Budyšin. „Bjez hudźby je cyrkwinske žiwjenje a je tež liturgija cyrkwje zrudna naležnosć“, wopisuje cyrkwinski hudźbnik Tomaš Žur zmysł swojeho mnoholětneho powołanskeho skutkowanja na zawěrno wuznamnym městnje. W Baćonju běše wón we wučerskej swójbje wotrostł, w Lipsku studij z wuznamjenjenjom absolwował a 42 lět při katedrali swj. Jadwigi w Berlinje jako renoměrowany tachantski organist skutkujo tež mjezynarodnje so profilował. Jako wuměnkar je wón dale požadany a zdobom wužadowacy interpret. Jako brilantny hudźbnik zarjadowa so wón tež lětsa zaso w rjedźe Budyskeho pišćeloweho lěća w Tachantskej cyrkwi swj. Pětra na Eulowych pišćelach. Minjenu srjedu witaše jeho superintendent na wuměnku Jan Malink serbsce na městno, hdźež bu jako šuler SRWŠ wot tehdyšeho tachantskeho kantora Gerharda Nöbela na pišćelach dale wukubłany.

Budyšin (SN/pdź). Něhdźe 500 milion ludźi je wšědnje w socialnej syći Instagram po puću. Tež mnoho, přewažnje młodych, Serbow so prawidłownje tam informuje a rozhladuje. Tuž njezadźiwa, zo ma nimale kóžda serbska skupina abo institucija tež Instagramowy account. Najwažniši kriterij za wuspěch tajkich stronow je ličba tych, kiž wobsahej stronow sćěhuja – tak mjenowani „followers“. Tute wšak poměrnje dokładnje wuprajeja, kelko ludźi z powěsćemi, kotrež na Instagramje šěriš, docpěwaš. Najwjetše tajke strony maja w Serbach wjace hač 1 000 followerow.

Tak na přikład Instagramowy account kampanje Sorbisch na klar. Něhdźe jónu wob tydźeń tu artikl wo zajimawym Serbje abo wo zajimawej skupinje, akciji abo podawiznje ze serbskim kontekstom wozjewja. Přewažnje pak w němskej rěči, wšako měri so kampanja na rozšěrjenje wědy wo Serbach w němskej ludnosći. Tak tež njezadźiwa, zo je wona strona z 1 918 followerami najwjetša mjez „serbskimi“ a ma samo módru hóčku. Z tutej Instagram signalizuje, zo jedna so wo za zjawnosć relewantnu instancu.