Swójbny dźeń w parku
Mały Wjelkow (SN). Prěni króć kooperujetej sakski krajny zwjazk Čerwjeneho křiža (DRK) a Małowjelkowski prazwěrjenc. Jutře, 14. awgusta, wotměje so w parku sawrierow swójbny dźeń, za kotryž maja tójšto atrakcijow za dźěći přihotowane. Na přikład móža sej hólcy a holcy chorobny wóz DRK wobhladać.
Mnohich doma hladaja
Budyšin (SN). Kaž zamołwići wikowanskeje chorobneje kasy (KKH) Budyskeho wokrjesa zwěsćeja, su přistajeni hladanskich słužbow w nadawku KKH potrěbnych w minjenych měsacach zwjetša doma zastarali. 72 procentow z wjace hač 56 000 hladanja potrěbnych su wukubłane sotry doma zastarali. Při tym leži domjace hladanje po zdźělenju Zwjazkoweho statistiskeho zarjada po dwěmaj třećinomaj w rukach přiwuznych, tamny dźěl zaručeja – zdźěla kompletnje – ambulantne słužby.
Specielne čaporowe wiki
Nowej wustajeńcy
Rěčicy (SN). Na Rěčičanskim Erlichtec dworje móža sej zajimcy tuchwilu dwě wustajeńcy wobhladać. W kolesowarskej bróžni rozprawjeja wo změnje klimy w čěskej namjeznej kónčinje a pokazuja na jeje wuskutki. Při rustikalnych dubowych plastikach za přirodowej a turistiskej informaciju pak informuja hosći rozmołwne protokole Rěčičanskich wobydlerjow wo něhdyšim ćežkim dźěle w škleńčerni, w zawodźe za wohnjoškitne maćizny kaž tež w hórnistwje. Tež trajna wustajeńca wo ratarskim žiwjenju a ekspozicija wo wjelkach stej wopytahódnej.
Lětnje kino woblubowane
Budyšin (SN). Derje wopytane běchu dotal lětnje kinowe předstajenja Budyskeho Kamjentneho domu. Přeco srjedu kino pod hołym njebjom Při Sprjewinym wobłuku tež přichodne tydźenje ludźi přeproša. Dźensa w 21 hodź. pokazaja tam na wulkej płachće thriller „The Imitation Game“. Tež ćělne derjeměće je na kóždym předstajenju zawěsćene.
Wobornicy w chorowni byli
Wojerecy (SN). Něhdźe 40 dźěći a młodostnych sakskich młodźinskich wohnjowych woborow z Drježdźan, Sepic, Bórka, Bjedrichec/Łaza je we wobłuku projektoweho campa minjenu sobotu Wojerowski klinikum łužiskeje jězoriny wopytało. Zaměr zarjadowanja bě, dorosćacych wo cyłkownym wuchowanskim rjećazu – započejo z alarmowanjom centrale hač k nuzowemu přijimanju – informować a jim wotběh rozkłasć. Mjez druhim móžachu sej hólcy a holcy helikopterowe přizemišćo a wuchowanske jězdźidła wobhladać.
Jězdźenki so podróša
Kamjenc (SN). Wot 1. nowembra budu jězdźenki VVO, wobchadneho zwjazka Hornje Łobjo, za busy a ćahi tež w Kamjencu wo 1,4 procenty dróše. Stagněrowacych přiražkow a stupacych kóštow dla je trjeba tarify přiměrić.
Z kolesom po puću
Kamjenc (SN). Tradicionelnje chcetaj zapósłancaj Sakskeho krajneho sejma Marko Šiman a Alojs Mikławšk (wobaj CDU) na lětnjej turje firmy a towarstwa w swojimaj wólbnymaj wokrjesomaj w Kamjencu a Budyšinje wopytać. 17. awgusta budźetaj wonaj popołdnju w dwurěčnych gmejnach zarjadniskeho zwjazka Při Klóšterskej wodźe po puću.
Wodźenja po hrodźe skazać
Huska (SN). Prawidłownje přewjeduja w Husce wodźenja po hrodźe, štož je hižo mjez mnohimi zajimcami, tež z Drježdźan, wulki wothłós žnjało. Wažne pak je, zo maja so hrodowe wodźenja znajmjeńša tydźenjej do termina knihować a zapłaćić. Wot apryla do oktobra je přeco prěni štwórtk w 16.30 hodź. zjawne wodźenje za jednotliwcow a skupiny hač do 20 ludźi. Pod telefonowym čisłom 035930/55 2 27 skazanki přijimuja.
Přitulny wječor na wěži
Budyšin (SN). Wěžerka Budyskeje Bohateje wěže wjeseli so na hosći, kotřiž chcedźa z njej 8. awgusta, w 20 hodź. wysoko nad sprjewinym městom přitulny wječor dožiwić. Lisćiki za to poskićeja w měšćanskej turistiskej informaciji.
Prózdninska dźěćaca atrakcija
Mały Wjelkow (SN). Hubicy a wodobule na so mjetać móža dźěći w Małowjelkowskim prazwěrjencu nětkole w prózdninach wšědnje w 12 a 15 hodź.
Kofejownja woblubowana
Mały Wjelkow (SN). Wotsrjedź julija wotwěra Małowjelkowska sotrownja kóždu njedźelu wot 14 hodź. tak mjenowanu lětnju kofejownju. Nimo słódneje swačiny z kofejom a tykancom poskićeja tam hosćom tež hudźbne delikatesy. Tuž je lětnja kofejownja jara woblubowana. Přichodnu njedźelu přeproša wobhospodarjer sotrownje Mike Salomon wopytowarjow na „hudźbu na štyrjoch kolesach“ – na powětroćišćowy orchester.
Party z DJjom Romanom
Jitro (SN). Romano Meinert je dobyćer wubědźowanja Sputnik DJ-Battle 2015. Jeho móža lubowarjo elektroniskich zynkow jutře, pjatk, wot 22 hodź. w Jitru pola Wóslinka dožiwić. Tam organizuje mjez druhim wjesna młodźina party.
K łukam kolesować
Kino pod hołym njebjom
Budyšin (SN). Lětnje kino Budyskeho Kamjentneho domu wotměje so w awgusće přeco srjedu wot 21 hodź. w přemysłowym parku Při Sprjewinym wobłuku.
Lěkowanišćo pod lupu stało
Bórkowy (SN). Pruwowanski stres knježeše tele dny w błótowskich Bórkowach, najwjetšej gmejnje Němskeje. „Statnje připóznate městno za lěkowanje ludźi z hojenskimi žórłami“ chce a dyrbi po dźesać lětach swój status zakitować. 23. julija wotmě so k tomu wizitacija krajneho fachoweho wobłuka za lěkowansko-wočerstwjenske městna w Braniborskej. Jědnaće čłonow wopřijaca přirada poda so do Bórkowow, zo by tam wšitko dakładnje pod lupu brała. Kónc oktobra so rozsudźi, hač smě gmejna status lěkowanišća wobchować.
Ptači porik ma zaso dorost
Wojerecy (SN). We Wojerowskim zwěrjencu je wčera porik ptačkow z mjenom sunda orienthorn třeći raz dorost dóstał. Hižo w aprylu běštej sej ptačkaj sydansku prózdnjeńcu twariłoj a wot toho časa njebě žónka za wopytowarjow hižo widźeć. Wot lěta 2007 je porik tule žiwy.
Maja wokołopuće na so brać
Nowe hrajkanišćo přepodate
Budyšin (SN). Twarski měšćanosta Peter Hesse a financny měšćanosta Budyšina Michael Böhmer (wobaj CDU) zašły pjatk na Flincowej nowe hrajkanišćo přepodałoj. Na něhdźe 800 kwadratnych metrach maja dźěći nětko tež krosnowansku připrawu. Płaćiło je hrajkanišćo něhdźe 115 000 eurow.
Drježdźansku dróhu dale twarja
Budyšin (SN). Hišće tutón tydźeń maja wšelake twarske firmy na Drježdźanskej dróze w Budyšinje ceptar přewzać. Na cyłkownje štyrjoch wotrězkach chcedźa twarscy dźěłaćerjo wšelake syće do zemje kłasć kaž tež přijězdy a busowe zastanišća wobnowić. Nimo toho pokryja dróhu z nowej worštu. Tute naprawy pak njejsu bjez wobmjezowanjow wobchada zwoprawdźomne.
Do šulow inwestować
Za wokna a durje z drjewa
Kulow (AK/SN). Kulow swoje postajenja k wuhotowanju domow při twarskich naprawach precizuje. Tole je měšćanska rada njedawno wobzamknyła. Jednohłósnje wuprajichu so radźićeljo za to, wuhotowanske wustawki z lěta 2005 dale precizować. Woni reagowachu na njedorozumjenja, ke kotrymž bě w zašłosći mjez někotrymi twarskimi knjezami a měšćanskim zarjadnistwom dóšło. Wokna a durje domow při zjawnych dróhach a fasady blisko naměstow maja přewažnje z drjewa zhotowjene być. Alternatiwnje k drjewu hodźa so tež wokna z kumštnej maćiznu, kotraž kaž drjewo wupada, zatwarić.
Knižny bus ma přestawku
Budyšin (SN). Jězbna knihownja Budyskeje měšćanskeje biblioteki, znaty knižny bus, ma hač do 31. julija lětnju přestawku. 3. awgusta startuje jězbna knihownja do noweje sezony z krajnej čaru. Wotpowědnje planej zastawa bus na znatych stacijach w měsće a na wsach, zo by zajimcam najwšelakoriše medije wot knihi přez DVD hač k digitalnej hrě k wupožčenju poskićił.
Archiw zawrjeny
Tafli dwurěčnje popisanej
Wojerecy (SN). Na woběmaj stronomaj statneje dróhi S 108 stejitej nětko w němskej a serbskej rěčnej popisanej tafli na wotbóčce k zapadnemu přibrjohej Šibojskeho jězora. 30. apryla bě Wojerowski wyši měšćanosta Stefan Skora (CDU) nowu čaru k jězorej přepodał.
Lutz Mörbe derje wobstał
Wulka Dubrawa (HN/SN). Swoje prěnje posedźenje w techniskim wuběrku Wulkodubrawskeje gmejny je nowy wjesnjanosta Lutz Mörbe (njestronjan) suwerenje zmištrował. Problem ma komuna z alejemi mjez Kupojom-Komorowom a Lichanjom-Komorowom. Tam maja so schorjene kastanije a krušwiny na aleji do Lichanja podrězać.
Čornje jězdźić budźe dróše
Budyšin (SN). Štóž budźe wot 1. awgusta z busom a ćahom bjez płaćiweho lisćika po puću, dyrbi 60 eurow pokuty za to płaćić. Na to su so wšitke wobchadne zwjazki Sakskeje dojednali.
Za dźěłarničku so přizjewić
Wojerecy. Dźěći a młodostni w starobje wosom do 16 lět móža so hišće za cirkusowu a warjetejowu dźěłarničku wot 17. do 21. awgusta na Wojerowskej dźěćacej a młodźinskej farmje přizjewić. Stajnje wot 9 do 16 hodź. móža tam wobdźělnicy potom do swěta cirkusa a warjeteja ponuchać a swoje kmanosće kreatiwnje zapřijeć. K zakónčenju prezentuja swój program staršim a přećelam. Přizjewjenja přijimuje farma pod telefonowym čisłom 03571/ 979 164.
Poskića šulersku protyku
Kamjenc. Darmotnu šulersku protyku Sakskeho krajneho sejma za šulske lěto 2015/2016 dóstanu zajimcy nětko zaso w Kamjenskim běrowje zapósłanca Sakskeho krajneho sejma Alojsa Mikławška (CDU) na Zapadnej čo. 4. Nimo poskitka šulerskich zarjadowanjow a nimo informacijow wo sakskim parlamenće maja šulerjo w protyce dosć městna za wosobinske zapiski. Wot póndźele, 20. julija, hač do 4. awgusta wostanje běrow Alojsa Mikławška dowola dla zawrjeny. Wot 5. awgusta budźe wón zaso wot 8 do 16 hodź. za wšitke naležnosće wobydlerjow přistupny. Tež protyku móža sej tam zajimcy potom wotewzać.
