VVO hotline zarjadował
Budyšin (SN). Dokelž maja mnozy sobudźěłaćerjo wobchadneho zwjazka Hornje Łobjo (VVO) na proze do noweho lěta dowol, poruča VVO wosebitu hotline. Telefonisce su přistajeni serwisoweho teama silwester a Nowe lěto wot 10 do 18 hodź. pod čisłom 0351 852 65 55 docpějomni, zo bychu ludźi wo busach a ćahach informowali. Infohotline VVO je hewak wotydźenja wot 7 do 19 hodź., sobotu, njedźelu a dalše swjate dny wot 8 do 19 hodź. docpějomna.
Gospelowy chór na turneji
Budyšin (SN). Pjaty króć je chór „The Gospel People“ lětsa w zymje na wulkej turneji po cyłej Němskej. Z wuběrnymi a wusahowacymi hłosami zahorjeja spěwarjo publikum přeco zaso ze swojim poselstwom. Tak chce sydomčłonska ameriska gospelowa skupina ze swojej hudźbu w času njewěstosće ludźom tróšku nadźije spožčić. Na to móža so fanajo tež w Budyšinje wjeselić. Pjatk, 29. decembra, wot 20 hodź. poskići chór něhdźe dwuhodźinski program jazza a soula w Marje-Marćinej cyrkwi.
Doma dźěło namakać
Budyšin (SN). Srjedu, 27. decembra, wotměje so w Budyskim krajnoradnym zarjedźe bursa „zaso tu“. Wot 10 hodź. je zhromadne wobchodźenje ze zastupjerjemi krajnoradneho zarjada, Industrijneje a wikowanskeje komory kaž tež rjemjeslniskeje komory planowane. 75 předewzaćelow je swoje wobdźělenje připrajiło. Předewzaća z dźěłowymi poskitkami skića wosebje nawrótnikam móžnosće, sej swoje žiwjenske srjedźišćo w Budyskim wokrjesu zarjadować.
Přednošk wo wjelkach
Rěčicy (SN). Rěčičanski kontaktny běrow „Wjelki w Sakskej“ přeproša zajimcow přichodnu srjedu w 10.30 hodź. na přednošk wo wjelkach. Informować chcedźa fachowcy přitomnych wo dotalnych wuslědkach wjelčeho slědźenja, wo biologiji a žiwjenskim wašnju tychle rubježnych zwěrjatow. Přednoškej přizamknje so ekskursija do wjelčeho rewěra.
SKI zawrjena – kniharnja nic
Dźakuja so za podpěru
Jaseńca/Prawoćicy. Jako zastupjer sebjepomocneje skupiny Xeroderma Pigmentosum, na kotrejež dobro bě njedawny beneficny koncert w Jaseńcy, so Tobias Bulank z Prawoćic spěwnej skupinje PoŠtyrjoch, Florianej Rynčej kaž tež wšitkim dalšim akteram, pomocnikam a mnohim darićelam za wulkomyslnu podpěru dźakuje. Dale su spočatk tydźenja Sernjanske maćerje sebjepomocnej skupinje 290 eurow darili, za čož so Tobias Bulank tohorunja wuraznje dźakuje.
Na wěži nowe lěto witać
Budyšin. Towarstwo měšćanskich wodźerjow poskića w Budyšinje wosebite silwesterske dožiwjenje. Na Maćijowej wěži při Hrodźe chcedźa nowe lěto witać. Zajimcy zetkaja so silwester w 22 hodź. na Mjasowych wikach. Wottam póńdu hač k Maćijowej wěži, hdźež čakatej na nich horce wino a přikusk. Na to podadźa so wšitcy na wěžu, a tam sej potom na Nowe lěto připija. Dalše informacije dóstanu zajimcy pod telefonowym čisłom 03591/ 52 82 898.
Wjesnjenjo so zetkali
Jawora (WB/SN). Na zhromadnu adwentničku na nawsy su młode swójby w Jaworje minjenu sobotu wšitkich wobydlerjow přeprosyli. Ći najmjeńši tam njesćerpnje na rumpodicha čakachu, wšako maja we wsy nimale 30 mjeńšich a wjetšich dźěći. Rumpodich wězo najprjedy njedostatki a chwalobne stronki kóždeho małeho Jaworčana předčita a so wjeseleše, jako wšitcy zhromadnje adwentne pěsnje zaspěwachu. Při bjesadźe z horcym winom a praženej kołbasku přijomny wječor wuklinča.
Wustawki wobzamknjene
Zdźěr (CS/SN). Tak mjenowane wujasnjowanske wustawki za Zdźěr chce Wulkodubrawska gmejna nastajić dać. Tole su čłonojo gmejnskeje rady na swojim zašłym posedźenju wobzamknyli. Tak ma so definować nutřkowny a wonkowny wobłuk, štož je wažne za twarske naležnosće we wsy. We wonkownym wobłuku su twarske projekty jenož wuwzaćnje móžne, mjenujcy hdyž jedna so wo zjawne zastaranje abo wo předewzaća ratarstwa a lěsnistwa. Naćisk wustawkow budźe wot 27. decembra hač do 19. januara we Wulkodubrawskim gmejnskim zarjedźe zjawnje wupołoženy.
Rozprawja wo putnikowanju
Chrósćicy. Hač ke kóncej swěta móžeš sej samo pěši dóńć. To wě Max Jörg Pfauder ze Schkeuditza, po powołanju grafikar, cyle dokładnje – dokelž je to sam činił. Španiske město Santiago de Compostela blisko Atlantiskeho oceana je wot swojich chěžinych duri dokładnje 3 009 kilometrow zdalene. Je samo na dwoje wašnje putnikował: jónu w kóždolětnych etapach, kusk po kusku, takrjec k zwučowanju; a potom tež cyły puć zasobu. Wo swojim dźesaćlětnym putnikowanju po Europje rozprawja Max Jörg Pfauder jutře, sobotu, w 19.45 hodź. w Chróšćanskej putniskej hospodźe. Wšitcy zajimcy su lubje witani!
Wiki při gratowni
Hórki. Na adwentne wiki přeprošuje Hórčanske wjesne towarstwo „Při skale“ njedźelu, 17. decembra, w 16 hodź. při gratowni Hórčanskeje dobrowólneje wohnjoweje wobory. Popołdnjo zahaja wjesne dźěći z programom, na to zanjese dujerska kapała „Horjany“ adwentnu hudźbu. Dźěći změja móžnosć k paslenju a tež rumpodich je swój wopyt připowědźił. Wopytowarjam poskićuja horce wino wot winicarja, kurjenu rybu, pražene kołbaski a dalše překwapjenki.
Natwarjacy kurs serbšćiny
Šulerjo koncertuja
Budyšin. Pod hesłom „Hodowne hwězdy“ přeprosy Budyska wokrjesna hudźbna šula jutře, pjatk, w 17 a 19.30 hodź. na dohodownej koncertaj do Němsko-Serbskeho ludoweho dźiwadła. Najwšelakoriše ansamble a jednotliwcy zahudźa a zaspěwaja adwentnu a hodownu hudźbu, pochadźacu z rozdźělnych hudźbnych tradicijow. Interpreća na jewišću budu młódši a starši šulerjo hudźbneje šule. Zastupne lisćiki dóstanu zajimcy při dźiwadłowej kasy.
Bajka w „Jednoće“
Chrósćicy. Balet Serbskeho ludoweho ansambla předstaji njedźelu, 17. decembra, w 17 hodź. rejwanu bajku „Hodowne potajnstwo“ w Chróšćanskej wjacezaměrowej hali „Jednota“. Wopytowarjo dožiwja mjez druhim skepsane kuzłarske hrónčko, bajowe postawy, kiž so žiwe na jewišću zjewja, a šibału błudničku (Hanka Rjelcyna). To su wosebite přidawki w tutej njewšědnej hodownej bajce. Zastupne lisćiki dóstanu zajimcy w SLA abo pola Chróšćanskeho časnikarja Jürgena Njeka.
Lětsa derje hospodarili
Dźěwin (AK/SN). Gmejna Dźěwin móže lěto 2017 financielnje stabilnje zakónčić. „Etat je so pozitiwnišo wuwił, hač smy sej to myslili“, komornica Carmen Perick na njedawnym posedźenju gmejnskeje rady podšmórny. „Gmejna ma dosć pjenjez, tak zo móžemy kredity wotpłaćić a njetrjebachmy přizwoleny kasowy kredit wužiwać.“
We wokrjesu 101 000 štomow
Budyšin (SN). Kaž je industrijne drustwo twarjenje-agrar-wobswět wuličiło, drje budźe w Budyskim wokrjesu na hodownych swjatych dnjach něhdźe 101 000 hodownych štomow w bydlenskich stwach a druhdźe stać. Lěsniske dźěłarnistwo z toho wuchadźa, zo sej něhdźe 70 procentow domjacnosćow k hodam štomik kupi. „Jědla pak njeje kaž jědla. Kupcy měli nimo napohlada na to dźiwać, hdźe a kak je štom narostł“, radźi Peter Schubert z lěsnistwa, a kupić sej domjacy produkt z ekopječatom.
Jenička póstowa filiala
Čorny Hodler (SN). W Čornohodlerskej kupnicy zaměstnjena póstowa filiala je we wobłuku partnerskeho zrěčenja z Němskim póstom jenička w Radworskej gmejnje. Prowizorisku filialu w Minakale su hižo w oktobru zawrěli.
Wo měšćanskim wohenju
Budyšin. Zahubna katastrofa w stawiznach Budyšina, měšćanski woheń lěta 1634, budźe tema přednoška jutře, wutoru, w 19 hodź. w Budyskim archiwnym zwjazku na Hrodowskej 12. Stawiznar Richard Fürtig porěči wo tym, kak so wulki woheń w měšćanskich chronikach wotbłyšćuje a kak wo nim rozprawjeja. Zastup je darmotny.
Na koncert a bjesadu
Berlin. 175. serbske blido w Berlinje wotměje so srjedu, 13. decembra. Zarjadowanje započnje so w 15 hodź. z wopytom koncerta w katedrali swj. Jadwigi. Z Hornjeje Łužicy pochadźacy tachantski organist Tomaš Žur hudźi na Klaisowych pišćelach kompozicije Bacha a Regera. Po koncerće podadźa so wšitcy na serbsku adwentnu bjesadu do hosćenca EINSTEIN KAFFEE na Friedrichowej 206.
Wustaja swoje wobrazy
Přednošuje wo reformaciji
Chrósćicy. Lěto reformacije k wopomnjeću jeje 500. róčnicy w Němskej drje je oficialnje nimo. Wostawaja pak zajimawe historiske slědźenja, dopóznaća a publikacije. K tym je mjez druhim přinošował za biskopstwo Drježdźany-Mišno z wosebitej knihu a za dwurěčnu Łužicu z kapitlom w knize „Pjeć lětstotkow – Serbja a reformacija“ dr. Jens Buliš. W Chróšćanskej putniskej hospodźe přednošuje wón jutře, 9. hodownika, w 19.45 hodź. wo poměrje Serbow k reformaciji a wo łužiskich historiskich wosebitosćach. Wšitcy zajimcy su přeprošeni.
Wustaja rasowu pjeriznu
Delnja Hórka. Towarstwo plahowarjow rasoweje pjerizny 1878 Budyšin a wokolina přewjedźe jutře a njedźelu wulku přehladku rasoweje pjerizny w Delnjohórčanskej sportowni. Sobotu wot 9 do 17 a njedźelu wot 9 do 16 hodź. budźe něhdźe 400 pjeritych skoćatow w najwšelakorišich rasach a barbach widźeć.
Na adwentne wiki
Rakecy. Na terenje bywšeho Rakečanskeho kubła wotměja so jutře, sobotu, wot 14 hodź. adwentne wiki. Wo kulturne wobrubjenje staraja so mjez druhim zakładna šula, pěstowarnja a žónski chór.
Šulerjo koncertuja
Worklecy. Serbska zakładna šula „Michał Hórnik“ přeprošuje wšitkich staršich, dźědow, wowki a dalšich zajimcow na tradicionalny adwentny koncert jutře, pjatk, we 18 hodź. do Worklečanskeje ćěłozwučowarnje. Z wjele lubosću a wosobinskim zasadźenjom su so šulerjo a wučerjo na tónle wjeršk w běhu šulskeho lěta přihotowali. Tuž so organizatorojo bohateho wopyta nadźijeja.
Za adwentničku so přizjewić
Chrósćicy. Lětuša adwentnička wuměnkarkow a wuměnkarjow Chróšćanskeje gmejny wotměje so štwórtk, 14. decembra w 15 hodź. w Chróšćanskej wjacezaměrowej hali. Při kofeju, wosušku a kulturnym programje wjesela so wjesnjanosta a jeho sobudźěłaćerjo na rjane zhromadne popołdnjo z rentnarjemi. Organizatoriskich přičin dla njech so zajimcy hač do 11. decembra na gmejnje (tel. 035796/96 210, email: ) přizjewja.
Planuja jězbu seniorow
