Skerje skromny je porno tomu dnjowy porjad zjawneho wuradźowanja Chróšćanskich radźićelow, kotřiž zetkaja so w 19 hodź. w swojim gmejnskim a kulturnym centrumje. Tam póńdźe wo stejišćo k twarskej próstwje a wo lisćinu namjetow přisydnikow za hamtsku dobu 2024 do 2028.
Worklecy. Worklečanskej gmejnskej radźe předstaja wot 19.30 hodź. w tamnišej šuli projekt kupy, hdźež ma nowe kulturne a towarstwowe srjedźišćo wsy nastać. Dale wobzamknu radźićeljo lětne wotličenje 2016 Worklečanskeje gmejny. Na wšitke posedźenja su wobydlerjo wutrobnje přeprošeni.
Na Smochčanski forum
Smochćicy. „Je to hižo ekstremizm?“ rěka dalše zarjadowanje w rjedźe Smochčanskeho foruma jutře, srjedu, w 19 hodź. w Smochčanskim kubłanišću swjateho Bena. Politologaj Tom Thieme a Christoph Meißelbach porěčitaj mjez druhim wo prašenju, hač móžeš prawicarski a lěwicarski ekstremizm přirunować a hač je AfD prawicarsko-ekstremistiska strona. Wšitcy su přeprošeni.
Protyki zaso w poskitku
Kamjenc. Zapósłanc Sakskeho krajneho sejma Alojs Mikławšk (CDU) ma w swojim Kamjenskim wólbnym běrowje na Zapadnej 4 zaso šulerske protyki za šulske lěto 2023/24 w poskitku. Tydźenski planowar je přewodnik po šulskim lěće a skića dosć městna za wosobinske zapiski. Nimo toho informuje wón wo krajnej politisce a wo dźěle krajneho parlamenta. Protyka hodźi so za šulerjow wot 7. lětnika. Běrow je přistupny wot póndźele do pjatka stajnje wot 8 do 14 hodź.
Wolgang Berghofer přijědźe
Za dyrdomdej so přizjewić
Budyšin. Rěčny centrum WITAJ přewjedźe w kooperaciji z Němsko-Serbskim ludowym dźiwadłom za šulerjow 3. a 4. lětnika serbskich zakładnych šulow pjatk, 9. junija, čitanski dyrdomdej na Budyskich wěžach. Nóžkujo po starym měsće wopytaja šulerjo tři wšelake wěže, zhonja stawizniske zajimawostki a předčitaja sej na wěžach mjez sobu ze swojich serbskich knihow. Mały piknik, zabawne hry a kónčny kwis zhromadny wječor skulojća.
Městna su wobmjezowane, přizjewjenja přijimuje RCW wot 22. do 26. meje.
Darmotnje do muzeja
Budyšin. Na Mjezynarodnym dnju muzejow, 21. meje, je njedźelu tež w Serbskim muzeju zastup darmotny. Je to dobra składnosć sej wustajeńcu „Čej’ da sy?“ wobhladać. W 15 hodź. poskići so wodźenje w němskej rěči a w 16 hodź. w serbskej rěči.
Poskića prózdninskej lěhwje
Premjerne popołdnjo
Nalětni koncert w klóštrje
Pančicy-Kukow. Chór Lipa přeproša hromadźe z Křesćansko-socialnym kubłanskim skutkom na nalětni koncert njedźelu, 14. meje, w 15.30 hodź. na zahrodźe klóštra Marijineje hwězdy w Pančicach-Kukowje. Hižo wot 15 hodź. poskića tam swačinu z kofejom a tykancom. Publikumej zanjesu spěwarki a spěwarjo wěnc znatych a mjenje znatych pěsnjow, w kotrychž powěda so wo lubosći a rejach na korčmarjec žurli. Dale wustupi Lipjanska dźěćina „Lipki“ a dźěćaca band „Šwintuchi“, kotraž chce připosłucharstwu porjadnje zapyrić. Organizatorojo wjesela so na bohaty wopyt.
Na mejemjetanje
Serbske Pazlicy. Kóždolětne mejemjetanje swjeća w Serbskich Pazlicach njedźelu, 14. meje. Započatk budźe w 16 hodź. Kaž wjesna młodźina zdźěli, poskića wot 15 hodź. kofej a tykanc.
Radwor. Tež Radworska młodźina prosy na mejemjetanje. Wone wotměje so tohorunja zajutřišim, njedźelu, a to wot 15 hodź. na nawsy. Wo program postara so po zwučenym wašnju pěstowarnja. Sobotu wot 20 hodź. su wobydlerjo na nawjes k natočenju piwa witani.
Přeprošuja na swjedźeń
Konjecy/Šunow. Z nadróžnej kopańcu a dźěćacym swjedźenjom zahaja sobotu, 13. meje, popołdnju lětuši wjesny swjedźeń Konjec/Šunowa. Z hudźbnej zabawu a wječornym programom wjesneje młodźiny jón wječor w swjedźenskim stanje pokročuja. Po njedźelnym rańšim piwku wubědźuja so wohnjowe wobory wokolnych wsow. W 10.30 hodź. předstaji so wojerske towarstwo 1885 Konjecy. Po zhromadnym wobjedźe budźe w 14.30 hodź. mejemjetanje w Šunowje, po tym w Konjecach. W 16.30 hodź. slěduja wjesne mišterstwa w ćahanju powjaza. Wječor skónči so ze zabawu a diskoteku. Wo jědźe a napoje na woběmaj dnjomaj staraja so wohnjowa wobora, Domowinska skupina, blidotenisowe towarstwo a młodźina.
Za pózdnju změnu so přizjewić
Budyšin. We wobłuku pózdnjeje změny móža zajimcy 9. junija w Budyšinje zeznać 21 hospodarskich předewzaćow. Za to organizuje město wosom wšelakich busowych jězbow, kotrež stajnje k dwěmaj předewzaćomaj abo k třom powjedu. Jězby su darmotne, zajimcy pak dyrbja so přizjewić. Na stronje informuja wo firmach a wo móžnosćach přizjewjenja.
Na dworje swjeća
Worklecy. Serbska zakładna a wyša šula „Michał Hórnik“ Worklecy přeprošujetej wšitkich šulerjow, wučerjow, staršich a dalšich wobydlerjow na dworowy swjedźeń z mejemjetanjom. Wón wotměje so pjatk, 12. meje, wot 18 hodź. Wo ćělne derjeměće budźe z jědźemi a napojemi postarane. Tradicionalne zarjadowanje wobeju kubłanišćow wobohaća lětsa prěni raz čaporowe wiki, na čož smědźa wopytowarjo wosebje wćipni być.
Nalětni koncert w klóštrje
Pančicy-Kukow. Chór Lipa přeproša hromadźe z Křesćansko-socialnym kubłanskim skutkom na nalětni koncert njedźelu, 14. meje, w 15.30 hodź. do zahrody klóštra Marijineje hwězdy w Pančicach-Kukowje. Hižo wot 15 hodź. poskića tam swačinu z kofejom a tykancom. Publikumej zanjesu spěwarjo wěnc znatych a mjenje znatych pěsnjow, w kotrychž powěda so wo lubosći a rejach na korčmarjec žurli. Dale wustupi Lipjanska dźěćina „Lipki“ a dźěćaca band „Šwintuchi“, kotraž chce připosłucharstwu porjadnje zapyrić. Organizatorojo so na bohaty wopyt wjesela.
Přednošuje wo jubilejnej wsy
Lejno. W lěće 1423, potajkim před 600 lětami, bu wjes Lejno prěni raz pisomnje naspomnjena. Tutomu jubilejej wěnuje Benedikt Cyž swój přednošk, kotryž změje wón srjedu, 10. meje, w 19 hodź. w Lejnjanskim hosćencu „K lipje“. Na njón su wšitcy wobydlerjo cyle wutrobnje přeprošeni.
Darmotnje do stolicy
Budyšin. Wot 1. do 2. junija wobsteji móžnosć z busom wot Budyšina do Berlina jěć. Wobdźělnicy wopytaja mjez druhim Němski zwjazkowy sejm, zwjazkowe ministerstwo za dźěło a socialne kaž tež Humboldtowy forum. Nimo toho je planowana kołojězba po měsće. Na jězbu přeprošuje zapósłanča zwjazkoweho sejma Kathrin Michel (SPD), kotraž so z wobdźělnikami jězby k rozmołwje zetka. Wudawki za jězbu, přenocowanje, snědań a dwójce za wobjed kaž tež wšitke zastupy žane njenastanu. Přizjewjenja přijimuja hač do 11. meje pod telefonowym čisłom 03591 2744690.
Wo dowolu něhdy
Budyšin. Přichodne zarjadowanje Budyskeho archiwneho zwjazka wěnuje so jutře, wutoru, w 19 hodź. prašenju, hdźe a kak su wobydlerjo za čas NDR swój dowol přežiwili. Wo tym přednošuje stawiznar dr. Sönke Friedreich. Zastup je darmotny. Štóž ma wobrazy wo swójskich dowolowych dožiwjenjach, předewšěm při Budyskim spjatym jězoru, móže je rady sobu přinjesć. Wosebje zajimawe motiwy chce mjenowany zwjazk jako kopije do swojeho archiwa přewzać.
Dalši forum
Budyšin. Po premjerje w Strowotnej studni wotměje so jutře, wutoru, w 19 hodź. dalši wobydlerski forum z Budyskim wyšim měšćanostu Karstenom Vogtom, tónraz w hotelu Residence na Wjelećanskej. Myslene je zarjadowanje za wobydlerjow južneho města a Hornjeje Kiny. Na nim móža so zajimcy darmotnje a bjez přizjewjenja wobdźělić.
