Zastupjerjow wulosować?
Budyšin. Na zjawnu diskusiju přeproša Budyski zwjazk SPD jutře, štwórtk, we 18.30 hodź. do hosćenca „Burghof“ pódla Serbskeho muzeja. Tam póńdźe wo prašenje, hač je wulosowanje ludowych zastupjerjow móžny srědk, wožiwić demokratiju w Budyšinje. Wšitcy su wutrobnje witani.
Na zajimawe popołdnjo
Njechorń. Župa „Jan Arnošt Smoler“ přewjedźe sobotu, 9. junija, wot 14 do 17 hodź. dźeń wotewrjenych duri w Domje Měrćina Nowaka-Njechorńskeho. Na to su čłonojo Domowinskich skupin, towarstwow a dalši zajimcy wutrobnje přeprošeni. Zdobom přeproša župa na pućowanje, kotrež započnje so w 14 hodź. při rowje Měrćina Nowaka w Hrodźišću. Wottam póńdu wobdźělnicy pěši do Njechornja. W domje poskića čitanja, zaběry za dźěći kaž tež kofej a tykanc. Transport z Budyšina do Njechornja je tohorunja móžny. Zajimcy njech so w regionalnym běrowje pod telefonowym čisłom 03591/ 550 211 přizjewja. Organizatorojo wjesela so na bjesadu a na zajimawe popołdnjo.
Na muzejowy swjedźeń
Njeswačidło. Mjeztym hižo 14. muzejowy swjedźeń wotměje so njedźelu, 27. meje, wot 13 hodź. na Njeswačanskim torhošću. Wo lóštnu zabawu postara so tam hudźbne ćěleso Morawscy wagabundźa. Tež woblubowane rjemjeslniske wiki zaso na Parkowej a na dwěmaj dworomaj přewjedu. Wětrowski klub oldtimerow so tohorunja předstaji. Dźěći zakładneje šule rejuja publikumej k wjeselu. Tež zumba a aerobic-poskićenja steja na programje. Dale budu wopytowarjo na cyrkwinu wěžu zalězć móc. W domizniskim muzeju a w hrodowym parku su wodźenja předwidźane. Wjesne towarstwo Přećeljo domizny a kultury wjeseli so na mnohich zajimowanych wopytowarjow.
Na zjawny přednošk
Budyšin. Wjacerěčnosć jako wužadanje a wobohaćenje je tema zjawneho přednoška w Budyskim Serbskim instituće štwórtk, 31. meje, w 14 hodź. Referować budźe prof. dr. Dieter Halwachs z Uniwersity Graz, a to wo aktualnej rěčno-kulturnej mnohotnosći w Grazu. Přednošk budźe němskorěčny.
Brigada dwójce koncertuje
Pytaja lajskich hrajerjow
Budyšin. Po tym zo je serbski publikum lětsa inscenaciju „Paradiz w dobrej stwě“ na hłownym jewišću NSLDź w swojej maćeršćinje widźał, chcedźa hru tež němskorěčnje předstajić a pytaja za to znowa lajskich hrajerjow w starobje wot 16 lět. Casting za to wotměje so wutoru, 5. junija, w 19 hodź. Zajimcy zetkaja so při jewišćowym zachodźe hłowneho domu NSLDź na Seminarskej 12.
Přewjedu kurs za psy
Wojerecy. Kak maja so psy we Wojerowskim zwěrjencu zadźeržeć a na čo maja jich wobsedźerjo při tym kedźbować, sposrědkuja w přichodnym kursu za psy, kotryž wotměje so sobotu, 26. meje. W dwuhodźinskim zarjadowanju wobdźělnikam rozkładu, kak jednotliwe zwěrjata na psy reaguja a kotre strachi móhli při wěstych družinach hrozyć. Tomu přizamknje so mały test. Hdyž pos jón wobsteji, dóstanje jeho wobsedźer darmotny lětny lisćik za swojeho štyrinohača. Přizjewjenja přijimuja pod telefonowym čisłom 03571/476 37 00.
Na swójbny dźeń
Na energijowu wěžu zalězć
Budyšin. We wobłuku wosebiteje wustajeńcy w Muzeju Budyšin wo tudyšich klempnarjach a instalaterach wotměje so jutře, štwórtk, w 17 hodź. wodźenje po energijowym centrumje na Thomasa Müntzerowej. Zajimcam předstaja tam techniske připrawy za produkciju miliny a ćopłoty a poskića jim móžnosć, zalězć na 35 metrow wysoku energijowu wěžu. Přizjewjenje trěbne njeje, zastup je darmotny. Zajimcy zetkaja so při zachodźe energijoweho centruma.
Wotewru wustajeńcu
Wojerecy. K 750. róčnicy Wojerec wotewru w tamnišej starej radnicy pjatk, 25. meje, w 13 hodź. wosebitu wustajeńcu z pohladnicami wo nowym měsće wot lěta 1957 do dźensnišeho. Přehladka budźe hač do kónca awgusta přistupna.
Wodowa wěža pod hamor
Wojerecy. Za wodowu wěžu při Wojerowskim dwórnišću pytaja noweho wobsedźerja. 4. junija chcedźa ju na awkciji w Drježdźanach přesadźować. Minimalna płaćizna, kotruž je Sakska ležownostna awkcija AG postajiła, wučinja 15 000 eurow. Wodowa wěža pochadźa z lěta 1907 a je kulturny pomnik. Přesadźowarjo wuraznje na to skedźbnjeja, zo je trjeba wěžu wobšěrnje ponowić. To bě hižo widźeć, jako bě wona w lěće 2011 posledni raz składnostnje wuměłstwoweje akcije zjawnje přistupna.
Rozmołwjeja so wo wuchodźe
Budyšin. We wobłuku tuchwilneje fotowustajeńcy wo žiwjenju w NDR wotměje so w Budyskim wopomnišću zajutřišim, štwórtk, w 19 hodź. podijowa rozmołwa. Přitomnaj budźetaj fotograf Harald Hauswald, kiž je w 1980tych lětach žiwjenje we wuchodnym Berlinje fotografował, a Stefan Wolle. Wón je teksty k wustajenym fotam spisał.
Wuhotuja drastowy bal
Ćisk. Swój sedmy drastowy bal přewjedźe Ćišćanska rejwanska skupina sobotu, 26. meje, w tamnišim hosćencu „Zeleny wěnc“. Přeprošene su mjez druhim wjacore drastowe a rejwanske skupiny z Hornjeje a Delnjeje Łužicy. Kóždažkuli narodna drasta, wšojedne z kotreho regiona, je wulce witana, njeje pak wuměnjenje za wobdźělenje. K rejam hraja Łužiscy dujerscy muzikanća z Wjelceje. Wot 18 hodź. maja wopytowarjo přistup na žurlu, bal započnje so w 19 hodź. z tradicionalnej polonezu. Zastup płaći pjeć eurow. Blida rezerwować dać móža sej zajimcy pola Gabriele Linakoweje pod telefonowym čisłom 03571/ 913 358.
Za měrliwy swět
Kamjenc. Zetkanje za měr a prawa ludow wotměje so wutoru, 22. meje, w Kamjencu. Na zarjadowanje we 18 hodź. na Šulskim naměsće přeproša zapósłanča Sakskeho krajneho sejma Marion Junge (Lěwica). Tema budźetej přiběraca wojerska wonkowna politika a njezamołwite wobchadźenje zwjazkoweho knježerstwa z prawom ludow. Organizatorka wobydlerjow Kamjenca namołwja, so aktiwnje za měrliwy swět zasadźeć a so na zarjadowanju wobdźělić.
Zahaja kupansku sezonu
Pytaja hrajerjow za film
Budyšin. Zo bychu Budyski wokrjes jako moderny region z tradiciju zwičnili, dźěła krajnoradny zarjad hromadźe z předewzaćom DD-V Media na imageowym filmje. Za projekt pytaja hišće hrajerjow wšěch starobnych skupin. Zwjetša jedna so wo róle bjez teksta. Wšitke róle měli přirodnje, swójbnje a awtentisce skutkować. Jednotliwe sceny nastanu wot kónca meje hač do spočatka julija na rozdźělnych městnach wokrjesa. Transport a zastaranje budźetej zaručenej. Hrajerjam płaća mały honorar. Někotre róle maja serbske temy zwobraznić. Tak pytaja žonu, kotraž zamóže jutrowne jejka debić, holcu, kotraž běžnje serbsce rěči, a muža, kiž ma křižerja předstajić, wón drje njetrjeba jěchać, měł pak z konjemi wobchadźeć móc. Zajimcy za róle njech přizjewja so z wobrazom e-mailnje pod adresu .
Přidatna móžnosć
Radźićeljo so zetkaja
Njebjelčicy. Wuwzaćnje wutoru, a to 15. meje, wotměje so přichodne posedźenje Njebjelčanskeje gmejnskeje rady, tónraz w Miłočanskim socialnym bydlenskim domje blisko tamnišeje žaby. Započatk budźe w 19.30 hodź. Na programje steji mjez druhim předstajenje planowanja wutwara hłowneje dróhi přez Miłoćicy. Dale chcedźa wólbny proces za Serbski sejm rozłožić.
Do srjedźowěka a baroka
Wojerecy. Historiski spektakl za cyłu swójbu lubi časowa jězba do srjedźowěka a baroka, na kotruž móža so zajimcy jutře a njedźelu na Wojerowskim hrodźe a w susodnym zwěrjencu podać. Při wjacorych stejnišćach předstaja historiske rjemjesła. Na łuce zwěrjenca demonstruja ryćerske boje, nimo toho zaklinči srjedźowěkowska live-hudźba. Na hrodźe wotwjedu wopytowarjow do wšědneho dnja baroka a pokazaja wotpowědne reje. Wopyt płaći za dorosćenych wosom, za dźěći pjeć a za swójby 14 eurow.
Blockbuster k dnjej maćerje
Porěči wo měšćanskim prawje
Budyšin. Heiner Lück, profesor za prawniske wědomosće uniwersity HalleWittenberg a čłon Sakskeje akademije wědomosćow, přednošuje jutře, wutoru, w 19 hodź. w Budyskej měšćanskej bibliotece wo symbolach měšćanskeho prawa a wo sudnistwje w měsće. W swojim přednošku zaběra so wón ze zapřijećom sudnistwa a wobswětla na jara žiwe a zabawne wašnje wuske zwiski mjez sudnistwom a městom. Zastup je darmotny. Zajimcy su wutrobnje witani.
Spominaja na wuswobodźenje
Wojerecy. Při wopomnišću we Wojerowskim nowym měsće wotměje so jutře, wutoru, w 13 hodź. zhromadne zarjadowanje města a Zwjazka antifašistow składnostnje dnja wuswobodźenja wot fašizma. Tam chcedźa na wopory wójny a antifašistiskeho spjećowanja spominać. „Zasadźujemy so za swět bjez wójny, rasizma, antisemitizma a neofašizma“, rěka w namołwje wyšeho měšćanosty Stefana Skory (CDU). Wobydlerjo njech so w bohatej ličbje na wopominanju wobdźěla.
Předstaja pisany program
Budyšin. Dźěćacy chór a instrumentalisća Budyskeho Serbskeho gymnazija přeprošuja wutrobnje na nalětni program sobotu, 5. meje, w 16 hodź. do awle gymnazija. Na wopytowarjow čaka pisany program tradicionelnych a načasnych spěwow, mjez druhim sep spěwow z pjera Jana Bulanka a instrumentalne přinoški, na přikład na serbskich husličkach. Cyłkowny nawod programa změje Bernadet Hencyna.
Na dźeń wotewrjenych duri
Budyšin. Z dnjom wotewrjenych duri kubłanskich a kulturnych zarjadnišćow zahaji Budyski wokrjes sobotu, 5. meje, swoje zarjadowanja k dźesaćlětnemu wobstaću wokrjesa w jeho dźensnišej formje. Wot 10 do 13 hodź. přeprošuja Kamjenski powołanski šulski centrum, Budyski powołanski šulski centrum za hospodarstwo a techniku, medijopedagogiski centrum a Budyska wokrjesna hudźbna šula na wopyt. W tym času móža sej zajimcy moderne wukubłanske wuměnjenja wobhladać. W Budyšinje budźe tohorunja móžno, z třěšneho sportnišća na město pohladać.
