Bórkowy (SN/bn). Serbski ludowy ansambl je swój kóždolětny wjeršk pod hołym njebjom w Delnjej Łužicy wuspěšnje zakónčił. Minjeny kónc tydźenja je sej na cyłkownje třoch předstajenjach dohromady něhdźe 5 200 wopytowarjow inscenaciju rjadu Błótowske powěsćowe nocy „Nawrót“ wobhladało. Produkcija bu znowa w kooperaciji z Turistiskej informaciju Bórkowy na jewišću pod tamnišej Bismarckowej wěžu zwoprawdźena a wo­spjet wot ministerstwa za wědomosć, slědźenje a kulturu Braniborskeje kaž tež wot Załožby za serbski lud spěchowana.

Čiłe rozmołwy – kaž tu mjez wuměłču Hellu Stoletzki (srjedźa), jeje nanom a dr. Jürgenom Wenglerom (naprawo) – wuwiwachu so minjeny pjatk na wotewrjenju wustajeńcy „Serbscy wuměłcy a Serbja we wuměłstwje“ we Łužiskej wuměłstwowej hali w Choćebuzu. Widźeć su serbscy molerjo 20. lětstotka kaž Fryco Latk, Alfred Janigk, Conrad Felixmüller a Jurij Hajna/Georg Heine kaž tež wuměłče a wuměłcy našeho časa Iris Brankačkowa, Hella Stoletzki a Jan Buk. Ale tež wid němskich na serbski žiwjenski swět posrědkuje wosebita wustajeńca hač do 3. septembra.

Foto: SN/Hanka Šěnec

Elewka Činohrajneho studija Němsko-Serbskeho ludoweho dźiwadła Sarah Cyžec hotuje so pod režiju Ralpha Hensela na premjeru inscenacije „Pink Guerilla“. Štwórtk, 9. junija, chce wona w 19.30 hodź. na jewišću Budyskeho Dźiwadła na hrodźe přihladowarjam jako solistka swoje hrajerske kmanosće prezentować. Kruch Daniela Rattheija powěda w přełožku Lubina Hajduk-Veljkovićoweje stawiznu 16lětneje Sunny, kotraž so njelubozneho dožiwjenja dla dźeń a hłubšo w prawicarskich strukturach a wotpowědnych internetnych forumach zašmjatuje. Dohromady chcedźa produkciju štyri króć předstajić. Foto: SN/Hanka Šěnec

„Spěwam hižo wot zažneho dźěćatstwa. Přez to, zo nawuknych na klawěrje hrać, sym so sama přewodźała a nowe spěwy nazwučowała. To běchu zwjetša jendźelske popowe spěwy. Wosebity podawk za mnje bě, jako bě mi mój firmowanski kmót Syman Hejduška dobropis za profesionelne natočenje spěwa w studiju darił. Wot tutoho časa sym přeco wjace serbskich spěwow pisała a spóznała, kajku radosć mi to dawa“, powěda 20lětna Helena Hejduškec z Hory. Jeje pasija za hudźbu zbudźi so tohorunja přez spěwanje w chórach, tak na přikład w dźěćacym chórje Serbskeho gymnazija Budyšin abo tež w Prěnjej serbskej kulturnej brigadźe. Dźensa nawjeduje młoda Serbowka sama serbsku šolu w Baćonju. Helena Hejduškec, kotraž da so tučasnje na chorobnu sotru wukubłać, zamó swój talent tohorunja hižo za mnohe produkcije Serbskeho rozhłosa wopokazać. Přede­wšěm pak tež live-spěwanje Horjanku wozboža. Tak steješe wona prěni króć scyła při jubileju dujerskeje kapały Horjany na jewišću – pozdźišo ze skupinami kaž Trio a Kumple abo Sorbian Art Trio.