Policija (06.09.21)
Drohe koleso pokradnjene
Dobruša-Huska. Překwapjenku njerjaneho razu dožiwi wobsedźer 3 000 eurow droheho elektrokolesa sobotu dopołdnja w gmejnje Dobruša-Huska. Při wokrjesnej dróze K 7252 wón woměrje hriby pytaše a drje na ničo złeho njemysleše. Tón čas pak su njeznaći wužili a jeho e-bike pokradnyli, kotryž bě při štomje přizamknjeny.
Přećiwo zabyću wojować
Prěnja njedźela w septembru je w Budyšinje kóžde lěto kruty termin, zo wopominaja na tudyšim židowskim pohrjebnišću zamordowanu Budysku židowsku wosadu.
Budyšin (CS/SN). Mjeztym 31 lět zetkawaja so na Budyskim židowskim pohrjebnišću kóždolětnje ludźo, zo bychu so kadiš modlili. Z jednym z najwažnišich paćerjow židowstwa dopominachu při rowach Budyskich židow znowa na wosud tych, kotrychž bě nacionalsocialistiski režim zamordował. Je wažne přećiwo zabyću wojować, rjekny wčera dr. Hans-Eberhard Kaulfürst, kiž tele popołdnjo hromadźe z Petru Kaulfürstowej hłownje organizuje. Tež tónraz su hebrejske liturgiske spěwy Michala Foršta, kantora židowskeje kongregacije Bejt Simcha z Prahi, po Budyskim židowskim pohrjebnišću klinčeli. Ze zhromadźenymi žonami a mužemi, mjez nimi su kóžde lěto tež Serbja, wonaj spěwaštaj a so modleštaj.
Krótkopowěsće (06.09.21)
Incidenca nahladnje stupa
Budyšin. Ličba natyknjenjow z koronawirusom w Hornjej Łužicy dale přeběra. Po Roberta Kochowym instituće sej dźensa Budyski wokrjes z incidencu 15,8 štwórty dźeń a Zhorjelski ze 17,2 pjaty dźeń za sobu kritisku hódnotu dźesać překročiłoj. Tohodla płaća we wokrjesu Zhorjelc wot zajutřišeho, srjedy, krućiše škitne předpisy. Budyski wokrjes je w Sakskej tón z druhej najnišej incidencu.
Za Serbow wabiła
Hamburg. Jedna z hosći wusyłanja „NDR Talk show“ w telewiziji NDR bě minjeny pjatk dźiwadźelnica Gabriela Marija Šmajdźina. Rodźena Budyšanka mjez druhim porokowaše, zo wědu wo Serbach w šulskej wučbje po wšej Němskej njeposrědkuja. Nimo toho wona za to wustupowaše, zo měli serbscy starši swoju maćeršćinu dźěćom dale dawać a jim tónle pokład njezapowědźić.
Samojo so přesadźili
Za tomatowymi družinami slědźić
Nalěto drje rostliny sadźamy, nětko pak widźimy, kak płody wupadaja, a wěmy, kak wone słodźa. Zahrodnistwa mjez Kulowom a Budyšinom poskićeja w nalěću najwšelakoriše družiny. Štóž pak chce tež raz njewšědne płody po formje a barbje měć, tón njech pohladnje, štó je sej što do zahrodki sadźał. Mjez 23 000 družinami, kotrež su pječa po cyłym swěće zličene, sej kóždy swój najlubši słód wuslědźi. Mje wosobinsce je na přikład tomatowy kruh překwapił, kotryž móžach na kupje Mainau w Bodamskim jězorje wobdźiwać. Płody njejsu jenož po formje a wulkosći zajimawe, ale tež po mjenach, kotrež płody derje wopisuja. Tak sym sej wšelake symješka sobu wzała a dach je schadźeć.
Policija (03.09.21)
Balkon so sypnył
Budyšin. Dźewjeć wosobow je so wčera wječor na Budyskej Paulijowej zdźěla ćežko zraniło, jako so balkon na třećim poschodźe bydlenskeho domu sypny a na balkon poschod niže padny. Mjez zranjenymi běštej dwě dźěsći. Po informacijach policije su tam narodniny swjećili. Hosćo stupichu krótko po 20 hodź. runočasnje na balkon, štož konstrukcija njewudźerži. Za dokładnej přičinu njezboža nětko slědźa.
Spominaja za tydźeń na maćicarja
Wo serbskich naležnosćach
Čorny Chołmc. Serbskopolitiske krajne kruhi Zwjazka 90/Zelenych, Lěwicy a SPD w Sakskej přeprošeja na forum ze zastupjerjemi swojich a dalšich stron kaž FDP a CDU składnostnje wólbow přichodneho Němskeho zwjazkoweho sejma. Zjawny dialog wotměje so wutoru, 7. septembra, we 18 hodź. w Čornochołmčanskim Krabatowym młynje. Kandidatki a kandidaća za zwjazkowy sejm přednjesu swoje předstawy a ćežišća k naležnosći zastupnistwa Serbow w přichodnym zwjazkowym sejmje a přijmu zdobom nastorki, přeća a ideje wolerkow a wolerjow. Tež prěčne linije, profile a diferency jednotliwych stron k temje hodźa so rozjimać. Planowane su krótke předstajenje kandidatow a jich politiske ćežišća za Serbow w zwjazkowym sejmje, prašenja a nastorki přitomnych hosći kaž tež wotmołwy kandidatow na přinoški hosći a ewentualnje diskusija. Předewšěm měło hić wo kubłanje, strukturnu změnu, medije, financowanje a dalše. Zarjadowanje, kotrež Cosima Stracke-Nawka z Budyšina moderěruje, budźe dwurěčne.
Žony w srjedźišću
Krótkopowěsće (03.09.21)
Z Biedenkopfom so rozžohnowali
Drježdźany. Sakska je so dźensa oficialnje z Kurtom Biedenkopfom, prěnim ministerskim prezidentom po znowazałoženju swobodneho stata 1990, rozžohnowała. Na žarowanskim akće w Drježdźanskej Cyrkwi našeje knjenje wobdźěli so něhdźe 300 prošenych hosći. Zwjazkowy prezident Frank-Walter Steinmeier, sakski premier Michael Kretschmer a šef CDU Armin Laschet su skutkowanje Biedenkopfa w narěčach hódnoćili.
Zaso nad kritiskej hódnotu
Budyšin. W hornjołužiskimaj wokrjesomaj je incidenca zaso nad kritiskej hódnotu dźesać. Roberta Kochowy institut mjenuje dźensa za Budyski wokrjes 10,7, za Zhorjelski 12,0. Wo dwanaće natyknjenjach z koronawirusom je wokrjes Budyšin wčera rozprawjał, wot 72 schorjenych lěkuja štyrjoch w chorowni. Zhorjelski informuje wo štyrjoch infekcijach.
Myto za Delnjoserbski gymnazij
Festiwal lětsa trochu mjeńši
Němcy (AN/SN). Němčanski młodźinski klub je mjez młodostnymi we wokolinje za to znaty, zo rockowe festiwale derje organizuje. Kaž na njeličomnych druhich městnach tež dyrbješe pak tele wulke zarjadowanje loni a lětsa wupadnyć. Młodźina dlěši čas wuradźowaše, što je móžno činić. Tak so krótkodobnje dojednachu sobotu, 4. septembra, mjeńši rockowy wječor přewjesć. Na to nětko tež wulka wabjenska tafla na kromje wsy skedźbnja. Z njej a z dalšim wabjenjom Němčanscy młodostni wšitkich zajimcow do wsy přeprošeja.
Tele dny so młodźina při wjesnym towarstwowym domje zetkawa, starajo so wo wotpowědnu dekoraciju. Widźeć budźe mjez druhim lampa, wobdata z husacymi křidłami.
Policija (02.09.21)
Sud piwa fuk
Rakojdy. Njewšědnu měšeńcu rubizny spakosćichu njeznaći předwčerawšim w Rakojdach (Rakel) w Malešanskej gmejnje. Tam zadobychu so do twarjenja na Bartskej dróze. Z njeho pokradnychu laptop, telewizor a sud piwa. Rubizna ma hódnotu něhdźe 2 500 eurow. Bohužel z policajskeje rozprawy njewuchadźa, kak wulki sud bě, a hač bě wón połny abo nic. Přiwšěm policija slědy zawěsći a nětko za paduchami pyta.
