Wodźenja wjacorěčne
Budyšin. We wobłuku interkulturelneho tydźenja poskićuje Budyski Serbski muzej njedźelu, 9. oktobra, wodźenja we wjacorych rěčach. Po zawodźe k zeznaću serbskich stawiznow a kultury slěduje wopyt wosebiteje wustajeńcy „Wšitko je krajina. Serbski moler Jan Buk“. Wodźenje wotměje so w 13 hodź. pólsce, w 15 hodź. ukrainsce a w 16 hodź. rusce.
„Stwórbu“ dožiwić
Dźěłarnička Bjesadow
Hodźij. Hižo tójšto lět organizuje Serbske ewangelske towarstwo hromadźe ze serbskimi Bjesadami jako lětne zetkanišćo za wuměnu a dalekubłanje dźěłarničku. Lětsa so wona třeći króć w Hodźiju wotměje, a to sobotu, 8. oktobra, w kantoraće při nawsy. Dźěłarničku zahaja w 14 hodź. z nutrnosću. Na to předstajitej so přełožowanski program „Sotra“ a serbski kwis. Po kofejowej přestawce dožiwja wobdźělnicy w 16 hodź. dwurěčne dźiwadło za dźěći a dorosćenych „Čmjeła Hana“. Wšitkich sobustawow Bjesadow, maćernorěčnych kaž tež serbsce wuknjacych a wšitkich dalšich zajimcow Serbske ewangelske towarstwo a Hodźijska Bjesada wutrobnje přeprošatej.
K sadowcam kolesować
Předstaja Serbsku protyku
Budyšin. Ludowe nakładnistwo Domowina přeproša štwórtk, 6. oktobra, na knižnu premjeru „Serbskeje protyki 2023“. W Budyskej Smolerjec kniharni předstaja redaktor Pětr Šołta a awtorojo jednotliwych přinoškow nowostku, kotrejež tematiske ćežišćo tworja „stawiznički a powěsće, zajimawostki a překwapjenki kołowokoło Budyskich horow“. Zarjadowanje započnje so w 19 hodź.
Jutře rěčna hodźina
Kamjenc. Zapósłanc Sakskeho krajneho sejma Alojs Mikławšk (CDU) změje jutře, štwórtk, dalšu wobydlersku rěčnu hodźinu. Wot 13 do 16 hodź. změja wobydlerjo we wólbnym běrowje na Kamjenskej Zapadnej čo. 4 składnosć swoje naležnosće přednjesć. Termin dojednać móža sej woni pod telefonowym čisłom 03578 305383 abo pod . Za wobydlerske naležnosće je běrow wot póndźele do pjatka stajnje wot 8 do 14 hodź. docpějomny.
Wódny muž na pućowanju
Rejwać wuknyć
Wojerecy. Dźěći a młodostni w starobje dźesać do pjatnaće lět móža kóždy pjatk wot 14 do 15 hodź. na dźěćacej a młodźinskej farmje we Wojerecach rejwać nawuknyć, zdźěli Křesćansko-socialny kubłanski skutk Miłoćicy. Za nawod treninga je sej CSB zdobył rejwarki a rejwarjow Serbskeho ludoweho ansambla z Budyšina. Pola nich nawuknu zajimcy rejwanske kroki. Wobdźělenje je darmotne. Poskitk spěchuje program zwjazkoweho ministerstwa za kubłanje a slědźenje. Dalše informacije a přizjewjenje dóstanu zajimcy pod telefoniskim čisłom 03571 979164.
Podlěša dobu wustajeńcy
Budyšin. Wosebitu wustajeńcu „Wuměłstwo a přiroda. – INO – Ingerose Jänichen-Kucharska, retrospektiwa“ znateje hornjołužiskeje wuměłče hač do 1. januara 2023 podlěša. Přehladka je dotal njewočakowano wjele zajimcow do Muzeja Budyšin přiwabiła.
Škody wotstronić
Wódny muž na pućowanju
Wodowe Hendrichecy. Serbske šulske towarstwo přeprošuje serbske dźěći a swójby, bydlace w Hornjej a Delnjej Łužicy, na zhromadny kónc tydźenja. Tón wotměwa so 21. do 24. oktobra w dźěćacym wočerstwjenišću Querxenland we Wodowych Hendrichecach. Lětsa steji zetkanje pod hesłom „Wódny muž na pućowanju“. Přinošk na swójbu z połnym zastaranjom wučinja 240 eurow. Přizjewjenja su hač do 14. oktobra 2022 pod mejlowej adresu móžne. Dalše informacije za zajimcow steja na webstronje SŠT.
Dalše šćěpjenje bórze móžne
Budyšin. Wot 4. oktobra budźe móžno so ze šćěpiwom šćěpić dać, kotrež je na wšelake omikron-warianty koronawirusa přiměrjene. Za to poskićeja šćěpiwo předewzaća BionNTech/Pfizer. Zo bychu čakanske časy pomjeńšili, su šćěpjenja jeno z předchadźacym terminowym dojednanjom přez onlinowy portal móžne, kaž Němski Čerwjeny křiž tele dny zdźěli. Rjadowanje płaći za wšitke prěnje, druhe abo dalše šćěpjenja. Terminy hodźa so knihować pod .
Třinarodny fachowy forum
Ryby z Kupoweho hata
Radwor. Radworske Kupowe zjednoćenstwo z.t. přeprošuje na łójenje rybow z Kupoweho hata. Tule sobotu, 1. oktobra, móža sej zajimcy při haće čerstwu a kurjenu rybu kupić abo na městnje tež hnydom zjěsć. Dale poskićuja wšelake jědźe z gulašoweje kanony. W srjedźišću podawka pak steja dźěći, kotrež dožiwja jón ze wšěmi zmysłami. Wažne je, zo maja wone drastu sobu, zo móža so po potrjebje předrasćić. Zarjadowanje wotměwa so we wobłuku Łužiskich rybjacych tydźenjow. Dalše informacije pod .
Na film do Chrósćic
Chrósćicy. W Chróšćanskej wjacezaměrowej hali „Jednota“ móža sej zajimcy wutoru, 4. oktobra, we 18 hodź. filmy na temu „Krabat“ wobhladać, zdźěli Chróšćanski gmejnski zarjad. Zarjadowanje wotměje so w zwisku z Krabatowym tydźenjom. Zajimcy su na bjezpłatny poskitk přeprošeni.
Myška w Lessingowym měsće
Do Smolerjec kniharnje
Na farmje warić
Wojerecy. We Wojerowskim centrumje za zežiwjenje a zela Křesćansko-socialneho kubłanskeho skutka wotměwaja jutře dalše zarjadowanje w rjedźe „Klewernje a kreatiwnje warić“. Pod hesłom „Nazymska kuchnja połna witaminow“ nastanje na dźěćacej a młodźinskej farmje tři- do štyridźělny meni. Předewšěm z regionalnych a sezonalnych produktow móža zajimcy wšelke jědźe warić. Štóž chce so wobdźělić, njech so pod telefoniskim čisłom 03571 979164 abo emejlnje pod přizjewi. Popłatk płaći sydom eurow.
Na čitanje do Hrodźišća
Sportej zdar w Slepom
Slepo. Serbske šulske towarstwo z. t. a Serbski Sokoł z. t. přeprošujetej srjedu, 28. septembra, na sportowe wubědźowanje „Sportej zdar 2022“ do Slepoho. Na nim wobdźěla so wuknjacy 7. do 9. lětnika serbskich wyšich šulow a Budyskeho Serbskeho gymnazija. W šěsć disciplinach wojuja šulerki a šulerjo wo dypki. W srjedźišću sportowych wurisanjow steji nałožowanje serbšćiny. Projekt spěchuje Załožba za serbski lud ze srědkow idejoweho wubědźowanja „Rěč wjaza. Rěc zwězujo. Sorbisch verbindet.“.
Žnjensku krónu a wěnc nawili
Pój, wječoro, k nam rjany
Budyšin. Serbski ludowy ansambl přeproša jutře, pjatk, 23. septembra w 19.30 hodź. do Budyskeho Serbskeho domu. W srjedźišću steji komornohudźbne tworjenje Korle Awgusta Kocora. Čłonojo orchestra předstaja w prěnim dźělu wječorka kompozicije za smyčki a klawěr, kaž Trio za husle, violoncello a klawěr, Sonatinu čo. 2 G-dur za husle a klawěr a tež smyčkowy kwartet. Twórba Liany Bertókoweje „Hommage á Kocor“ za dwaj hłosaj, husle a klawěr zahaji druhi dźěl koncerta, čerpacy z bohateho pokłada pěsnjow załožerja serbskeje wuměłskeje hudźby. Tak zaklinči twórba „Tři norwegske pěsnje“ z pózdnjeho tworjenja Kocora. Štyri spěwy ze „Šěsć serbskich spěwow“ je młody komponist swojemu wučerjej Karlej Eduardej Heringej wěnował. Na kóncu zaklinčitej hišće kompoziciji za ansambl drjewowych dujerjow. Je to wobdźěłanje spěwa „Pój, wječoro, k nam rjany“ wot Jana Cyža a „Kocoriana-Suite“ za dujerski kwintet čo. 2 wot Jana Pawoła Nagela.
Najstarša Budyšanka zemrěła
