Serbske Pazlicy (jl/SN). Serbskopazličanska młodźina je minjeny kónc tydźenja na wjesny swjedźeń přeprosyła. Hinak hač zwučene wotmě so zarjadowanje při wjesnym haće blisko młodźinskeho zetkawanskeho centruma. Pandemije dla so organizatorojo rozsudźichu, wjesny swjedźeń mjeńši wuhotować. Z wjesnym hatom mějachu Serbskopazličenjo rjanu kulisu.

Po zwučenym wašnju su swjedźeń sobotu z natočenjom piwoweho suda zahajili. Wječor młodostni wopytowarjam lóštny program předstajichu. W nim je powědarka Liškec Hana w lěće 2081 wo pandemiji rozprawjała a so dopominała, kak běchu 60 lět do toho tři wirusy Corina, Carola a Viruslava zhromadnje z hygienu a šćěpjenjom wuhnali. Wo hudźbne wobrubjenje starachu so DJjojo Serbskopazličanskeje młodźiny. Najprjedy zahra Raphael Kral šlagry a oldije. Pozdźišo wjerćeštaj dalšej DJjej tačele z načasnej hudźbu. Zo je něhdźe 600 ludźi přišło, młodostnych chětro překwapi. Ćim bóle so woni wjeselachu, zo je zarjadowanje tajki wulki zajim zbudźiło.

W Chwaćicach chce gmejna nowe dźěćace dnjowe přebywanišćo twarić dać

Wulka Dubrawa (CS/SN). Hnydom dwójce steješe na zašłym posedźenju Wulkodubrawskeje gmejnskeje rady wjesny dźěl Chwaćicy w srjedźišću wuradźowanja. Jónu jednaše so wo twarski plan za nowu bydlensku štwórć na kromje wsy za awtowym domom Bierke. Tam maja šěsć jednoswójbnych, jedna rynkowa ­a dwě dwójnej chěži nastać. Podłožki běchu w meji wupołožene. Nošerjo zjawnych zajimow mějachu lědma wobmyslenja. Jeničce přirodoškitny zwjazk sej žada, zo měli posudk zhotowić, hač su někajke družiny wohrožene. Dokelž planuja tři wišniny podrězać, dyrbja za nje jako narunanje nowe štomiki nasadźeć.

Žuricy (SN). Dróhotwarskej projektaj w Budyskim wokrjesu staratej so wot wčerawšeho wo poćeženje wobchada. Hač do 20. awgusta ponowjeja wokrjesnu dróhu K 7266 wot křižowanišća při Porchowskim přemysłownišću hač na kromu Žuric. Dróha wostanje cyły čas dospołnje zawrjena. Šoferojo měli B 98 a S 94 wužiwać. Hač do spočatka septembra ponowjeja tež Salowski puć w Kulowje, štož stanje so w dwěmaj twarskimaj wotrězkomaj. Tež ta dróha je w času twarskich dźěłow dospołnje zawrjena. Wokołopuć wjedźe wot Hózka přez Ko­ćinu a Salow.

Za wulět so přizjewić

Čorny Chołmc. Drježdźanske towarstwo Stup dale planuje 15. awgusta přewjesć wulět do Čornochołmčanskeho Krabatoweho młyna. Nimo wodźenja a wobjeda je předwidźane, Drježdźanske dźěći serbsku narodnu drastu woblec a z nimi program nazwučować. Za to móža so zajimcy hač do kónca julija pola Jadwigi Pjacec pod telefonowym čisłom 0176/ 429 86 468 přizjewić. Wot 14.30 hodź. chcedźa publikumej swój program předstajić. ­Na to su potom wšitcy přeprošeni.

Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa Budyski hosćenc „Wjelbik“. (5)

Zakładne murje domow na Budyskej Žitnej su zdźěla 600 lět a starše. Pomjenowanje hasy swědči wo tym, zo běchu tam w srjedźowěku ze žitom wikowali. Ze starych zapiskow dale wučitaš, zo bě na Žitnej hasy dwěmaj zamóžnymaj měšćanomaj dowolene piwo warić. Jedyn z njeju bydleše na městnje, hdźež steji dźensa woblubowany serbski hosćenc „Wjelbik“. Dom bu kónc Druheje swětoweje wójny runja mnohim dalšim twarjenjam zničeny.