Sobotu 27.2. 17:00 Zapustowy stream w němskej rěči na Youtube

Njedźelu 28.2. 8:30 Kemše w livestreamje z Kulowa

  9:00 Kemše w livestreamje z Chrósćic

Póndźelu 1.3. 19:30 Měšćanska rada Kamjenc

Póndźelu 1.3. 19:30 Onlinowy ekumeniski póstny seminar Smochčanskeho kubłanišća swj. Bena na temu „Swoboda a zamołwitosć křesćanskeho čłowjeka. Kak móžemy zhromadnje žiwi być?“ z Thomasom Martolockom a Friedemannom Wenzelom

Pjatk 5.3. 17:00 Swójbne kino na stronje schadźowanka.de z filmom­ „Karla & Katrina“

Sobotu 6.3. 14:30 Wirtuelne serbske swójbne popołdnjo z wóskowanjom jejkow na stronje schadźowanka.de

Njedźelu 7.3. 8:30 Kemše w livestreamje z Kulowa

  9:00 Kemše w livestreamje z Chrósćic

Ptači kwas w Delnjej Łužicy

Budyšin. Serbski ludowy ansambl je druhi dźěl swojeho „Kofeja w blidarni“ wozjewił. W nim dopominataj so Alena Farkašowa a Rüdiger Žur na wusahowace wokomiki wječornych ptačokwasnych programow w Delnjej Łužicy. Połhodźinska produkcija wopřijima nimo toho spomnjeće na „starbrašku“ Bjarnata Rjentša a interview z wjelelětnym wjesnjanostu Hochozy Frycom Wojtkom, kiž přeradźa, što za mjeztym „legendarnej hubku na jewišću“ tči. Widejo w delnjoserbšćinje z němskimi podtitulemi je pod www.ansambl.de přistupny.

Łužiski zapust w streamje

Picnjo. Kak delnjołužisku tradiciju zapusta najebać pandemiju hajić? Přede­wzaćelske drustwo Fetenfabrik je z wjacorymi lokalnymi akterami digitalny swjedźeń organizowało, kotryž chcedźa jutře, 27. februara, live w interneće wusyłać. Program wopřijima mjez druhim dujersku hudźbu a prezentaciju serbskeje narodneje drasty. Stream započnje so w 17 hodź. na www.youtu.be/iASBzjwH950.

Za dorostowych rozhłosownikow

njedźelu hornjoserbsce

11:00 Łužica tutón tydźeń

11:20 Imunologa Marko Hančik powěda

11:45 Ze sudnistwa: Nadpady na serbskich młodostnych

12:00  Nabožne wusyłanje

(Tomasz Dawidowski)

po tym zbožopřeća

delnjoserbsce

12:30  Aktualny magacin, mjez druhim z přinoškom wo digitalnym zapusće w Hochozy

13:00 Tematiske wusyłanje: Pišćele jako instrument lěta

13:40 Nabožne wusyłanje

(Hartmut Leipner)

po tym zbožopřeća

„Tabu“ wirtuelnje sej zahrać

Budyšin. Na wirtuelnu partiju woblubowaneje hry „Tabu“ přeprošuje Budyska wotnožka Sakskeho wukubłanskeho a wupruwowanskeho (SAEK) kanala jutře, sobotu, w 17 hodź. Přistup je na stronje schadźowanka.de móžny, hdźež nańdu zajimcy nimo toho dalše wólnočasne poskitki za cyłu swójbu. Mjez druhim wuhotuje SAEK tam „Serbske kino w póstnym času“ a „Warjenje z Rafaelu“.

Na młodźinske kemše

Róžant. Młodźinske dekanatne dušepastyrstwo wuhotuje jutře we 18 hodź. w Róžeńčanskej swjatnicy kemše za młodostnych. Tema Božeje mšě budźe roze­stajenje z načasnymi prašenjemi cyr­kwje. Dekanatny kružk kemše hudźbnje wobrubi.

Klub w dobrej stwě

Budyšin. Štóž so za klubowej atmosferu a elektroniskej hudźbu žedźi, tomu skići Budyski kolektiw FirleTanzFreaks jutře wot 20 hodź digitalnu alternatiwu. Dohromady štyri DJjojo, kotřiž su dotal mjez druhim w barje Sundowner a we wobłuku Budyskeho nalěća tačele napołožili, kaž w žanru rěka, chcedźa publikum z technom a house zahorić, wusyłajo live z Kamjentneho domu. Wjace pod steinhaus-bautzen.de