Do Kinsporskeho kamelijoweho domu přichadźeja kóžde lěto tysacy ...
Přećiwo ekstremizmej
Choćebuz (SN). W Choćebuzu chcedźa policija, město, koparske towarstwo FC Energija Choćebuz, braniborske knježerstwo a wustawowy škit zhromadnje přećiwo prawicarskemu ekstremizmej postupować. Kaž powěsćernja dpa rozprawja, su to zastupjerjo wčera na nowinarskej konferency w Choćebuskej radnicy wujasnili. Woni reagowachu tak na njedawne wuprajenje škitarjow wustawy, kotřiž mjenuja delnjołužisku metropolu „hotspot“ (palnišćo) prawicarskeho ekstremizma w Braniborskej.
Prawicarskoekstremistiskemu potencialej w Choćebuskej kónčinje přiličeja nimale 400 wosobow, w měsće samym něhdźe 170, rjekny wčera Frank Nürnberger, šef braniborskeho wustawoškita. Prawicarskoekstremna scena je wjeleworštowa a saha wot miljeja rockerow hač k dźělam wěstotneho přemysła.
Z pomocu wustawoškita maja so přichodnje tež sobudźěłaćerjo stražneho škita FC Energije přepruwować. W Choćebuzu je hižo něšto tydźenjow měšana patrulja porjadniskeho zarjada a policije po puću, kotraž ma so wo přidatnu wěstotu starać. Wobydlerjo to witaja.
Wjace pjenjez za Wojerecy a wsy
Prěni wobydlerski hospodarski plan za Wojerecy a přisłušace wsy je nimale na cilu. K tomu bě so měšćanska rada wčera wuznała a z wjetšinu hłosow lisćinu namjetow za etat wobzamknyła.
Wojerecy (AK/SN). „Cyłkownje 180 wobydlerskich namjetow je dóšło, mjez nimi 122 namjetow jednotliwcow, skupin a towarstwow. 92 namjetow Wojerowska měšćanska rada přiwza, dohromady 88 radźićeljo wotpokazachu, dokelž wone budget překročeja, su přepowšitkownje sformulowane, abo su z přewysokimi naslědnimi kóštami zwjazane.“ To rozłoži wčera Olaf Dominick, nawoda běrowa wyšeho měšćanosty a čłon dawkoweje skupiny wobydlerski etat, na naprašowanje měšćanskeho radźićela Martina Schmidta (CDU).
Město Choćebuz změje serbske wustawki
Choćebuska zhromadźizna měšćanskich zapósłancow chce na swojim dźensnišim posedźenju jako prěnja komuna Braniborskeje wustawki wo spěchowanju serbskeje rěče a kultury wobzamknyć.
Choćebuz (SN/at). Aktualny braniborski serbski zakoń bě měšćanskemu zarjadnistwu delnjołužiskeje metropole z nastorkom, sej na tym zakładźe swójski zawjazk tworić. W zamołwitosći běrowa wyšeho měšćanosty Holgera Kelcha (CDU) su hač do januara trěbne předdźěła wukonjeli. Na to su w běhu štyrjoch tydźenjow wšitke wobdźělene gremije naćisk předłohi rozjimali. „Hač na jedyn wuběrk wšitke tamne jednohłósnje za to hłosowachu, zo měšćanski parlament předłohu wobzamknje“, rjekny Choćebuska społnomócnjena za serbske naležnosće Anna Kosacojc-Kozelowa. Runje pak we wuběrku za socialne, runostajenje a prawa mjeńšin běchu šesćo za naćisk, dwaj zapósłancaj so hłosa wzdaštaj.
Krótkopowěsće (27.02.19)
Wutroba a motor Łužicy
Choćebuz. Braniborske krajne knježerstwo ma dobre wuwiće Choćebuza za kluč strukturneje změny po cyłej Łužicy. Město je „wutroba a motor“ tohole procesa, kaž je to ministerski prezident Dietmar Woidke (SPD) po zhromadnym posedźenju kabineta wčera „na městnje“ z čołom radnicy delnjołužiskeje metropole pod wyšim měšćanostu Holgerom Kelchom (CDU) wujasnił.
Němske wudaće premjeru měło
Drježdźany. Benedikt Dyrlich je wčera w Literarnym domje wila Augustin němsku wersiju swojeje biografiskeje zběrki dokumentow, listow a dźenikowych zapiskow „Doma we wućekach 1“ předstajił. Čitanje w sakskej stolicy bě zdobom knižna premjera w Ludowym nakładnistwje Domowina wušłych memoarow serbskeho basnika a publicista.
Wusud UNO wo kupach Chagos
Dźěłarnja lampow přijědźe
Kamjenc (SN). Mnozy hižo na to čakaja, zo wona ze swojim bydlenskim mobilom a tójšto utensilijemi dźěłarnje lampow zaso do Kamjenca přijědźe: Marion Wagner-Dee. Wot 12. do 23. měrca zaćehnje wona tam do něhdyšeho ortopediskeho wobchoda na Budyskej dróze 19. Wagner-Dee hižo wot lěta 1989 tute wurjadne rjemjesło wukonja a so na swojich swěrnych kupcow wjeseli.
Z trutom škody analyzować
Budyšin (SN). Njewjedrow dla su w zašłych měsacach wjacore štomy při kolijach spadali a poćežuja železniski wobchad tež mjez Arnsdorfom a Kamjencom. Zo by škody prawje spóznał, zasadźa wobchadny zwjazk Hornje Łobjo na mjenowanej čarje wot měrca do meje trut (Drohne), z kotrymž chce škody a wegetaciju při kolijach analyzować.
Wuběrny spanski labor
Wojerecy (SN). Hižo třeći raz je spanski labor Wojerowskeje chorownje wosebity certifikat dóstał, z čimž je hač do 31. decembra 2020 jako spanskomedicinski centrum akreditowany. „Z certifikatom našim pacientam pokazujemy, zo su pola nas w dobrych rukach“, praji šeflěkar jězorinoweho klinikuma za spansku medicinu dr. Konrad Wetzer.
Cyły dźeń wjesele camprowali
Slepo (FAG/SN). Něhdźe 70 camprowarjow bě sobotu w Slepom cyły dźeń po puću – a to wot sportnišća hač k Serbskemu kulturnemu centrumej. Spěwajo a hejsujo wuprosychu sej woni na statokach pjenjezy, jeja, połć a palenc. Při tym ćišćachu wšelake wozyčki kaž přetwarjenu dźěćacu telewiziju z pěskowčikom, rjadownisku rumnosć abo Slepjansku Love parade před sobu. Wosebje młodostnych to zahorja, a mnozy ekstra camprowanja dla domoj přijědu. Na kóncu nazběrachu wjace hač 800 jejow, kotrež su sobotu na rejach w SKC a njedźelu dopołdnja we wjetšich a mjeńšich porcijach zjědli. Wobydlerjo dźě běchu hač do zažneho ranja na darmotne piwko přeprošeni.
Nětko wjesela so hižo na přichodne zarjadowanje, hdyž rěka sobotu, 2. měrca, w Serbskim kulturnym centrumje rěka „Best of – 20 lět póstnicy“.
Policija (26.02.19)
Volvo so palił
Habrachćicy. W hornjołužiskich Habrachćicach je so dźensa w nocy blisko Lessingoweje wotstajeny Volvo palił. 24 wobornikow woheń zhaša. Na zbožo njejsu so płomjenja rozpřestrěli.
Z awtom pjany do štoma
Kulow. Njedźelu rano w pjećich je 30lětny na Kamjenskej dróze w Kulowje ze swojim awtom do štoma zrazył. Z wulkim zbožom móžeše šofer njezranjeny z dospołnje skóncowaneho Renaulta Kangoowa wulězć. Policija wšak pozdźišo zwěsći, zo měješe wodźer awta 2,16 promilow alkohola w kreji.
Dróhi zawrjene
Budyšin (SN). Na tuchwilu zawrjenych dróhach chcedźa zaměrnje z twarskimi dźěłami pokročować.
Kaž z aktualneje lisćiny wobchadnych wobmjezowanjow wuchadźa, wostanje Kulowska dróha w Němcach znajmjeńša hač do 15. nowembra tohole lěta dospołnje zawrjena. Lilijowa a Kamjenjanska dróha w Radworju wostanjetej tohorunja hač do kónca septembra zašlahanej. W Koblicach pola Łaza a we Wulkej Dubrawje budu twarske dźěła na Mortkowskej a Dwórnišćowej přichodne dny zakónčene. W Nadróznej Hrabowce wostanje Šulska hač do junija zawrjena.
Nastorki za dobru pčolacu pastwu
80 zajimcow je minjeny pjatk přeprošenje Njeswačanskeho pčołarskeho towarstwa Při Čornicy a jeho předsydy Roberta Burkhardta sćěhowało. Čłon Krajneho zwjazka sakskich pčołarjow Konrad Geipel přednošowaše na temu „Wopróšenje přez mjedowe pčołki“.
Njeswačidło (aha/SN). Přitomnym pčołarjam, ratarjam a zahrodkarjam je přednošowar wliw wobswěta na wopróšenje přeswědčiwje rozłožił a je wšitke swoje wuwjedźenja nazornje ze swójskimi fotami blišeje wokoliny dokumentował.
Bě zajimawe zhonić, kak rozdźělne su dawarjo kćenjoweho próška a kak wužitne su sadowcy, kćějace kerki a kwětki na łukach a zahrodach. Mjeztym zo je kćenjowy próšk hórskeho klona bohaty na bělkowinu, njeje na přikład kukurica radźomny dawar kćenjoweho próška. Přednošowar předstaji neofyty. To su rostliny, kotrež běchu so w srjedźowěku po lěće 1492, jako bu Amerika přez Christopha Kolumbusa wuslědźena, pola nas zadomili. Wažne pokiwy nastupajo hnojenje njepłaćachu jeničce za ratarjow, ale tež za zahrodkarjow. Runočasnje wuwědomichu sej woni zamołwitosć za zachowanje stroweho wobswěta.
