Dobry, dołhi puć
Wuspěch na festiwalu w Čěskej
Nimale wulki serbski swjedźeń dožiwichu lubowarjo folklory kónc tydźenja na mjezynarodnym festiwalu w Stražnicy. Wjacore serbske kulturne skupiny běchu so mjenujcy na wulki festiwal do Stražnicy podali a tam stotki hosći zahorili. Pod hesłom „Za čěskimi horami“ předstajichu sobotu Serbski folklorny ansambl Wudwor, Serbska rejwanska skupina Smjerdźaca, Serbska folklorna skupina Sprjewjan, Přezpólni (na foće) a Lidova muzika z Chrastu zhromadnje dwuhodźinski pisany program. Za njón su wulki přiklesk žnjeli a na kóncu bu tež wulke serbske koło teptane.
Foto: Michał Law
Naraz kaž pupk swěta
Tež „pisane ptački“ Slepjanski jubilejny kónc tydźenja wobohaćili
Wuběrnje zorganizowany swjedźenski kónc tydźenja su hosćo a domoródni minjeny kónc tydźenja w Slepom dožiwili. Tam swjećachu nimo 9. mjezynarodneho festiwala dudakow zdobom róčnicu 750lětneho wobstaća serbskeje wsy. Zhromadna próca towarstwow wunjese tójšto zajimaweho a wotměnjaweho, štož pola wopytowarjow swjatka připóznaće a chwalbu wuwabi.
Dožiwjenja w Korutanskej wostanu na přeco
Impresije z přebytka Paula Georga-Gallwasa w Korutanskej, z regiona, hdźež so aktualnje europeada wotměwa
Što woznamjenja, so za čas njewěsteho přichoda we wobłuku dobrowólneje słužby do wukraja podać? Tele prašenje stajich sej jako 18lětny kónc junija lěta 2020, po tym zo sym runje maturu na Budyskim Serbskim gymnaziju złožił. W tym času dóstach e-mailku organizacije Don Bosco Volunteers, w kotrejž běše napisane, zo mje do swojeho projekta zapřijmu. Nažel móžachu mi jenož rjec, zo so projekt w Bayerskej wotměje a to zhromadnje z 25 dalšimi młodymi ludźimi. Na tym městnje dyrbjach so rozsudźić, hač podam so na studij abo hač so radšo tola dobrowólnej słužbje wěnuju. Po dołhim rozmyslowanju rozsudźich so za druhi mjenowany puć. Při tym njebě mi hišće wědome, zo wočakuje mje tu hač dotal najlěpši čas žiwjenja. Hladajo na stajne z koronu zwisowace změny, njemóžach sej woprawdźe předstajić, kak maja přichodne měsacy wotběžeć.
Chcyše serbsku identitu dokumentować
Budyšin (SN/CoR). Tež Hornjoserbam je dr. Annett Brězanec wčera wječor w Budyskej Smolerjec kniharni dohlad do dźenikow delnjoserbskeho fararja a narodneho prócowarja a Bogumiła Šwjele (1873– 1948) podała. Před wjace hač 15 lětami bě nawodnica Serbskeho kulturneho archiwa započała dźeniki wotpisać a do němčiny přełožić. Hakle po přewróće su wone ze zapada, z wobsydstwa přiwuznistwa do Łužicy přišli. Dr. Pětš Milan Jahn swójbu přeswědči, wozjewjenju rukopisneho zawostajenstwa přihłosować. Wuslědk prócowanjow je wjace hač 700 stron wopřijaca kniha „Aus dem Alltg eines wendischen Pfarrers“, z kotrejež je wčera lektor Ludoweho nakładnistwa Michał Nuk někotre serbsko- a němskorěčne pasaže Šwjele nimale 20 zajimcam, mjez nimi běštaj tež direktor Serbskeho instituta dr. Hauke Bartels kaž tež jeho zastupnica dr. Susanne Hozyna, přednjesł. Samo hłós narodneho prócowarja a sobuzałožerja Domowiny zaklinča, dźakowano nahrawanju z lěta 1929, wobchowane na CD „Schlagwort Wendisch“.
Dwurěčny wječork za Zejlerja
Lědma je huslerja, kiž zdobom spěwa – Paul Geigerzähler to ...
Oratorij z espritom předstajeny
Budyšin (CRM/SN). Jako njewšědnje skutkowne wopokaza so předstajenje duchowneho oratorija „Paulus“ wusahowaceho zastupjerja němskeje hudźbneje romantiki Felixa Mendelssohna Bartholdyja (1809–1849) minjenu njedźelu wječor w Tachantskej cyrkwi swj. Pětra w Budyšinje. Pod dirigatom cyrkwinskeho hudźbneho direktora Michaela Vettera bě do grandiozneho koncerta z wjele espritom wjace hač sto sobuskutkowacych zapřijatych. W kwarteće spěwachu sopranistka Franziska Boby z Erlangena, altistka Stephanie Hauptfleisch z Drježdźan, tenor Falk Hoffmann z Lipska a basist Johannes Wohlrab z Magdeburga. Wulki nošny chór tworješe Ewangelska kantornja swj. Pětra w Budyšinje. Orchester Serbskeho ludoweho ansambla team sobuskutkowacych wudospołni. Na zjawnej pjatkownej generalce hraješe kantor katolskeje tachantskeje wosady Kamil Maksymilian Kulawik na pišćelach, mjeztym zo přewza tutón part njedźelu młody serbski cyrkwinski hudźbnik Johannes Krahl.
Mólbu prěni raz zjawnosći pokazali
Grandiozny dypk za 70. Lessingowymi dnjemi
Kamjenski literarny publikum je na zarjadowanje minjenu srjedu dołho čakać dyrbjał. Korona bě drje mnohe terminy znjemóžniła, nic pak ideje zahoritych zarjadowarjow z tudyšeho dźěłanišća „Recepcija Lessinga“. Awtor Carsten Gansel je ze swojim pojednanjom w Berlinskim nakładnistwje Gailiani wušłeje knihi „Dźěćo ćežkeje doby“ grandiozny kónčny dypk za 70. Lessingowymi dnjemi w Kamjencu sadźił.
Wo jeho mnohostronskich rešeršach za tule wobšěrnu twórbu je so wědomostna sobudźěłaćerka Birka Siwczyk z awtorom Carstenom Ganselom rozmołwjała. Jenož tak móžeše so wón dźěćatstwu a młodźinje Otfrieda Preußlera zbližić, jednoho z najpopularnišich němskich awtorow dźěćacych a młodźinskich knihow.
