Do fabriki pohladać
Hórnikecy. „Změna w fabrice“ rěka prózdninski poskitk Hórnikečanskeje energijoweje fabriki. Wobdźělnicy nazhonja, kak ćežke a mazane tam dźěło něhdy bě a kotre nadawki přistajeni mějachu. Terminy su 20. a 27. julija kaž tež 3., 10., 17. a 24 awgusta stajnje wot 11 hodź. Zajimcy njech přizjewja so pod telefonowym čisłom 03571/ 60 70 340.
Předpředań zahajena
Budyšin. Předpředań zastupnych lisćikow za předstajeni oratorija „Žně“ Korla Awgusta Kocora a Handrija Zejlerja, kiž wotmějetej so 18. awgusta w 19.30 hodź. a 19. awgusta w 17 hodź. w Budyskej „Krónje“ je zahajena. Swětny oratorij předstajitej chór 1. serbskeje kulturneje brigady a orchester Serbskeho ludoweho ansambla pod hudźbnym nawodom Friedemanna Böhmy. Z tym rozžohnuje so cyrkwinski hudźbny direktor Friedemann Böhme jako wjelelětny wuměłski nawoda chóra 1. serbskeje kulturneje brigady na wuměnk. Z lěta 1996 wón spěwne ćěleso Serbskeho gymnazija nawjeduje. Kartki dóstanu zajimcy při kasy SLA w Budyšinje abo online pod www.ansambl.de. Kasa SLA je wot 22. julija do 14. awgusta dowola dla zawrjena. W tym času hodźa so lisćiki dale online skazać.
W prózdninach roboter twarić
Budyšin. Pod hesłom „Digitalna manufaktura“ poskićuje towarstwo Dźěłań dźeń w swojich rumnosćach na Budyskej Sukelnskej wot 24. do 28. julija jako prózdninski poskitk zakładny kurs robotiki. Wobdźělnicy budu prěnje roboterowe systemy twarić a sej trěbne technologiske znajomosće přiswojić. Program z medijowym pedagogu dr. Andréjom Měrćinkom měri so na zajimcow wot dwanaće lět a płaći pjeć eurow wob dźeń. Zajimcy njech přizjewja so pod info@tagwerk.space.
Za wulět so přizjewić
Worklecy. Wulět dekanatneje młodźiny wotměje so njedźelu, 3. septembra. Přeprošeni su młodostni wot přichodneho 9. lětnika. Přizjewjenja přijimuja hač do 8. awgusta, na internetnej stronje Worklečanskeho dekanatneho dušepastyrstwa za młodźinu.
Biblioteka zawrjena
71. literarna kofejownja
Budyšin. We wobłuku swojeho rjadu „Literarna kofejownja“ přeproša Budyski ekumeniski tachantski wobchod jutře, pajtk, na čitanje z Róžu Domašcynej. We 18.30 hodź. chce spisowaćelka a basnica pod hesłom „Soll was bleiben, tritt es aus dem Wort“ wurězki swójskeje krótkoprozy kaž tež swójsku lyriku a přebasnjenja předstajić. Zastup je darmotny, pjenježne dary su witane.
Młodźi hudźbnicy koncertuja
Smochćicy. Lubowarjo klasiskeje hudźby njesměli skomdźić sej dojěć jutře, pjatk do Smochćic. W tamnišim kubłanišću swjateho Bena koncertuje wot 17 hodź. Němska smyčkowa filharmonija. Hudźbne ćěleso, kotrež wobsteji z najlěpšich młodych smyčkarjow cyłeho kraja, je hižo na mnohich turnejach w kraju a wukraja wulke připóznaća žnjał. Orchester swjeći lětsa swoje 50lětne wobstaće. Pod dirigentstwom Emmanuela Tjeknavoriana zaklinča twórby Mozarta, Čajkowskeho a Vivaldija. Zastup je darmotny.
Ideje zapodać
Radźićeljo wuradźuja
Brigada dwójce přeprošuje
Po katolskim kraju kolesować
Njebjelčicy. Dalša kolesowanska tura pod hesłom „Ke Klóšterskej wodźe a Delany“ pod nawodom Tadeja Šimana wotměje so sobotu, 15. julija. Wona powjedźe wot Njebjelčic do Delan a wottam wróćo do Njebjelčic. Mjezystacije su mjez druhim Miłoćicy, Worklecy a Róžant. Něhdźe 28 kilometrow dołha jězba započnje so w 10 hodź. na parkowanišću při wosadnicy „Bjesada“.
Pišćele zaklinča
Łaz. Spěchowanske towarstwo zetkanišća Dom Zejlerja a Smolerja kaž tež Łazowska wosadna cyrkwinska rada přeprošujetej na wosebity koncert sobotu, 8. julija, we 18 hodź. do Łazowskeje cyrkwje. Na tamnišich pišćelach zahraje Ulrike Scheytt, kotraž bě wjele lět w Zhorjelcu wokrjesna kantorka. Dźensa bydli wona w Simmerath w Eifeli. We Łazu zaklinča nimo twórbow Bacha, Mozarta a Vivalidija wjacore twórby Jana Pawoła Nagela. Koncert wuhotuje sobu trompetar Enrico Gnauk z Kubšic. Zastup je darmotny.
Přepodadźa šćežku
Radwor. „Na slědach zbóžneho Alojsa Andrickeho“ rěka šćežka, kotruž přepodadźa pjatk, 7. julija, w Radworju. Zajimcy su wutrobnje přeprošeni a zetkaja so w 14 hodź. před Starej cyrkwičku.
Z busom na festiwal
Chrósćicy. Na XIV. mjezynarodny folklorny festiwal „Łužica“ pojědźetej sobotu, 8. julija, do Chrósćic shuttlebusaj. Tam- a wróćojězba płaćitej stajnje dwaj euraj na wosobu. Prěni bus wotjědźe w 17.30 hodź. wot Budyskich Lawskich hrjebjow. Wón pojědźe přez Mały Wjelkow, Chelno a Radwor (17:55), dale přez Čorny Hodler a Njeswačidło (18:15) kaž tež přez Bóšicy a Jaseńcu (18:25) do Chrósćic. Druhi bus wotjědźe w 17 hodź. při Kamjenskim dwórnišću a pojědźe přez Njebjelčicy, Miłoćicy a Pančicy-Kukow (šula; 17:30), Wudwor (betonownja), Smječkecy (Hłowna dróha) a Róžant (pola Suchec; 17:50) Smjerdźacu, Šunow a Konjecy (18:05), Ralbicy, Nowoslicy a Hrańcu (S 101; 18:20) do Chrósćic. Wróćojězba budźe za wobě čarje w 24 hodź. Přizjewjenja njejsu trěbne.
Wot dźensnišeho twarja
Lubjenc. Wokrjesnu dróhu K 7239 wot Lubjenca (Mehltheuer) hač do Jaseńcy (Jeßnitz) wot dźensnišeho w dwěmaj wotrězkomaj wutwarja. Hač do decembra 2023 wostanje dróha dospołnje zawrjena. Wokołopuć za čas prěnjeho twarskeho wotrězka wjedźe wot Jaseńcy přez Rabocy (Rabitz) a Hruboćicy (Grubditz).
Swoje prašenja wotbyć
Budyšin. Do lětnjeje přestawki poskića Budyski wyši měšćanosta Karsten Vogt (CDU) dalši wobydlerski dialog, tónraz za zapadne předměsto. Zarjadowanje wotměje so jutře, wutoru, w 19 hodź. w Fichtowej zakładnej šuli. Tam chcedźa wobydlerjow wo přichodnym wuwiću města informować a na jich prašenja wotmołwić. Zajimcy móža darmotnje a bjez přizjewjenja wobydlerski dialog wopytać.
Jahody w srjedźišću
