Dźensa před 800 lětami podpisa Mišnjanski biskop Bruno II. wopismo, kiž mjenuje 13 zwjetša serbskich sydlišćow w Hornjej Łužicy a k tomu sydom małych Božich domow, kotrež Budyskej cyrkwi swj. Pětra a 1221 załoženemu tachantstwu podstejachu. Wšitke we wopismje mjenowane wsy su tam prěni króć pisomnje naspomnjene. Z łaćonskorěčneho dokumenta zhonimy, zo ma wjes Bukewicz jednu tajku mjeńšu cyrkej. Serbja mjenuja swoju wjes Bukecy. Podate wjesne mjena běchu po tym ze serbskeho pomjenowanja wotwodźeli.

Nětčiše němske mjeno Hochkirch jewi so prěni raz hakle 1368 jako Hoynkirch, štož na wysoko stejacu a daloko widźomnu cyrkej pokazuje. Klukš jako tehdy hižo wosadna wjes rěkaše 1222 kaž nětko Klix. 60 lět pozdźišo rěka w dokumenće wo knježku nad Klukšom „Waltherus de Kluiz“, w lěće 1334 mjenuje wopismo knježka Jenchin von Clux. Pochad mjena je tohorunja staroserbske Klukuš, mjez kerčinami ležaca městnosć.

Choćebuz (SN/CoR). Pod hesłom „Za serbsku kulturu a wuměłstwo“ je so minjeny kónc tydźenja prěni raz Syć młodych serbskich iniciatiwow zetkała. Choćebuski Kolektiw wakuum bě do Studija 26 a galerije Fango na dwudnjowske zetkanje přeprosył. Něhdźe 20 zastupjerjow mjez druhim z cyłkow Baraka z festiwala Nukstock, z techno-hudźbneho festiwala „Meta solis“, ze Swobodneho społka, ze Zhorjelskeje Lětnjeje filmoweje akademije, z Čornochołmčanskeho Krabatoweho młyna, z Lipšćanskeho Centruma za imersiwne medijowe wuměłstwo, hudźbu a technologiju, ectoplastica a Hitnesscluba a ze Serbsko-waliziskeho přećelstwa bě pódla.