Budyšin/Kamjenc/Wojerecy (SN/bn). Ze spočatkom lětušich zymskich prózdnin su muzeje Hornjeje Łužicy swoje ferialne poskitki za šulerki a šulerjow zahajili. Tak je dźensa něhdźe 10 zajimcow we wobłuku programa „Klinčace wobrazy a mozaik“ Budyskeho Serbskeho muzeja zhromadnje pasliło a molowało kaž tež z tworjenjom a žiwjenjom Jana Buka so zeznajomiło. Za tydźeń slěduje identiske zarjadowanje, za kotrež su hišće přizjewjenja móžne (hlej https://sorbisches-museum.de).

Tohorunja dźensa je z „Bronzowej dźěłarničku“ prózdninski program Muzeja zapadneje Łužicy w Kamjencu startował. Dnjej pozdźišo slěduje poskitk „Pohlad za kulisy“, mjez druhim z wodźenjemi po preparaciskej dźěłarni a po archeologiskich magacinach. 21. februara wuhotuja dźěłarničku „Upcycling – Nowe ze stareho sam zhotowjeć“, 23. februara zakónča program z „Wohnjowym alarmom w muzeju“. Wšitke zarjadowanja započnu so w 14 hodź. a traja něhdźe 90 mjeńšin, popłatk wučinja stajnje 4,50 eurow. Přizjewjenja su pod www.museum-westlausitz.de móžne.

Łuchow (SN/bn). Wědomostnica w Serbskim instituće (SI) dr. Jenny Hagemannowa je njedawno w hamtskim domje we Łuchowje/Lüchowje (Wendland) něhdźe 60 připosłucharjam, mjez kotrymiž bě tež zastupjer Domowiny, wuslědki swojeje disertacije „Zdźědźene krajiny“ předstajiła. Za swoje doktorske dźěło bě Hagemannowa we Wendlandźe a we Łužicy slědźiła a wjacore interviewy přewjedła. W swojej transdiciplinarnej, na Leibnizowej uniwersiće Hannover nastatej disertaciji wobjednawa awtorka přiswojenje a wužiwanje regionalneho kulturneho herbstwa we Wendlandźe a we Łužicy w přirunanju. Připódla „nastawaja při tym komprimowane małe přehlady wo słowjanskich wobsydlenjach, wo serbsko-němskich stawiznach a wo pochadźe kulowcow (Runddörfer), modernych žadosćow, idylkach, spjećiwosćach, projektach, ale wo tež starodawnych tradicijach a widach. Wona wotwěra naš wid na sebje samych, kak ze swojim regionalnym herbstwom wobchadźamy – abo tež nic.

11. małeho róžka před 25 lětami zemrě komponist a rozhłosownik Beno Njekela. Wón narodźi so 5. winowca 1934 w Kulowje jako syn woblubowaneho ludoweho herca. Njekela wopyta gymnazij w čěskich Warnoćicach. Po maturiće studowaše na Hudźbnej wysokej šuli w Lipsku. 18 lět wěnowaše so w Serbskim rozhłosu w Choćebuzu jako hudźbny redaktor, žurnalist a producent wuwiću serbskeje hudźby a natwari tež rozhłosowy archiw. 5 000 titlow ludoweje, zabawneje, koncertneje a klasiskeje serbskeje hudźby na zynkopaskach a CDjach je archiwował a tak drohotne kubło našeho ludu zachował. Zamołwiće organizowaše wulkotne Rozhłosowe koncerty serbskeje hudźby z tajkimi sławnymi ćělesami kaž Wulkim rozhłosowym sinfoniskim orchestrom Lipsk a Poznańskimi sołobikami. Skomponował je Njekela na 80 kompozicijow koncertneje, komorneje, orchestroweje hudźby, melodije na zabawne spěwy a šlagry. Jeho najznaćiši ­šlager je „Pod Kulowom we holi“. Dale wobdźěłaše wón tójšto twórbow.

Zymske prózdniny so bliža. Tón abo tamny dojědźe sej do zymskeho dowola a wjeseli so na tójšto sněha k sněhakowanju abo sankowanju. Runje tak čitanje a wuchodźowanje wočerstwjenju słužitej. Tuž móžu tu abo tamnu knihu doporučić.

Zawěsće sej někotryžkuli na městnje dowola tež tamnišu cyrkej a kěrchow wobhlada. Awtorojo Kai Wenzel, Heinz Henke a Christoph Kretsch­mer z Budyšina su napisali knihu „500 ­Jahre Taucherfriedhof Bautzen“. Kniha je jako pjaty zwjazk w rjedźe „Spisy Archiwoweho zwjazka Budyšin“ w nakładnistwje Mitteldeutscher Verlag Halle wušła. Na zakładźe tutoho wjednika hodźa so stawizny kěrchowa derje sćěhować. Njefaluja tež wopisanja rownišćow znatych serbskich a němskich wosobinow města Budyšina.

Fararka na wuměnku Sabine Bauer-Helpert, narodźena w Šěrachowje, je wotrostła a dźěłała w zapadnym dźělu Němskeje. 2016 poda so na wuměnk a přesydli so do Zhorjelca. „Görlitzer Spaziergänge. Eine Neubürgerin entdeckt ihre Stadt“ mjenuje wona swój pućnik po měsće.