Nowelěrowanje zakonja trěbne
Prawy a wažny rozsud sejmika
Towaršnosć Hospodarski region Łužica je dospołna. Tež Budyski wokrjes je jej přistupił, zo by region nastupajo strukturnu změnu po dobje wudobywanja brunicy za jedyn postronk ćahnył.
Budyšin (SN/at). Wokrjes Budyšin towaršnosći Hospodarski region Łužica přistupi. To je wokrjesny sejmik minjenu póndźelu wobzamknył. We wubědźowanju mjez brunicowymi rewěrami w Němskej wo srědki za strukturnu změnu dyrbja so regionalni akterojo zjednoćić, kaž podšmórny to krajny rada Michael Harig (CDU), zahajacy diskusiju wo wažnym dypku dnjoweho porjada. Jako potom sedmy towaršnik płaći Budyski wokrjes runja dotalnym – su to wokrjesy Zhorjelc, Hornje Błóta-Łužica, Sprjewja-Nysa, Łobjo-Halštrow, Dubja-Błóta kaž tež město Choćebuz – 5 000 eurow stajneho kapitala a wot 2019 lětny popłatk 50 000 eurow.
Krótkopowěsće (13.12.18)
Nowa CD Serbskeho rozhłosa
Budyšin. „Hej, Łužica“ rěka nowa CD z popularnymi serbskimi pěsnjemi. Projekt je Serbski rozhłós MDR z podpěru Załožby za serbski lud zwoprawdźił a dźensa wudał. Słyšeć móžeće tam mjez druhim Theju Čórlichec, Gabriela Mommera a Danielu Hazec. Cejdejka je w Serbskej kulturnej informaciji a w Smolerjec kniharni na předań. Spočatk noweho lěta ma tohorunja w syći přistupna być.
Podpěra tež łužiskim ratarjam
Drježdźany. Zarunansku přiražku 15,7 milionow eurow płaća tele dny něhdźe 2 900 ratarskim zawodam we wróćostajenych kónčinach Sakskeje, mjez druhim w Hornjołužiskej krajinje hole a hatow. Pjenjezy su z europskeho ratarskeho fondsa k wuwiću wjesneho ruma, zhromadneho nadawka „polěpšenje agrarneje struktury a škita přibrjohow“ a z dawkow, kaž přisłušne ministerstwo zdźěla.
Kosmetika z kawiara
Policija (12.12.18)
Zymske wjedro haćenja zawiniło
Dobruša/Huska. Wčerawše zymske wjedro ze zdźěla chětro sylnym sněhowanjom je w Hornjej Łužicy k wjacorym wobchadnym njezbožam wjedło, kaž policija zdźěla. Předewšěm w Hornim kraju registrowachu zastojnicy na hładkich a chětro zasněženych pućach wjac njezbožow a haćenjow prěki stejacych Lkw-jow dla. Předewšěm potrjechene běchu dróhi wokoło Wjelećina (Wilthen), Wjazońcy (Neukirch) a Wjernarjec (Wehrsdorf). W Drječinje (Dretschen) pola Huski (Gaußig) zhubi wčera wječor šofer VWja we wulkim sněze kontrolu nad wodźidłom a zajědźe do přirowa, hdźež so jězdźidło nabok zwróći. Po informacijach policije pak so nichtó zranił njeje.
Drěwcy a Złyčin ze sobu zwjazać
Łaz (AK/SN). W prócowanjach wo wsy Drěwcy (Driewitz) a Złyčin (Litschen) zwjazowacu dróhu je móžne rozrisanje spóznajomne. To podšmórny wjesnjanosta Thomas Leberecht (CDU) na zašłej gmejnskej radźe. Zhromadnje z wotrjadnikom za twarske naležnosće Wolfgangom Tietzu poby wón kónc nowembra na rozrěči ze zastupnikami biosferoweho rezerwata Hornjołužiska hola a haty kaž tež ze zastupjerjemi krajneje direkcije w Sakskim statnym ministerstwje za wobswět a ratarstwo w Drježdźanach.
„Po konstruktiwnych rozmołwach smy alternatiwnu wariantu našli“, rjekny nětko Thomas Leberecht. Po njej ma mjeńša asfaltowana dróha nastać. Na přeće biosferoweho rezerwata a wyšeho zarjada za přirodoškit wokrjesa Budyšin měli ju w susodnym lěsu z tak mjenowanymi bio-plesternakami wuhotować. Tón słuži škitej domjaceje zwěriny. Gmejna ma tuž swoju próstwu předźěłać a ju znowa zapodać.
Chcedźa nałožk dale pěstować
Pawšalu za gmejnski dorost
Njeplanowane wudawki z přidatnymi pjenjezami wurunaja
Njeswačidło (JK/SN). Na swojim poslednim lětušim posedźenju wěnowaše so Njeswačanska gmejnska rada wčera wječor tomu, rozdźělić lětuši podźěl pawšale sakskeho knježerstwa za spěchowanje wjesneho ruma we wobjimje 70 000 eurow. To wuwoła wočakowanu čiłu a kontrowersnu diskusiju. Namjetej wjesnjanosty Gerda Schustera (CDU), pjenjezy za přidatne a njeplanowane wudawki we wobłuku lětušeho hospodarskeho plana zasadźić, njemóžachu so wšitcy radźićeljo přizamknyć. Dwaj sej skerje žadaštaj, rozdźělić pjenjezy gmejnskim towarstwam za dalše spomóžne dźěło. Wjesnjanosta pak wobkrući swój namjet prajo, zo měješe a ma gmejna přidatne a wyše wudawki, zo bychu dźěći w žłobiku a pěstowarni zastarane byli. Tuchwilu zarjaduje gmejna dalše dnjowe zastaranje dźěći na Šešowskej dróze, kotrež chcedźa spočatk lěta zahajić. To je z tójšto wudawkami zwjazane. Dalša pozicija su wudawki za nakup jězdźidła, kotrež su dotal wotnajeli a za kotrež financowanje lětsa wuběži.
Pyramidy a swěčkowy wobłuk
Njeswačidło (ML/SN). Hodownu pychu – wjace hač 50 pyramidow z rudnohórskimi postawami a małymi božimi narodkami kaž tež palčikami, jandźelemi a hórnikami – pokazuje 40. wosebita wustajeńca Njeswačanskeho domizniskeho muzeja. Budyšan Peter Baaske, zběraćel adwentnych a hodownych ludowuměłskich wudźěłkow, předewšěm pyramidow a postawow wot rudnohórskich rězbarjow z časa NDR, je 49 požčonkow za přehladku přewostajił.
Klětu w meji cyrkej zaróštuja
Chrósćicy (SN/JaW). Chróšćanska wosada hotuje so na chětro wulku twarsku naprawu. Klětu chcedźa tam mjenujcy třěchu wosadneje cyrkwje ponowić.
Kaž farar Měrćin Deleńk našemu wječornikej na naprašowanje wobkrući, je financny plan twarskeho předewzaća schwaleny. Tak dóstanje wosada za ponowjenje třěchi cyłkownje 148 000 eurow spěchowanja z programa Leader. „Cyrkej steji pod škitom pomnikow, a naša kónčina a z njej Chrósćicy přisłušeja tak mjenowanej Leaderowej kónčinje“, wosadny farar rozłoži. Kaž wón Serbskim Nowinam dale zdźěli, je mjenowana suma tuchwilu najwyša móžna přiražka ze stron Leader. „Hornc za aktualnu spěchowansku dobu wobsahowaše jenož hišće 148 000 eurow. Te su nam přizwolili“, je Měrćin Deleńk zbožowny.
Drježdźansko-Mišnjanske biskopstwo přida twarskemu projektej 192 000 eurow. Zbytk cyłkownych kóštow, kotrež wučinjeja dohromady 650 000 eurow, dyrbi wosada sama zwjesć. Dźěl trěbneje sumy je wona po informacijach Chróšćanskeho wosadneho fararja hižo nazběrała a za swoje hoberske twarske předewzaće składowała. Klětu w meji chcedźa cyrkej zaróštować.
