Wjetše mnóstwo štomow je minjene dny Grodkowska lěsnistwowa firma podłu statneje dróhi S 108 mjez Wojerecami a Roholnjom podrězała. Tu budźe posledni čwak kolesowanskeho puća wot Wojerec hač k Šibojskemu jězorej twarjeny. Tuchwilny puć kónči na Kinajchtskim přemysłownišću. Foto: Gernot Menzel

Za dwě lěće dróhu twarić započeć

pjatk, 28. februara 2020 spisane wot:

Njebjelčicy (JK/SN). Hižo na minjenym posedźenju Njebjelčanskeje gmejnskeje rady trjebachu jeje čłonojo a hosćo dobru kondiciju. Podobnje bě to wčera, jako słyšachu hnydom wjacore přednoški, kotrež so ležownosćam a žiwjenskim wuměnjenjam do přichoda wěnowachu. Referentka wokrjesneje ludoweje uniwersity dr. Sandra Hübner-Richter předstaji radźićelam a mnohim hosćom nowy slěd zarjadowanjow, kotrež su dźěl zhromadneho projekta z gmejnu wo temje „Zhromadnje na wsy – myslić, wuknyć, wuwić, činić“. Zaměr projekta, kotryž je komuna hromadźe z ludowej uniwersitu přez tři lěta přihotowała, je wjesnjanow wšitkich wsow gmejny za jeje přichod sensibilizować.

Planuja dróhotwarske projekty

pjatk, 28. februara 2020 spisane wot:

Gmejnska rada lisćinu naprawow wobzamknyła

Łaz (AK/SN). Wjacore komunalne puće chce gmejna Łaz lětsa sporjedźeć a ponowić, kaž je gmejnska rada wutoru wobzamknyła. Móžno je to z pawšalnym spěchowanjom sakskeho ministerstwa za hospodarstwo a dźěło za dróho- a mostytwar. Za to liča z něhdźe 180 000 eurami spěchowanskich srědkow. Runje telko běchu hižo loni dóstali. To wučinja 90 procentow cyłkownych wudawkow. Dźesać procentow dyrbi komuna sama zwjesć, štož je něhdźe 20 000 eurow. Tale suma je w lětušim hospodarskim planje Łazowskeje gmejny zaručena.

Nowe puće za błudźišćo

pjatk, 28. februara 2020 spisane wot:

Mały Wjelkow (SN/MWj). K zahajenju noweje sezony w Małowjelkowskim błudźišću poda jeho załožerka Regina Frenzel na zasłuženy předwuměnk. Před něšto­ dnjemi su ležownosć do wobsydstwa Budyskeje wobdźělenskeje a wobhospodarjenskeje towaršnosće (BBB) přenjesli, zdźěli jeje zamołwita za zjawnostne dźěło Diana Liebsch. „Mi bě wažne błudźišćo do rukow dać, kotrejž projekt runje tak profesionelnje a z lubosću wobhospodaritej, kaž sym ja to činiła“, praji Regina Frenzel.

Z BBB su nětko partnera namakali, kiž ma we wólnočasnej branši dobre nazhonjenja. Wšako měšćanske předewzaće tež hižo Małowjelkowski prazwěrjenc w susodstwje błudźišća wobhospodarja. Kaž jednaćel BBB Volker Bartko rjekny, chcedźa přichodne tydźenje koncept zdźěłać, kak móhli ležownosć błudźišća do pra­zwěrjenca zapřijeć. Prjedy hač tak daloko budźe, pak błudźišćo po zwučenym wašnju wot nalěća zaso wopytowarjow wita.

Krótkopowěsće (28.02.20)

pjatk, 28. februara 2020 spisane wot:

Dale mjenje bjezdźěłnych

Budyšin. Ličba bjezdźěłnych we wobłuku Budyskeje agentury za dźěło je w februaru dale spadowała. Kaž jeje jednaćelka Ilona Winge-Paul dźensa dopoł­dnja zdźěli, bě mały róžk z cyłkownje 17 996 ludźimi 415 mjenje bjez dźěła hač w januaru. Jako přičinu mje­nu­je wona tuchwilne chětro miłe wjedro. Bjezdźěłnostna kwota zniži so tuž wo 0,2 dypkaj na 6,4 procenty.

Wustajeńca wo starym nałožku

Janšojce. Wosebita wustajeńca „Ak słyńco górjej stupašo – 10 lět jutrowne spěwanje w Janšojcach“ je wotnětka přistupna. W Janšojskim Serbsko-němskim domizniskim muzeju pokazuja wobra­zowu přehladku, wobswětlacu stawizny stareho, dołho zhubjeneho nałožka. Před dźesać lětami bě jón skupina aktiwistkow wozrodźiła.

Naměsto ma nowe mjeno

Policija (28.02.20)

pjatk, 28. februara 2020 spisane wot:

Rentnarku wobkradnyli

Wojerecy. Wjacori njeznaći su předwčerawšim připołdnju we Wojerecach 85lětnu žonu wobkradnyli. Při jeje bydlenju na Lipecskim naměsće skućićelka rentnarku do rozmołwy zapleće. W tym času dóstachu so dalši paduši do bydlenja staruški, přepytachu tam wšitke rumnosće a pokradnychu kasetu z něšto stow eurami kaž tež lutowansku knižku. Hakle wječor žona pytny, zo běchu ju wobkradnyli, a zazwoni policiju. Zastojnicy jej pomhachu, lutowanske konto zawrěć.

Rozprawjatej wo putnikowanju

pjatk, 28. februara 2020 spisane wot:

Chrósćicy. Poslednje zarjadowanje kulturneje zymy 2019/2020 w Chróšćanskej putniskej hospodźe jutře, sobotu, w 19.45 hodź. wuhotujetej putniska mać Monika Gerdesowa a Beate Gruß. Wonej stej w běhu dwanaće lět po etapach wjace hač 3 000 kilometrow wot Zhorjelca hač do Španiskeje putnikowałoj. Wo poslednjej etapje z Leóna do Santiaga de Compostela budźetej wonej jutře němsce rozprawjeć. Hižo w 16 hodź. poběži tam w serbskim dźěćacym kinje trikowy film „Šmjatańca w raju bajkow“.

Wo swójbnych mjenach

Budyšin. Přichodne zarjadowanje w rjedźe Budyskeje akademije wotměje so póndźelu, 2. měrca, we 18 hodź. w čitarni statneje studijneje akademije na Lubijskej. Referent je znaty slědźer mjenow prof. dr. Jürgen Udolph z Göttingenskeje akademije wědomosćow. Dokelž jewi so w Sakskej wulki podźěl słowjanskich a serbskich mjenow, so referent tež tutej temje wěnuje. Zastup je darmotny.

Ludźi za serbskosć sensibilizować

štwórtk, 27. februara 2020 spisane wot:

Zhorjelc (AK/SN). Wokrjesny sejmik Zhorjelc wuznawa so zachowanju, spěcho­wanju a wuwiwanju serbskeje rěče a kul­tury. Za to steji mjez druhim wčera powołana přirada za serbske naležnosće. Jednohłósnje je sejmik Dianu Maticowu ze Slepoho, Jadwigu Bryccynu a Lutza Jankusa ze Zho­rjelca kaž tež Karstena Herdena z Běłeje Wody do njeje powołał.

Diana Maticowa steji jako regionalna rěčnica Domowiny za Slepjanski region połnje w serbskej materiji. Wšako so nimo powołanja w dalšich serbskich wobłukach angažuje. Lutz Jankus je w Zhorjelcu swobodnje skutkowacy přełožowar z pólšćiny a je słowjanskim rěčam napřećo wote­wrjeny. Karsten Herden je čłon regionalneje skupiny „Mužakowska hola“ Zwjazka 90/Zelenych a dźěła w Budyšinje w hladanju starych. Jadwiga Bryccyna je Serbowka. Narodźena w Halle je wona w Rakojdach (Rackel) w Malešanskej gmejnje wotrostła. Wot lěta 2018 bydli wona w Zhorjelcu a dźěła w zawodźe za twar izolatorow.

Štož bě něhdy bytostne

štwórtk, 27. februara 2020 spisane wot:
Twjerdźu, zo nanajwjetši dźěl tych wjesnych ludźi, kotřiž su dźensa wokoło 30 lět a młódši, njewě, kak běchu něhdy ratarske graty kaž bróny, płuh, wějawu, syjawu a njeličomne dalše historiske graty wužiwali, njerěčo wo tym, kak ćežke ratarske dźěło něhdy bě. Hdyž móžeš w kupnicy kóždy čas měšk běrnow a wšitko dalše kupić, je so zrozumjenje za ratarske dźěło z wědomja ludźi w dalokej měrje zhubiło. Štóž dźensa doma sam kokoše plahuje, zo by čerstwe jejka měł, je bohužel hižo nimale eksot. Ćim chwalobniše je, zo něchtó spyta ratarske mašiny zachować a – hišće lěpje – zjawnosći prezentować, kaž činja to Panachecy we Łomsku pola Njeswači­dła. Tajka iniciatiwa zasłuža sej wulki respekt, dokelž zachowuje na te wašnje wědomje wo tym, štož bě za serbski wjesny lud něhdy bytostne, mjenujcy dźěło w ratarstwje. Njech sej tuž prawje wjele ludźi přehladku wobhlada, předewšěm tež młódši zajimcy. Marian Wjeńka

Zběraja pjenjezy za park skaterow

štwórtk, 27. februara 2020 spisane wot:
W Choćebuskim Puškinowym parku ma přichodnje skatowanišćo nastać. Towarstwo Cottbus Wheels je na planowanju wobdźěleny a je mjeztym pjenježnu zběrku „crowdfunding“ zahajiło. W zymskim počasu zwučuja čłonojo w swojej hali w Dešanku (hlej wobraz). Před 14 lětami běchu zjednoćenstwo Choćebuskich skaterow a bmx-kolesowarjow załožili. Z toho nasta pozdźišo cyłk Cottbus Wheels. Su to ­aktiwni sportowcy z wobłukow skating, BMX, trial a skateboard, kotřiž so wo lěpše móžnosće zwučowanja prócuja. Z pjenjezami chcedźa pak tež swoju halu ponowić, zo bychu hišće wjace młodostnych přiwabili. Foto: Michael Helbig

nawěšk

SERBSKE NOWINY podpěruja:

Novi Sad – kulturna stolica Europy

nowostki LND