„6 prašenjow na ... bywšich jatych“
Budyšin (SN). W nowym internetnym poskitku Budyskeho wopomnišća „6 prašenjow na ... bywšich jatych stasijoweho jastwa Budyšin II“ wotmołwjeja wšelakori bywši jeći na samsne prašenja na samsnym městnje. Interviewy wotměja so w dohladowanskej klětce – městno to, do kotrehož njesmědźachu jeći w času jatby ženje zastupić.
W rjedźe so wožiwjeja wosobinske dopomnjenki na čas jatby. Nastanje tak wobraz z wida žonow a muži wo tym, što je so we wšelakorych časach w stasijowym wosebitym jastwje Budyšin II wothrało. Nimo toho dóstanu přihladowarjo tež dohlad do wosobinskeho dóńta potrjechenych a zhonja, kotre sćěhi zajeće za jednotliwca a jeho swójbnych měješe.
Powědaja Gabriele Zimnak – politiska jata wot 1984 do 1986, Hermann Reisch – politiski jaty wot 1984 do 1987, Jens Leck – politiski jaty wot 1978 do 1982 a Thomas Lukow – politiski jaty wot 1981 do 1983. Digitalny poskitk je na internetnej stronje wopomnišća přistupny. Koncept je nawodnica institucije Silke Klewin spisała, wo kameru a zwuk postara so Konrad Schwerk.
Klankodźiwadłowy festiwal dar za dźiwadło a za město
Budyšin (CS/SN). Wjace hač 80 wuměłcow z Pólskeje a Němskeje je na podlěšenym kóncu tydźenja Budyšanam a jich hosćom při prěnim klankodźiwadłowym festiwalu pod hołym njebjom na dróhach sprjewineho města njezapomnite dožiwjenja wobradźiło. Hižo štwórtk su klankodźiwadźelnicy wot tamnišeje měšćanskeje štwórće Strowotneje studnje přez Žitne wiki na Hród ćahnyli. Intendant zarjadowarja Němskeho-Serbskeho ludoweho dźiwadła Lutz Hillmann při tym pasantow na podawk skedźbnješe. Pilni pomocnicy rozdźělichu programowy zešiwk, zo by potencielny publikum swój klankodźiwadłowy kónc tydźenja planować móhł. Na Žitnych wikach su sobuskutkowacy zastali, zo bychu młodźi a starši přihladowarjo wjesołe marionety a nadměru wulke čorne hłowy zeznać móhli.
Jubilarce k 80ćinam gratulowała
Něhdźe 150 přihladowarjow je wčera we Wochožanskim parku ...
Dobry rozrost w běhu sto lět
Njeswačidło (ML/SN). Towarstwo pčołarjow Njeswačidło „Nad Čornicu“ swjeći lětsa swoje stote wobstaće. W domizniskim muzeju wsy wotewrěchu 4. jutrownika wosebitu wustajeńcu wo pčołarstwje w gmejnje a wokolnych wsach, wo čimž Serbske Nowiny 5. apryla hižo wobšěrnje rozprawjachu. Přewšo zajimawe je sćěhować wuwiće pčołarskeho towarstwa, wo kotrymž staj Serbskim Nowinam tež nětčiši předsyda Křesćan Budar a jeho předchadnik Eckehard Hübner, kiž ma 16 pčołarskich ludow, powědałoj.
Před sto lětami přisłušeše towarstwu, wo kotrehož załoženju běchu Serbske Nowiny 1. awgusta 1922 pisali, 18 čłonow. Woni wobsedźachu tehdy 130 ludow pčołkow. Tole swědčeše wo čiłym zajimje ludźi z Njeswačidła a wokoliny za pčołarstwo. Předsyda towarstwa bě wučer Jan Koškar, kotrehož su bórze po tym za nawodu cyrkwinskeje šule Njeswačidło powołali. To bě zdobom dopokaz, zo časćišo wučerjo, haj samo fararjo we Łužicy rady pčoły plahowachu.
„Sotra 2.0“
Budyšin (SN). Wužiwarjam přełožowanskeho programa „sotra“ skići so wotnětka jasnje lěpša kwalita přełožkow a modernizowany, přehladniši wužiwarski powjerch strony pod .
Z přestajenjom wot dotalneho statistiskeho na neuronalny přełožowanski system su přełožki w cyłku přirodnej rěči bliže a wobsahuja w serbšćinje kaž tež w němčinje mjenje zmylkow. Nimo toho hodźi so přichodnje wjace znamješkow (6000) w krótšim času přełožić. Dotalne problemy z negaciju abo wopačnymi kóncowkami so lědma hišće jewja. Wužiwany neuronalny system je tak efektiwny, zo hodźi so hišće lětsa tež delnjoserbski dźěl přełožowanskeho programa zjawnosći spřistupnić. Z tym je „sotra“ nastupajo kwalitu mjeztym na podobnej runinje kaž komercielne přełožowanske programy.
Znate funkcije kaž prawopisna kontrola steja dale k dispoziciji. Zakład systema „sotra“ twori nadal w Rěčnym centrumje WITAJ zdźěłana zběrka dwurěčnych sadow, kotraž je mjeztym na 300 000 paralelnych sadow rozrostła. Neuronalny system złožuje so nimo toho na wobšěrne jednorěčne tekstowe daty z wobeju rěčow.
Serbske zynki hódnje předstajili
55. Wojerowske hudźbne dny z koncertom hudźby Serbow wobohaćeny
We wobšěrnym programje 55. swjedźenskich dnjow hudźby we Wojerecach wot 10. apryla hač do 1. meje běše tež tónraz hudźba Serbow swoje městno namakała. W komornym koncerće z Heidemarju Wiesnerec a dalšimi interpretami na swjedźenskej žurli hrodu wutoru, 26. jutrownika, njepřekwapichu jenož z programom na zwučenym wysokim niwowje, ale mjez wubranymi twórbami běchu tež zajimawe wurywanki, poskićene wot za nas dotal zdźěla njeznatych interpretow.
Dwójce dobra bilanca
Wojerecy (SiR/SN/CoR). Z finalnym koncertom su so minjenu njedźelu 55. Wojerowske hudźbne dny na wulkej žurli tamnišeje Łužiskeje hale zakónčili. Bě to zdobom swjatočny koncert składnostnje 60. róčnicy załoženja Wojerowskeho sinfoniskeho orchestra. K jubilejej je Łužiska hala ćělesu wulku tortu a wo-hnjostroj dariła. Pod nawodom Evy Meitner su mjez druhim twórby Franza Schuberta, Ernsta Sachsa a Johanna Straußa přednjesli. Solistaj běštaj Fritz Vogel na pozawnje a Christoph Geibel na wiolinje. „Bě to jara emocionalne zarjadowanje, wolóženje pola hudźbnikow a publikuma bě pytnyć. Wšitcy so wjesela, zo su zaso zarjadowanja“, měnješe wjelelětna projektowa nawodnica hudźbnych dnjow Carmen Hoffmann. Bilanca lětušeho festiwala derje wupada. Na jědnaće wot planowanych dwanaće koncertow su dohromady něhdźe 1 900 wopytowarjow witać móhli.
Profundna přiručka serbskeje wopomnjenskeje kultury
Budyšin (SN/CoR). Něhdźe 30 zajimcam je Trudla Malinkowa wčera wječor w Budyskej měšćanskej knihowni přewšo zajimawy dohlad do swojeje najnowšeje publikacije „Sorbische Denkmale – Handbuch sorbischer Gedenk- und Erinnerungsstätten“ podała. „Kniha njepředstaja jenož pomniki a napjate stawiznički wokoło nich, ale wopisuje tež wuwiće wopomnjenskeje kultury. Nětko na nas zaleži, wědu přichodnym generacijam dale dać“, wuzběhny jednaćel Ludoweho nakładnistwa Domowina Syman Pětr Cyž w swojich witanskich słowach. Lektor Michał Nuk podšmórny wuznam stawiznow za identitu.
