Biskopicy (SN/bn). Dr. Arnošt Wirth bu z čestnej plaketu města Biskopicy wu­znamjenjeny. Z medalju počesćuje tamniša měšćanska rada „wurjadne zasłužby za město a wobydlerjow. Myto spožča so wosobinam a/abo skupinam, kotřiž so w politiskim, socialnym, hospodarskim abo ekologiskim wobłuku čestnohamtsce na dobro Biskopic angažuja“, we wustawkach města rěka.

Arnošt Wirth bě wot lěta 1975 hač do 2004 chirurg w Biskopičanskej chorowni. Čestnohamtsce skutkowaše mjez druhim jako publicist, slědźacy předewšěm na polu lokalnych medicinskich stawiznow. Čłon Zwjazka serbskich wuměłcow a Serbskeho ewangelskeho towarstwa bě nimo toho wjelelětny radźićel frakcije SPD Biskopičanskeho měšćanskeho parlamenta kaž tež čłon Budyskeho wokrjesneho sejmika. 2017 bu do rady starostow iniciatiwy Serbski sejm powołany.

„W starobje pjeć lět sym w Budyšinje pod nawodom Friedemanna Böhme swój prěni solo spěwała“, powěda 19lětna Milena Wowčerjec z Nuknicy. Hižo na zakładnej šuli w Chrósćicach je wona na swjedźenju młodych talentow swój talent pokazała a pozdźišo w chórje Worklečanskeje srjedźneje šule so w spěwanju dale wu­kmaniła. „Sym dźakowna, zo dóstach stajnje trěbnu podpěru. Paralelnje k spěwanju nawuknych na gitarje hrać. Wje­selo je ćim wjetše, zamóžeš-li so sam na instrumenće přewodźeć.“ Na Nukničanskim jolka-swjedźenju móžeše wona hižo časćišo swoje spěwy předstajić.

Tež na rozmachu noweje serbskeje hudźby ma Milena swój podźěl. „Sym mjez druhim někotre title hromadźe ze Sku­pinu Astronawt natočiła. Najno­wši je spěw ,Njewjedra‘. Mam za dobre, zo su dźensa mnohe móžnosće, hudźbu a ideje zjawnje z druhimi dźělić móc.“ Hromadźe z Janekom Süßom z Wopakeje prezentowaše wona pod mjenom „Stainless“ serbske, němske a jendźelske covery. Wustupowałoj staj mjez druhim hižo na delnjoserbskej schadowance a w Budyskim hosćencu „Culinarium“.