Społnomócnjeny za serbske naležnosće města Kamjenca Achim Hojer a wotrjadnik za kulturne zarjadowanja a měšćanski ­marketing Dawid Kliman (wotprawa) wjeselitaj so nad dwurěčnym napisom nad zachodom do dźiwadła w Lessingowym ­měsće. Naprawu zmóžnili běchu z pomocu srědkow Sakskeje za spěchowanje zeskutkownjenja dwurěčnosće w komunach ­serbskeho sydlenskeho ruma. Foto: Město Kamjenc/Dawid Kliman

Prosće k tomu słuša

wutora, 09. junija 2020 spisane wot:
Serbske napisy na zjawnych zarjadnišćach w serbskim sydlenskim rumje dawno hišće samozrozumliwe njejsu. Bohužel. Ćim bóle smědźa so w Kamjencu wjeselić, zo je so tam nětko poradźiło nad zachodom do měšćanskeho dźiwadła serbski napis připrawić. Za to su sej zamołwići w radnicy Lessingoweho města na kóždy pad chwalbu zasłužili a runje tak to, zo wo tym rozprawjeja, kaž dźensa. Runje z tym pak mam tež swoje ćeže. Na jednym boku je wězo prawje, zo nańdźe nowy serbski napis swoje městno w medijach. To dźě je z prócowanjemi a pjenjezami zwjazane. Na tamnym boku je na te wašnje dokumentowane, zo jedna so wo něšto wosebite a wo něšto wurjadne, štož pak njetrjechi, abo lěpje njeby trjechić směło. Přetož serbski napis w zjawnosći měł samozrozumliwy być, dokelž měł do wšědneho dnja tu bydlacych słušeć, tak kaž tež žiwa serbšćina do wšědneho dnja našeho regiona słuša. Marian Wjeńka

Krótkopowěsće (09.06.20)

wutora, 09. junija 2020 spisane wot:

Dalšej nowoinfekciji

Budyšin. Ličba z koronawirusom natyknjenych wučinješe wčera w Budyskim wokrjesu z dwěmaj nowymaj padomaj 499. Dwaj inficěrowanaj staj so mjeztym zaso wu­strowiłoj, štož je nětko dohro­mady 451. W karantenje je tuchwilu 57 wosobow, dźesać mjenje hač dźeń do toho. Cyłkownje 2 801 karantenu su hižo zakónčić móhli.

Trjebaja wjace darowaneje kreje

Drježdźany. W Sakskej po­trjeba darowaneje kreje zaso přiběra. Wotsrjedź meje je naprašowanje z chorownjow za krejnymi produktami w běhu mało dnjow wo hač do 30 procentow postupiło. To rjekny Kerstin Schweiger z krejdarowanskeje słužby sewjer-wuchod Němskeho čerwjeneho křiža powěsćerni dpa. Re­zerwy za nuzowe pady tuchwilu hišće někak dosahaja.

Marijiny stołp postajili

Radźićeljo so schadźuja

póndźela, 08. junija 2020 spisane wot:

Njebjelčicy. Přichodna zjawna zhromadźizna zarjadniskeho zwjazka Při Klóšterskej wodźe wotměje so jutře, wutoru, w 19.30 hodź. Zastupjerjo pjeć přisłušnych gmejnow zetkaja so tónraz w sydarni Njebjelčanskeje gmejny při tamnišim sportnišću. Mjez druhim póńdźe wo staw dźěłow za energetiske saněrowanje běrowoweho twarjenja zarjadniskeho zwjazka w Pančicach-Kukowje. We wobłuku hodźiny za naprašowanja budu wopytowarjo swoje naležnosće wotbyć móc.

Susodźa mjez nami

Zhorjelc. Zhorjelski wokrjes přeproša hižo sčasom na kubłanske zarjadowanje we wobłuku lětušich Čěsko-němskich kulturnych dnjow 7. oktobra do Drježdźan. Narěčani su akterojo z dźěćacych dnjowych přebywanišćow, wosebje wjacerěčnych, přijěć na fachowy dźeń sakskeje krajneje centrale za politiske kubłanje. Tež serbscy zajimcy su na zarjadowanje witani.

Policija (08.06.20)

póndźela, 08. junija 2020 spisane wot:

Drohej kolesy fuk

Ćisk. Před kupnicu w Ćisku su njeznaći sobotu popołdnju e-bikaj znački Scott pokradnyli. Přizamknjenej kolesy měje­štej po informaciji wobsedźerjow hódnotu dohromady 10 000 eurow. Jedna so wo neonzeleno-čorne Genius 710 plus a wo fijałkojto-čorne EGenius Contessa 720 plus. Štóž je něšto wobkedźbował, njech to policiji zdźěli.

Pola frizera pobyli

Wojerecy. Lědma zo smědźa frizerojo zaso dźěłać, su so njeznaći w nocy na sobotu do tajkeho salona we Wojerecach zadobyli. Tam pokradnychu pjeć frizerskich mašinow w hódnoće 500 eurow.

We Worklečanskej kapałce a pozdźišo w Radworskej „Meji“ zhladowaštaj sobotu ćělnje a duchownje čiłaj Jurij Šołta a jeho mandźelska Hilža rodźena Kochec z Noweje Wjeski na 60 zbožownych lět mandźelstwa.

Tež małe serbske wiki planowane

póndźela, 08. junija 2020 spisane wot:

Zo by w starych dźělach městow dale ­žiwjenje knježiło, pytaja za marketing zamołwići nastajnosći za dobrymi idejemi. We Wojerecach mějachu tajku ­hižo před lětomaj a ju lětsa wospjetuja.

Wojerecy (AK/SN). Z kulturnymi a kulinariskimi poskitkami wotměwaja nětko w měsće nad Čornym Halštrowom hač do 22. awgusta staroměšćanski bulwar. „Wšitko bě dołho njewěste. Hakle 6. meje móžachu wo spěchowanskich srědkach rozsudźić. Při­zwolenje je nam 12. meje předležało“, rozłožuje sobuiniciatorka ­Dorit Baumeister. Hromadźe z Frankom Graumüllerom dźěła wona za Wojerowski měšćanski management. Staroměšćanski bulwar organizować žada sej wot njeju lětsa wosebje wjele improwizacije a njekomplikowanych rozsudow.

Mało chwile za nowotwar

póndźela, 08. junija 2020 spisane wot:

Sakska a wokrjes přidatej pjenjezy za pěstowarnju – ale jenož hač do 2022

Rowno (CK/SN). Dny Rownjanskeje ­pěstowarnje „Milenka“ zdadźa so ličene być, znajmjeńša w nětčišim twarjenju. Město toho zo bychu wobstejacy dom saněrowali, chcedźa nowy natwarić. Tale tema wobydlerjow wsy w Slepjanskej gmejnje jara zaběra. To bě tež na zahajenskim zarjadowanju za wjesny wuwićowy koncept jasnje pytnyć.

Runja Rownjanskej wjesnej radźe je so nětko tež techniski wuběrk Slepjanskeje gmejny za to wuprajił, zo měła gmejnska rada 7. julija zasadnje rozsudźić, nowe dźěćace přebywanišćo wosrjedź wsy natwarić dać. Nazymu 2019 je sakski ­kabinet rozsudźił, za to dwaj milionaj ­eurow přewostajić. Pjenježne srědki su dźěl dwójneho etata 2021/2022 Swobodneho stata Sakskeje a dyrbja hač do 31. decembra 2022 wužiwane być. „To je sportowski zaměr, tohodla dyrbjeli so nětko z nim zaběrać“, praji wjesnjanosta Reinhard Bork (njestronjan). Pjenjezy přewostajić chce tež Zhorjelski wokrjes we wobłuku spěchowanja pěstowarnjow.

Krótkopowěsće (08.06.20)

póndźela, 08. junija 2020 spisane wot:

Dalši korona-pad zwěsćili

Budyšin/Zhorjelc. Z jednej nowoinfekciju wučinja ličba dotal z koronawirusom natyknjenych w Budyskim wokrjesu 497. Nětko je 29 wosobow schorjenych, šěsć z nich lěkuja w chorowni. Dwaj pacientaj staj ćežko schorjenaj. W Zhorjelskim wo­krjesu njejsu hižo wot 28. meje žane dalše­ infekcije zwěsćili. Mjez dohromady 269 natyknjenymi je tu hišće jedna wosoba schorjena.

Wo wuhnaću po wójnje

Kinspork. Pod hesłom „,Do hoan uns die Polen nausgetriebm‘ – Vertreibung, Ankunft und Neuanfang im Kreis Zittau 1945–1950“ wěnujetaj so historikarjej dr. Lars-Arne Dannenberg a dr. Matthias Donath dołho zamjelčanemu kapitlej němsko-pólskich stawiznow. Kniha je w Kinsporskim nakładnistwje Via Regia wušła a ma 268 stron.

Hač potuńšenje pomha?

Praha. Płaćizny w hosćencach a kofejownjach w centrumje čěskeje stolicy su w zwisku z koronapandemiju wokomiknje wo 30 do 50 procentow niše hač do toho. Mjenowane předewzaća, wu­směrjene hewak na wukrajnych turistow, spytaja na te wašnje čěskich ludźi při­wabić. Přiwšěm so mnozy mějićeljo boja, zo dyrbja swoje domy cyle zawrěć.

Policija (05.06.20)

pjatk, 05. junija 2020 spisane wot:

Medicina wina była?

Krušwica. Hač bě znaty přirodny lěk „Klosterfrau Melissengeist“ wina na tym, zo měješe šofer tójšto alkohola w kreji, dyrbi nětko policija w Krušwicy wujasnić. Jako zastojnicy awto 59lětneho wčera rano kontrolowachu, jim alkoholowa chorhojčka hnydom napadny. Muž so wurěčowaše, zo měješe problemy ze žołdkom a zo bě lunk woneho srědka pił. Zo pak je tón dwaj promilej alkohola ­zawinił, je skerje wěrjenjepodobne.

Serbska debata

nowostki LND