Radźićeljo so zetkaja
Ralbicy. Z namjetom financowanja nowotwara pěstowarnje w Ralbicach zaběraja so čłonojo gmejnskeje rady Ralbicy-Róžant na swojim zjawnym posedźenju jutře, štwórtk, we 18.30 hodź. w Ralbičanskej sportowni. Dale póńdźe wo njeplanowane wudawki za planowanje noweje pěstowarnje. Na dnjowym porjedźe steji nimo toho wobzamknjenje k wozjewjenskim taflam gmejny. Wopytowarjo maja na posedźenju nahubnik wužiwać.
Nowa nadróžna mištrownja
Kinspork. Wot přichodneho tydźenja so struktura nadróžnych mištrownjow w Budyskim wokrjesu změni. Po přepruwowanju dotalnych šěsć mištrownjow na hospodarskosć a potrjebu inwesticijow zwěsćichu, zo měli mištrowni Kamjenc a Wachau hromadźe połožić a na nowym městnje w Kinsporku koncentrować. Tam budu wšitke trěbne rumnosće w jednym twarjenju. Přichodny tydźeń srjedu nowu nadróžnu mištrownju w Kinsporku přepodadźa.
Předstaja nowu knihu
Budyšin. „Swjate su mi twoje hona“ rěka kniha Christiana Kessnera, kotruž předstaja awtor štwórtk, 29. oktobra, w 19 hodź. w Budyskej Smolerjec kniharni. W knize spyta awtor wotmołwić na prašenje, što docyła to typiske serbske je, hdyž hladaš na to z duchownodušinych korjenjow. Tutón wječor budźe składnosć, so z awtorom wo tymle prašenju rozmołwjeć. Zajimcy su wutrobnje přeprošeni, maja so pak do toho w Smolerjec kniharni přizjewić.
Maja přidatny poskitk
Chrósćicy. W Chróšćanskej pěstowarni, kotraž je w nošerstwje SŠT, budu starši swoje dźěći wot přichodneho lěta tež 7,5 hodźin wob dźeń hladać dać móc. Tole je Chróšćanska gmejnska rada na swojim zašłym posedźenju jednohłósnje wobzamknyła. Dotal je to 4,5 hodźin, šěsć a dźewjeć hodźin móžno. Z nowym poskitkom wotpowěduja mjez druhim potrjebam maćerjow, kotrež 30 hodźin wob tydźeń dźěłaja a kotrymž je wšědne šěsćhodźinske zastaranje dźěći překrótke, dźewjećhodźinske pak předołhe. Płaćizna za nowy čas wotpowěduje procentualnje tamnym časam. Staršiski přinošk so potajkim njezwyši a je w Chrósćicach hižo pjeć lět konstantny.
Škotowy turněr wotprajeny
Radwor. Za jutře, 27. oktobra planowany škotowy turněr serbskich seniorow w Radworskej „Zelenej hałžce“ dyrbi koronoweje pandemije dla wupadnyć. Kaž hłowny organizator Měrćin Nowak zdźěli, wón nowy termin sčasom wozjewi.
Prózdninski program njebudźe
Budyšin. Koronowa pandemija wuskutkuje so nětko tež na prózdninski program, kiž mějachu w tymle tydźenju w Budyskim Serbskim muzeju planowany. Kaž muzej zdźěli, so předwidźanej dźěłarničce jutře, wutoru, a štwórtk njewotmějetej. Muzej pak wostanje dale wšědnje wot 10 do 18 hodź. přistupny.
Předstaja nowu knihu
Budyšin. „Swjate su mi twoje hona“ rěka kniha Christiana Kessnera, kotruž předstaja štwórtk, 29. oktobra, w 19 hodź. w Budyskej Smolerjec kniharni. W knize spyta awtor wotmołwić na prašenje, što docyła je to typiske serbske, hdyž hladaš na to z duchowno-dušinych korjenjow. Tutón wječor budźe składnosć, so z awtorom wo tymle prašenju rozmołwjeć. Zajimcy su wutrobnje přeprošeni, maja pak so do toho w Smolerjec kniharni přizjewić.
Žane wopyty w chorownjomaj
„Horce plincy“ dwójce
Haslow. Swoju najnowšu inscenaciju „Horce plincy“ pokaza Němsko-Serbske ludowe dźiwadło přichodny kónc tydźenja hnydom dwójce w Haslowje. Sobotu, 24. oktobra, móža sej zajimcy komediju wot 19.30 hodź. wobhladać. Njedźelu, 25. oktobra, poskićuja Bizoldecy wot 15.30 hodź. słódne plincy a kofej. Wot 17 hodź. sydaja „Horce plincy“ potom na jewišću. Wšitcy su wutrobnje witani.
Kompjuter za čas NDR
Wojerecy. Z kompjuterowej techniku za čas NDR zaběra so nowa wosebita wustajeńca, kotraž je nětko we Wojerowskim kompjuterowym muzeju ZCOM na Bonhoefferowej widźeć. Přehladka wobswětla wuwiće kompjutera w NDR wot spočatkow w 1950tych lětach přez wuwiće megabitoweho chipa w 1980tych lětach hač do kónca NDR. Mjez druhim wěnuja so tež róli statneje bjezstrašnosće a wliwej socialistiskeho statoweho zjednoćenstwa. Přehladka je hač do kónca nowembra widźeć a wot wutory hač do njedźele stajnje wot 10 do 17 hodź. přistupna.
Terapija na zahrodźe
Smochćicy. „Hojace zahrody – zawod do zahrodoweje terapije“ je tema seminara, kotryž wuhotuje Smochčanske kubłanišćo swj. Bena pjatk, 6. nowembra. Terapeutka Marlit Bromm wobdźělnikam rozłoži, kak flora, fawna, kamjenje a zemja ćělne, duchowne kaž tež socialne kmanosće wobwliwuja. Poskitk měri so na priwatne wosoby, terapeutow a socialne zarjadnišća. Wobdźělenje płaći 25 eurow na wosobu. Zajimcy njech přizjewja so hač do 23. oktobra pod telefonowym čisłom 035935/ 220.
Přednošuje wo Krabaće
Budyšin. We wobłuku tuchwilneje wustajeńcy z mólbami, rysowankami a skulpturami wuměłca Jörga Tauscha w Budyskej Serbskej kulturnej informaciji dožiwja tam zajimcy jutře, štwórtk, w 17 hodź. zajimawy přednošk. Genealoga Hans-Jürgen Schröter porěči wo temje „Magiski a tola cyle čłowjeski – Štó bě Krabat“. Přednošk je w němskej rěči. Hygieniske postajenja maja so dodźeržeć.
Maćična akademija njebudźe
Budyšin. Dale trajaceje pandemije dla dyrbja so přichodne přednoški Maćičneje akademije, kiž bychu so wot nowembra hač do měrca w Budyskim hosćencu „Wjelbik“ wotměli, nažel wotprajić. To zdźěli w mjenje stawizniskeje sekcije Maćicy Serbskeje Trudla Malinkowa. Po normalizowanju wobstejnosćow chcedźa zarjadowanja nachwatać. Terminy sčasom zdźěla.
Čita z twórbow Domaški
Budyšin. Jedyn z najwuznamnišich ludowych powědarjow do Prěnjeje swětowej wójny kaž tež mjez wójnomaj, Romuald Domaška (1869–1945), steji w srjedźišću zabawneho wječora srjedu, 21. oktobra, w 19.30 hodź. w Budyskim Dźiwadle na hrodźe. K 75. posmjertninam wěnuja jemu hudźbno-literarny wječor w rjedźe „Zynki a linki“. Dźiwadźelnik Jurij Šiman čita ze zběrki Domaški „Wokoło stareho młyna“. Hudźbnicy SLA čitanje přewodźeja. Wšitcy zajimcy su wutrobnje přeprošeni
Pytaja požčonki
W „Putinowej korčmje“
Zaručeja pitnu wodu
Łaz (AK/SN). Hłowny wodowód při bywšej Šibojskej brunicowej jamje podłu wokrjesneje dróhi K 9218 chce gmejna Łaz přepołožić dać. To je předwčerawšim tamniša gmejnska rada wobzamknyła a wotpowědny nadawk twarskej firmje přepodała. Hižo njetrěbnej klumpowej domčkaj při dźensnišim jězoru za to spotorhaja. K tomu słušacy wodowód wobsteji z asbestoweho cementa a móhł so při torhanju domčkow skóncować. Zo pak bychu zastaranje Łazowskeje gmejny z pitnej wodu dale zaručili, chcedźa do toho wodowód přepołožić a jón z nowym narunać.
Kisykał dźěłać kaž něhdy
Tři Žony. Kaž za čas swojich dźědow a wowkow móža zajimcy sobotu, 17. oktobra, w Třižonjanskej kulturnej bróžni kisykał dźěłać. Na to přeprosy tamniše towarstwo Lebensart zajutřišim w času wot 10 do 14 hodź. Štóž chce so tam wobdźělić, njech so pod telefonowym čisłom 035724/ 50 915 přizjewi. Wobdźělnicy měli sej wotpowědne hlinjane sudobjo za kał sobu přinjesć.
