Wubědźowanje so wotměje
Budyšin. Tež hdyž njemóžemy lětsa jutrowne wiki w Budyskim Serbskim domje dožiwić, to dawno njerěka, zo dyrbja debjerki a debjerjo jutrownych jejkow wostudu pasć. Přetož 68. wubědźowanje wo najrjeńše jutrowne jejko budźe. Dorosćeni kaž tež młodostni a dźěći su namołwjeni/namołwjene, swoje kolekcije zapodać. 19. měrc je termin wotedaća za dorosćenych, 7. apryl za dźěći a młodostnych. Weronika Suchowa a Eberhard Zobel ze Spěchowanskeho kruha za serbsku ludowu kulturu k tomu namołwjataj. Na dobyćerjow wubědźowanja čakaja myta, kotrež wospjet Załožba za serbski lud přewostaji.
Wobnowjeja dróhu přez wjes
Rychwałd. W Hamorskim wjesnym dźělu Rychwałd (Reichwalde) wobnowjeja zwjazkowu dróhu S 131 přez wjes. Prěni twarski wotrězk bu hišće loni do hód zhotowjeny. Tak su nošnu asfaltowu worštu zatwarili. Twarske dźěła wukonjeja w nadawku Sakskeho krajneho zarjada za dróhotwar a wobchad. Po zymskej přestawce, ručež budźe wotpowědne wjedro, chcedźa dale twarić.
Koncert na pišćelach
Sebjewědomje zwučować
Wojerecy. Doris Kasper chce ze swojim poskitkom sebjewědomje ludźi skrućić, zo njebychu so w swojej kreatiwiće wobmjezować dali. To je wobsah jeje skutkowanja jako trenarka, wo kotrymž tež na swojej internetnej stronje www.dieideengeberin.de rozprawja. Studowana archeologowka bě wjacore lěta mějićelka dožiwjenskeho statoka w Ćisku. Mjeztym je wona dwě dźěćacej knize wudała, jednu w LND.
Njezapłaćomne wuměnjenja
Zhorjelc. Kwalita žiwjenja, rumy swobody, kreatiwita, angažowani ludźo, zajimawy dźěłowy swět a z njezapłaćomne bydlenja zwonka wulkoměstow su wobsah internetneho poskitka pod hesłom kraj, kotryž njemóžeš zapłaćić (www.unbezahlbar.land.de). Iniciatiwa Zhorjelskeho wokrjesa předstaja tam mjez druhim předewzaća a přemysłownišća. Tuchwilu zajimuja wužiwarjow předewšěm regionalni poskićerjo a jich wudźěłki.
Nowe rjadowanje za šulu
Pomhaja potrěbnym
Kamjenc. Poskitki Kamjenskeje tafle wužiwa tuchwilu něhdźe 30 zhromadźenstwow potrěbnych. Wšědnje wot 14 hodź. móža sej jednotliwcy kaž tež cyłe swójby na Garnizonskim naměsće 4 a zežiwidła a wšědnu potrjebu wobstarać. Čestnohamtscy sobudźěłaćerjo a w jednoeurowym jobje dźěłacy so wo to staraja, zo su wšitke twory za potrěbnych sčasom spřihotowane. Wotranja woni tam twory rjaduja a za tym hladaja, zo su wosebje sad a zelenina čerstwe.
Informaciski dźeń
Žitawa/Zhorjelc. Wysoka šula Žitawa/Zhorjelc poskići 14. januara online-zarjadowanje za prašenja nastupajo studij. Zajimcy móža so wot 9 hodź. při domjacym ličaku na wysokošulskim informaciskim dnju wobdźělić a so wo wobšěrnym po- skitku studijnych móžnosćow wobhonić. Zdobom informuja jich wo wólnočasnych a dalšich poskitkach w Hornjej Łužicy.
Zachod na kěrchow zrunany
Brězowka. Pilni pomocnicy, wobydlerjo a někotři gmejnscy radźićeljo, su tele dny w Brězowce (Halbendorf) zachod na kěrchow runali. Přijězd je nětko tež za tych bjez problemow móžny, kotřiž su z chorobnym stołom po puću. Zdobom su kěrchowske wrota wobarbili. Wjesnjanosta Helmut Krautz (SPD) dźakowaše so na posedźenju gmejnskeje rady wšěm na akciji wobdźělenym.
Sobuskutkowacy pytani
Pančicy-Kukow. Klóšter Marijina hwězda tuchwilu planuje lětuši klóšterski a swójbny swjedźeń 13. junija přewjesć. Na njón chcedźa přeprosyć zaso regionalne towarstwa, zwjazki, kulturne skupiny a wuměłcow. Ći móža so na jewišću a towarstwowych wikach předstajić. Zdobom chcyli přirodowe wiki z wudźěłkami wikowarjow a rjemjeslnikow wuhotować. Zajimcy móža so hač do 28. februara na internetnymaj stronomaj www.csb-miltitz.de abo www.marienstern.de přizjewić.
Podpěruja potrěbnych
Informuja před hrodom
Wojerecy. Wosrjedź časa pandemije, hdyž sej poprawom nichtó nihdźe wulećeć njemóže, je turistiski zwjazk łužiskeje jězoriny blisko Wojerowskeho hrodu nowy informaciski kašćik nastajił. Tam móžeš so wo přenocowanskich móžnosćach, wo gastronomiskich poskitkach a wo zajimawostkach regiona wobhonić. Za infokašćik su něhdźe 15 000 eurow wudali. Spočatnje technika hišće prawje dźěłała njeje. Tak bě pokazka na Čornochołmčanski Krabatowy młyn z wobrazom Wojerowskeho centralneho parka garněrowana. Na wobsahach pak turistiski zwjazk wobstajnje dźěła.
Za transport koronapacientow
Změny w protyce
Budyšin. W poslednje dny stareho lěta připósłanej wotpadkowej protyce Budyskeho wokrjesa su so zmylki zadobyli. Kaž krajnoradny zarjad zdźěli, potrjechi to nimo Biskopic tež gmejny Halštrowska Hola, Bukecy, Rakecy a Wóspork. Tak změnja so na přikład za Halštrowsku Holu terminy wotwožowanja čorneho wotpadkoweho sudobja, w Bukecach žołteho sudobja a w Rakecach módreho sudobja za staru papjeru. Aktualizowanu protyku w potrjechenych komunach žanu njedóstanu. Změny zdźěla přez hamtsku nowinu wokrjesa. Terminy we wotpadkowej app su prawe.
Pytaja wobrazy za kalender
Wojerecy. „Moje najlubše městno we łužiskej jězorinje“ rěka hesło fotoweho wubědźowanja tamnišeho Leaderoweho regiona, kotrež su tele dny zahjili. Wubědźowanje traje hač do awgusta. Zaměr je, zestajeć wobrazowu protyku wo łužiskej jězorinje za přichodne lěto. 13 najrjeńšich wobrazow mytuja. Zajimcy njech sćelu swój foto na adresu .
Zarjadowanja wotprajene
W lěsu znjezbožiłoj
Wulka Chójnica. Ćežke lěsne njezbožo je so minjenu sobotu we Wulkej Chójnicy (Großkunitz) w Kubšiskej gmejnje stało. Při štomypušćenju bu tam 56lětny muž wot štoma zatłusnjeny. Wohnjowi wobornicy a wuchowanscy pomocnicy jeho wuswobodźichu. Z helikopterom dowjezechu jeho do chorownje, hdźež pozdźišo zemrě. Dalšu zranjenu wosobu móžachu na městnje lěkarsce zastarać.
Biblioteka zawrjena
Wojerecy. Aktualneho strowotniskeho połoženja dla wostanje Wojerowska biblioteka Brigitty Reimann po wšěm zdaću hač do 16. januara zawrjena. Swojich wužiwarjow skedźbnjeja na to, zo so tuchwilne wupožčenje medijow tak dołho podlěši, doniž biblioteka zaso njewočini. Přidatne wudawki z toho žane njenastanu. Štóž chce knihi a dalše medije wróćić, móže je do přihotowanych boksow połožić, kotrež su wot póndźele do pjatka stajnje wot 8 do 15 hodź. přistupne.
Městno za nowe domy
Kurt so jako prěni narodźił
Kamjenc. Prěnje dźěćo lěta 2021 w Kamjenskej chorowni maltezow swjateho Jana bě Kurt. Wón narodźi so 1. januara w 23.05 hodź. a je třeće dźěćo swójby. Ze swojim wulkim bratrom móže wón přichodnje zhromadnje narodniny swjećić. Tež wón bě so Nowe lěto narodźił. Dohromady je loni w Kamjenskej chorowni 459 dźěći na swět přišło, mjez 237 hólcami a 222 holcami dwójce dwójnikaj. Najwoblubowanišej mjenje běštej Theo a Hannah.
Praskotak strašny był
Halštrow. Njeznateho praskotaka dla su w prěnich hodźinach noweho lěta w Halštrowje wosebitu jednotku krajneho kriminalneho zarjada (LKA) wołali. Po informacijach policije jednaše so wo wohnjostrojnu bombu typa F4 z wuchodneje Europy. Tale družina rozbuchadłow smě so jeno z wotpowědnej dowolnosću zapalić. Dokelž praskotak rozbuchnył njebě, dyrbjachu městno namakanki zaraćić, prjedy hač ju LKA wotwjeze.
Zetkaja so online
Prěni štom hižo podrězany
Wojerecy. Lědma zo su hody nimo, su wčera na Wojerowskim Łužiskim naměsće tam stejacy hodowny štom podrězali. Sobudźěłaćerjo Wojerowskeho komunalneho twarskeho zawoda a kameradojo powołanskeje wohnjoweje wobory přijědźechu z wjacorymi jězdźidłami a šmrěk zrumowachu. Štom na staroměšćanskim torhošću porno tomu wostanje hač do 6. januara stejo.
Jeničke zarjadowanje přewjedli
Pančicy-Kukow. Zelowa njedźela w awgusće bě jeničke zarjadowanje, kotrež móžachu lětsa w zežiwjenskim a zelowym centrumje w Pančicach-Kukowje přewjesć. Za to mějachu w běhu lěta wjace wopytowarjow hač w zašłosći.
