Hórki (JK/SN). Lětsa posledni raz schadźowachu so čłonojo gmejnskeje rady Chrósćicy wčera wječor w Hórčanskim Młynkec hosćencu. Na dnjowym porjedźe njebě přewjele dypkow, tak kiwaše radźićelam zažny kónc posedźenja.
Runja minjenym lětam je gmejna Ralbicy-Róžant swojich seniorow tež lětsa na adwentničku do Šunowskeje Fabrikskeje hospody přeprosyła.
Šunow (aha/SN). Tuchwilu ma delanska gmejna 1 728 wobydlerjow. Wčera wot připołdnja zeńdźe so z nich tam 150 seniorow – najstaršej běštaj 91lětny Jan Wowčerk a Kata Bjeńšowa, kotrejž budźe w januaru 90 lět –, zo bychu so při kwasnym wobjedźe kaž tež při kofeju a wosušku móhli rozmołwjeć a zhromadnje zabawjeć.
Ze wšěch wjesnych dźělow móžeše wjesnjanosta Hubertus Ryćer (CDU) po witanju mjeńše a wjetše naprawy naličić, kotrež běchu tam lětsa zwoprawdźili. Ćežišćo w Ralbicach na přikład běchu mjeztym předležace planowanske dźěła za twar noweje pěstowarnje a horta, saněrowanje křižowanišća při Trupinjanskej dróze kaž tež trěbny twar lifta za zbrašenych na wyšej šuli. W Sernjanskej nowej bydlenskej štwórći su mjeztym wot 16 twarnišćow jenož hišće tři njewobsadźene. Šěsć nowych domow je nimale dotwarjenych, a tuchwilu tam kromy pućow plestruja a wobswětlenje instaluja.
Njewšědna namakanka
Wóspork. Nawoda Wósporskeje poprjancarnje Sebastian Walther je na hornjej łubi muzeja drohoćinku namakał. Wčera přepoda wón Sakskej krajnej bibliotece dźewjeć spisow z reformaciskeho časa. Dotal běchu fachowcy z toho wuchadźeli, zo su wone zhubjene. Su to wosebje prědowanske dokumenty ze 16., 17. a 18. lětstotka.
Nowe předsydstwo wolili
Kulow. Towarstwo United Clubs for Kulow ma nowe předsydstwo. Martin Kretschmer naslěduje Phillipa Koplanskeho na čole zjednoćenstwa młodźinskich klubow Kulowa a wokoliny. Dalši nowi čłonojo předsydstwa su městopředsyda Matthias Kliemank, pokładnik Franz Wiedemann kaž tež za zjawnostne dźěło zamołwity Ławrjenc Lipič a inwentarnik Daniel Šiman.
Psy w azylowym domje dowolene
Praha. Lětsa smědźa bjezdomni w čěskej stolicy prěni raz do azylowych domow tež swoje psyče lubuški sobu wzać. Dotal běchu mnozy z přičiny zakaza dobrowólnje zwonka přebywanišćow na hasy zwostawali. Po lětušim přepytowanju ma Praha něhdźe 3 250 bjezdomnych, za cyłu Čěsku republiku trochuja jich ličbu na něhdźe 24 000.
Podhladnych zwěsćili
Budyšin. Sakska policija je w zhromadnym dźěle ze zastojnikami z Čěskeje a Pólskeje móhła w naležnosći manipulowanych bankomatow w Budyskim a Zhorjelskim wokrjesu štyrjoch podhladnych zwěsćić. Wšitcy štyrjo su z wuchodnych krajow. Wumjetuja jim manipulaciju bankowych awtomatow w znajmjeńša 22 padach, zdźěla Zhorjelska policajska direkcija. Kaž wottam dale rěka, su wšitcy štyrjo skućićeljo po wšěm zdaću tež w Lipsku a we wjacorych městach Braniborskeje podobne njeskutki skućili. Policija tuž dale přepytuje.
Wojerowske Towarstwo za pěstowanje regionalneje kultury srjedźneje Łužicy je njedawno na hłownej zhromadźiznje w Nowej Łuce swoju dźěławosć minjenych měsacow bilancowało. Tak zhladowaše předsyda Werner Bejma mjez druhim na wuspěšne 28. jutrowne wiki we Wojerowskej Łužiskej hali z dobrymi kulturnymi poskitkami.
Zwjeselił je čłonow towarstwa wuslědk wot Załožby za serbski lud podpěraneho projekta „Módroćišć za šórcuchi Wojerowskeje drasty“. Runje w lěće připóznaća módroćišća jako kulturne herbstwo bě so kulturnemu towarstwu poradźiło rjemjeslnika za dosć komplikowany a lětdźesatki zabyty módroćišć zahorić, zo je so do dźěła dał. We wusahowacej kwaliće zhotowi wón dwubarbny ćišć na woběmaj bokomaj płatu. Dotal njeje znate, zo štó druhi w Němskej tajki wosebity ćišć poskića. Do toho pak dyrbjachu modele za ćišć w Połčnicy zhotowić dać, a to w dobrej kwaliće z třoch wšelakich drjewow.
Wojerecy (AK/SN). Wyši měšćanosta Wojerec Stefan Skora (CDU) k přichodnym wólbam wyšeho měšćanosty wjace njenastupi. Po dwěmaj wólbnymaj periodomaj so jeho čas w zastojnstwje hłowy Wojerec 31. oktobra 2020 skónči. To připowědźi Skora sam na spočatku zašłeho wuradźowanja měšćanskeje rady dźens tydźenja. „Wojerecy trjebaja młodeho rozsudźerja. Wo tym sym přeswědčeny“, rjekny 59lětny katolik. Jeho naslědnik ma dołhodobnje, bjez časoweho ćišća a zmužiće wužadanjam strukturneje změny a digitalizacije napřećo stupić. Wón ma ćežki proces ze stron města nawjedować. Hladajo na swoju starobu a dołhodobnu strukturnu změnu kaž tež kónc brunicy hač do lěta 2038, tak Stefan Skora zwurazni, je so wón takle rozsudźił.
Budyšin (UM/SN). Inwestoraj Jörg Drews a Gerald Lucas staj wčera dopołdnja Budyskemu krajnemu radźe Michaelej Harigej (CDU) symboliski kluč Budyskeho dwórnišća přepodałoj. Tak móže nětko wulki dźěl zarjadnistwa wokrjesa do twarjenja na tradicije bohateho domu, přećahnyć. Cyłkownje 220 sobudźěłaćerjow, předewšěm socialneho a młodźinskeho zarjada kaž tež zarjada za wustajowanje jězbnych dowolnosćow, w přichodnych tydźenjach do swojich nowych běrowow zaćehnje – dohromady je jich 110 stwow. K tomu přińdu wjacore rumnosće za wuradźowanja a techniku.
Zwjeseleny z noweho wobliča dwórnišća a z kwalitnje dobreho dźěła krajny rada Michael Harig zwurazni: „W njecyłymaj lětomaj bu jedne z najwažnišich twarjenjow města Budyšina we woprawdźitym zmysle słowa wuchowane.“ To rjekny krajny rada hladajo na staw dwórnišća do zahajenja twarskich dźěłow.
Nalěto 2014 běchu Budysku dwórnišćowu halu za zjawnosć zawrěli, po tym zo bě hižo wobmjetk z wjercha padał. Nětko postajeja jeje wobraz škleńčane galerije, skrónowane ze škleńčanej kuplu, přez kotruž so do běrowow dóstanješ.