Ličby dale stupaja
Budyšin/Zhorjelc. Ličba na koronu inficěrowanych w Hornjej Łužicy dale stupa. Wčera zličichu w Budyskim wokrjesa 15 nowych infekcijow, sydomdnjowska kwota na 100 000 wobydlerjow wučinja 119. Tuchwilu je 523 ludźi natyknjenych, 692 je so wustrowiło. W Zhorjelskim wokrjesu mějachu wčera tři nowe infekcije. Sydomdnjowska kwota wučinja tam 132. Aktualnje je tam 510 ludźi chorych, 409 je zaso strowych.
Nowy cyrkwinski hudźbnik
Chróstawa. Hans Christian Martin naslěduje wjelelětneho cyrkwinskeho hudźbnika Chróstawskeje ewangelsko-lutherskeje wosady Lucasa Pohla. 8. nowembra chcedźa bywšeho organista znatych Naumburgskich pišćelow we cyrkwi swj. Wjacława z kemšemi jako kantora w Chróstawje zapokazać.
Nowy šef frakcije AfD
Podstupim. Dwaj měsacaj po wotstupje Andreasa Kalbitza je frakcija AfD w Braniborskim krajnym sejmje dźensa Hansa-Christopha Berndta za noweho předsydu wuzwoliła. Berndt naslěduje Kalbitza, kiž dyrbješe jako frakciski šef wotstupić, po tym zo běchu jeho w awgusće ze strony wuzamknyli.
1860 wróćo na čole
Radwor. Za jutře, 27. oktobra planowany škotowy turněr serbskich seniorow w Radworskej „Zelenej hałžce“ dyrbi koronoweje pandemije dla wupadnyć. Kaž hłowny organizator Měrćin Nowak zdźěli, wón nowy termin sčasom wozjewi.
Prózdninski program njebudźe
Budyšin. Koronowa pandemija wuskutkuje so nětko tež na prózdninski program, kiž mějachu w tymle tydźenju w Budyskim Serbskim muzeju planowany. Kaž muzej zdźěli, so předwidźanej dźěłarničce jutře, wutoru, a štwórtk njewotmějetej. Muzej pak wostanje dale wšědnje wot 10 do 18 hodź. přistupny.
Kabl hižo přihotowany měł
Rowno. Něhdźe 500 metrow milinoweho kabla w hódnoće něhdźe 20 000 eurow chcyše 36lětny muž w nocy na sobotu w Rownom kradnyć. Kabl bě wón hižo do krótšich kruchow rozrězał. Po awtomatiskim alarmje pak muž najprjedy ćekny. Z pomocu helikoptera jeho za štomom schowaneho lepichu a zajachu.
Slepo (AK/SN). Bywši Slepjanski šulski kompleks ze susodnej sportownju a hosćencom chcedźa tež přichodnje zmysłapołnje wužiwać. Tole wuzběhny nawoda tamnišeho twarskeho zarjada Steffen Seidlich na zašłym posedźenju Slepjanskeje gmejnskeje rady.
Twarjenje bywšeje zakładneje a wyšeje šule chcedźa zwottorhać. Po zakładnym zrěčenju mjez gmejnu a Vattenfallom z lěta 2008 přewozmje LEAG nětko kóšty wottorhanja. „Jako gmejna smy inwentar wurumowali a dobre dźěle druhim šulam přewostajili“, rozłoži Seidlich. Zbywacy inwentar su gmejnscy přistajeni do wotpadkow dali. Přichodne dny a tydźenja hišće durje, wokna, špundowanje, wobhrodźenja a elektriku z twarjenja wotstronja. Potom móža je torhać započeć. To pak njebudźe do nowembra. Dołhodobnje chcedźa teren stareje šule za jednoswójbne domy wužiwać. Štyri parcele móhli tam nastać.
Wulka Dubrawa (CS/SN). K čemuž su so w Budyšinje, Njeswačidle a na druhich městnach hižo předrěli, su nětko tež za Wulku Dubrawu rozsudźili. Kaž wjesnjanosta Lutz Mörbe (njestronjan) na zašłym posedźenju gmejnskeje rady zdźěli, tam lětsa koronapandemije dla žane hodowne wiki njezměja. Wobšěrne hygieniske žadanja, kotrež bychu trěbne byli, bychu gmejnu prosće přežadali, wón radźićelam rjekny.
Při přetwarje nawsy w Brěmjenju su po słowach wjesnjanosty přidatne wudawki trěbne, kotrež pohibuja pak so w přiměrjenym ramiku. Na nastawacym hrajkanišću njemóža so hibacy mosćik tak twarić, kaž bě spočatnje planowane. Tohodla je nětko wosebity podest trěbny, na kotrymž jedyn bok mosta postaja. Lěpšina je, zo twarja nětko tohorunja mały schód wot busoweho zastanišća na hrajkanišćo.
Hamor (AK/SN). 23. mjezynarodna łužiska rallye ADMV wot 5. do 7. nowembra smědźa pod krutymi předpisami hygieny a wěstoty přewjesć. Prěni raz w swojich stawiznach pak dyrbi wona bjez přihladowarjow wuńć. „Dale stupace koronaličby nas k tomu nuzuja“, podšmórny organizaciski nawoda Wolfgang Rasper, předsyda wuhotowaceho towarstwa Łužiski rallyejowy a wodosportowy klub, minjeny pjatk w Hamoru. Něhdźe 500 čestnohamtskich podpěraćelow, lěkarjow, sanitetarjow, wohnjowych wobornikow a policistow wubědźowanje sobu zawěsći. Je to wulki sportowy podawk we Łužicy a najwuznamniša rallye na šoteru srjedźneje Europy. Wot cyłkownych 165 kilometrow wubědźowanskeje čary wotměje so 152 kilometrow na šoteru, zbytk na krutej podłoze.
Jitk (JK/SN). Na njedawnym dworowym swjedźenju Helmec swójby w Jitku měješe Krabatowy lód swoju oficialnu premjeru. Nimale na kóncu lětušeje sezony bě to rjana překwapjenka. Planowane bě to po słowach Kornelije Helm, kotraž bě ideju za lód hromadźe z mandźelskim Swenom zrodźiła, hižo za prěni dworowy swjedźeń, kotryž tradicionelnje 1. meje wotměwaja. Koronapandemije dla pak bě tón wupadnył a tež po tym bě lědma składnosće, lód we wotpowědnej formje předstajić. Kornelia Helm njezataji, zo su lód tež bjez oficialneho předstajenja hižo cyły čas hosćom a přećelam dwora poskićeli. Za to su dobry wothłós žnjeli.
Hamor (AK/SN). Zaměrowy zwjazk Łužiska jězorina Sakskeje chce přichodnje zaměrnišo a efektiwnišo planować. Tak chcedźa wočakowanej změnje klimy a jeje sćěham lěpje wotpowědować. Tydźenja su k tomu wotpowědny koncept k zwyšenju planowanskeje wěstoty na jězoru a wokoło njeho wobzamknyli. Financować chcedźa naprawu ze srědkami fondsa, kiž běchu Zwjazk a zwjazkowe kraje k saněrowanju bywšich hórniskich kónčin wutworili. Zamołwići liča z cyłkownymi kóštami 100 000 eurow. Zaměrowy zwjazk ma 15 000 eurow přinošować. Zbywace 85 000 eurow chcedźa ze spěchowanskeho fondsa wzać. „Wichory w lětomaj 2017 a 2018 su pokazali, zo dyrbimy nastupajo planowanje a posudźowanje rizika pola twarskich objektow na jězorach a wokoło nich nuznje jednać. Přikłady tajkich škodow su mjez druhim płuwace objekty na Bjerwałdskim jězoru kaž tež přistaw a płuwace domy na Lejnjanskim jězoru“, rěka w naćisku wobzamknjenja.