Přeprošeja na ptači kwas
Malešecy. Dźěći Malešanskeje Witaj-pěstowarnje „K wódnemu mužej“ přeprošeja wšitkich zajimcow na swój ptačokwasny program. Tón předstaja braška, kwasny por a wšitke dalše dźěći njedźelu, 26. januara, wot 15 hodź. w Malešanskim hosćencu „Wódny muž“, hdźež tohorunja kofej a tykanc poskića. W 14.30 hodź. poda so kwasny ćah z pěstowarnje do hosćenca.
Narodki hišće raz widźeć
Njeswačidło. Wulkeho wothłosa dla je so wjesne kulturne a domizniske towarstwo rozsudźiło wustajeńcu božich narodkow w Njeswačanskim domizniskim muzeju přidatnje hišće njedźelu, 26. januara, wot 13 do 17 hodź. wotewrěć. Potom móža zajimcy tež parnicy wobdźiwać, kak dźěłaja. Domizniski muzej změje wot 27. januara hač do 21. měrca zymsku přestawku. Jeli pak ma skupina zajim muzej wopytać, je telefoniske naprašowanje pod 035933/ 30 179 móžne.
Seniorojo škotuja
Lejno. Přichodny serbski seniorski škot budźe wutoru, 28. januara, wot 14 hodź. w Lejnjanskim Kubicec hosćencu. Wšitcy swěrni kartyplacarjo njech znowa přijědu. Tež nowačcy su lubje witani, zdźěli Měrćin Nowak, kiž nětko tele měsačne zetkanja organizuje.
Přepodadźa dwórnišćo
Budyšin. Po nimale lětomaj twarskeho časa chcedźa pjatk, 24. januara, přetwarjene Budyske dwórnišćo za wužiwanje přepodać. Oficialne zarjadowanje za prošenych hosći započnje so w 11 hodź. Wot 13 do 16 hodź. změja wobydlerjo składnosć, sej twarjenje wobhladać. Dohromady je tam něhdźe110 běrowow nastało a nimo toho rumnosće za wuradźowanja a techniku. Najwjetši dźěl stwow budu sobudźěłaćerjo Budyskeho krajnoradneho zarjada wužiwać.
Muzej prezentuje nowostce
Budyšin. Składnostnje 150. róčnicy załoženja Muzeja Budyšin wudachu tam nětko dwě publikaciji, kotrejž prezentuja jutře, štwórtk, w 11 hodź. zjawnosći. W spisu „Muzej Budyšin. Dohlady“ dźe předewšěm wo stawizny domu. Při tym steja přerjadowanja zběrkow kaž tež něhdźe sto wobrazow wubranych eksponatow w srjedźišću. Tamna nowostka wěnuje so bratromaj Ottej a Eduardej Weigang, kotrajž běštaj jako předewzaćelej kónc 19./spočatk 20. lětstotka hospodarski, twarski a kulturny rozmach Budyšina hłownje sobu postajałoj.
Ptačokwasny program za dźěći
Kamjenc. Serbski ludowy ansambl přeproša wšitke dźěći a dalšich zajimcow na swoje premjerne předstajenje „Zabyty ptači kwas“. Prěnjej razaj pokazaja jón jutře, srjedu, 22. januara, we 8.30 a w 10.30 hodź. na žurli Kamjenskeho hotela „Město Drježdźany“. Dalše předstajenje budźe pjatk, 24. januara, w 10 hodź. w Lubijskej wikowej hali.
Wo stawiznach hwězdnow
Budyšin. Štó je hwězdno Wulki wóz pomjenował? Wotmołwy na tajke a dalše prašenja wokoło hwězdow a njebja dóstanu młodźi hobbyjowi astronomojo jutře, srjedu, w Budyskej šulskej hwězdarni. Wot 19 hodź. wěnuja so tam wosebitosćam a stawiznam hwězdnow, kotrež su tuchwilu na zymskim njebju widźeć. Zastup płaći na wosobu tři eura, potuńšene dwaj euraj. Zajimcy njech so prošu pod tel. čo. 03591/ 7 60 71 26 abo z mejlku pod přizjewja. Dalše informacije pod www.sternwarte-bautzen.de
Z policistom so rozmołwjeć
Stawiznički něhdy a dźensa
Šula wotewrje swoje durje
Kulow. Wyša šula „Korla Awgust Kocor“ Kulow přeproša jutře, 18. januara, na dźeń wotewrjenych duri. Hižo w 10 hodź. witaja zajimowanych staršich a jich dźěći w ćěłozwučowarni, hdźež předstaja so mjez druhim chór, skupina šule ze sportowymi aktiwitami a šulska póstniska garda. Přitomni budu tež lětuši šulski princowski por a rejwanska skupina. Potom je přiležnosć so po šuli a fachowych kabinetach rozhladować a so z wučerjemi a šulerjemi rozmołwjeć. Změja tež tykancowy bazar. Wosebje witani su zajimcy za wučbu serbšćiny.
Koncert z hudźbu Chopina
Smochćicy. Dom biskopa Bena w Smochćicach přeproša dźensa w 19.30 hodź. na koncert. We wobłuku Smochčanskeho jewišća zaklinča kompozicije za klawěr a spěwy z pjera Fryderyka Chopina (1818–1849). Solistce wječora stej Birgit Polter na klawěrje a sopranistka Katharina Scheliga. Wuměłči dopominatej z programom „Spěw Fryderyka Chopina“ na najsławnišeho pólskeho komponista. W srjedźišću koncerta steji mjez druhim jeho w Drježdźanach komponowany walčik As-Dur op. 69 čo. 1.
Unikaty sej kupić
Lipjenjo přeprošeja na koncert
Chrósćicy. Wot dźensnišeho předawa Chróšćanski časnikar Njek zastupne lisćiki za koncert chóra Lipa sobotu, 8. februara, w Haslowje. Je to mjeztym třeći tak mjenowany Lipa@přećeljo-koncert. Spěwarjo zanjesu wjacehłósne sadźby ze swojeho serbskeho šlagroweho a popoweho repertoira. Wjacorych Lipjanow dožiwiće jako solistow z přewodom instrumentalneje skupiny. Nimo toho změja spěwarjo hudźbne žorćiki spřihotowane. Jako swojich „přećelow“ su sej Lipjenjo tónkróć přeprosyli jazzowu skupinu NIMO, kotraž je mnohim z folklorneho festiwala znata. Wo dobru naladu po koncerće postara so skupina Con-takt, kotraž zahudźi k rejam.
Wo knize diskutować
25lětne stawizny sćěhować
Wojerecy. Lětuši prěni wjeršk Wojerowskeho Léona Foucaultoweho gymnazija budźe 17. januara wot 16 do 19 hodź. wotměwacy so dźeń wotewrjenych duri. Pod hesłom „Wotkryća“ předstaja tam wučerjo a šulerjo wuměłske, rěčne, přirodowědne a towaršnowědne fachowe wobłuki. Předewšěm pak prezentuja sportowy wobłuk. Zdobom zaběraja so z temu „Wot šulskeje knihi k iPadej“.
Přednošk wo mjeńšinach Budyšin. Prof. PhDr. Leoš Šatava z Karloweje university Praha přednošuje na temu „Noworěčnicy w konteksće mjeńšinowych rěčow a rewitalizaciskich hibanjow. Wón zaběra so z wosobami, kotrež su rěč na hinaše wašnje nawuknyli hač „maćernorěčni“. Tónle fenomen je dźensa w zwisku z prócowanjemi wo přetraće a wožiwjenje mjeńšinowych rěčow wosebje aktualny. Serbskorěčny zjawny přednošk budźe štwórtk, 16. januara, w sydarni Serbskeho instituta w Budyšinje.
Załoža towarstwo
Worklecy. Na Worklečanskej Serbskej wyšej šuli „Michał Hórnik“ chcedźa spěchowanske towarstwo wutworić. Jutře, srjedu, 15. januara, přewjedu tam załožensku zhromadźiznu za nowu iniciatiwu. Zetkanje zahaja w 19 hodź. na tamnišej šuli. Wšitcy zajimcy, tež zwonka Worklečanskeje gmejny pochadźacy, bydlacy a skutkowacy su na zhromadźiznu wutrobnje přeprošeni.
Za turněr so přizjewić
Worklecy. Zapósłanc Sakskeho krajneho sejma Alojs Mikławšk (CDU) přeproša zhromadnje z Budyskej młodej uniju wšitkich zajimcow z bywšeho wokrjesa Kamjenc na 10. halowy koparski turněr za wólnočasne a młodźinske mustwa. Wotměć ma so tón sobotu, 1. februara, wot 10.30 do 16.30 hodź. we Worklečanskej sportowni. Hrate budźe w zestawje 1:3. Zajimowane cyłki móža so hišće hač do jutřišeho, 15. januara, telefonisce pod 03578/30 53 83 abo e-mailnje pod přizjewić.
Budyske nalěćo sobu swjećić
Bratrowstwo po puću
Chrósćicy. Po přewšo wuspěšnej premjerje noweje žortneje hry „Namrěwstwa dla zawrjene“ a po dalšim předstajenju w Sulšečanskim kulturnym domje předstaji dźiwadłowa skupina Kulowskeho Bratrowstwa komediju njedźelu, 12. januara, w 17 hodź. na Krawčikec žurli w Chrósćicach a njedźelu, 26. januara, w 17 hodź. w Šunowje. Žortnu hru Günthera Philipa w třoch jednanjach je Benjamin Hrjehor přełožił, režiju ma dźiwadźelnik NSLDź Měrko Brankačk.
Dny wotewrjenych duri
Ralbicy. Serbska wyša šula w Ralbicach prezentuje so wšitkim zajimcam z dnjom wotewrjenych duri, a to wutoru, 14. januara. Dopołdnja wobhladaja sej kubłanišćo hižo wuknjacy z wokolnych zakładnych šulow. Woni maja składnosć šulu a techniski centrum wopytać a wšelake poskitki wužiwać. Wot 17 hodź. su potom wšitcy dalši zajimcy přeprošeni. Staršim nowačkow přichodneho 5. lětnika poskića we 18 hodź. wosebite informaciske zarjadowanje.
Dźeń wotewrjenych duri na Wojerowskim Léona Foucaultowym gymnaziju přewjedu pjatk, 17. januara, wot 16 hodź. Samsny dźeń wot 17 hodź. budźe tež na Radworskej wyšej šuli dźeń wotewrjenych duri.
