Zapokazaja superintendenta

Hodźij. Ze swjedźenskej Božej mšu w Hodźijskej cyrkwi swj. Pětra a Pawoła budźe na reformaciskim dnju, 31. oktobra, w 14 hodź. nowy serbski superintendent Krystof Rummel do zastojnstwa za­po­kazany. 47lětny naslěduje super­inten­denta Jana Malinka, kiž je so w lěću na wu­měnk rozžohnował. Rummel je dwanaće lět dołho Hodźijski wosadny farar a budźe dźěło tež dale wukonjeć. Tu je hakle jako dorosćeny serbšćinu nawuknył. Do to­ho bě mjez druhim jako młodźinski farar w Rudnych horinach skutkował.

Dalši žarowanski kruh

Chrósćicy. Žarowanskaj přewodźerjej Regina Krawcowa ze Smječkec a Tomaš Pěčka ze Sernjan poskićataj znowa serbski žarowanski kruh. Prěnje zetkanje budźe­ štwórtk, 5. nowembra, w 17 hodź. w Chróšćanskej putniskej hospodźe. Zajim­cy měli so pola hospicneje słužby w Kamjencu pod tel. čisłom 0 35 78 / 37 43 12 abo pola Reginy Krawcoweje pod čisłom 01 74 / 7 01 94 87 přizjewić.

Wustajeńca pozdźišo

Z Wjelećina pochadźacu Evu Gaeding zna­ja mnozy jako swobodnu awtorku, mjez druhim skutkuje za sćelak MDR. Popra­wom pak je wona studowana molerka. Jeje­ twórba „Acker“ na aktualnym titulu Rozhlada poda dohlad do jeje skutko­wanja. Archeologowka Katharina Schmeiduch dźěła wot julija w mjeztym zaso wote­wrjenym Radušanskim słowjanskim hrodźišću. W interviewje powěda wo archeologiji, wo swojim slědźerskim projekće – zwukowych šćerkotawach – a wězo wo swojim nowym městnje skutkowanja.

Nastupajo napjate połoženje kornakrizy dla dóńdźe w někotrych serbskich katol­skich wosadach k změnam. Tak změja w Chrósćicach njedźelu zaso po zwučenym wašnju kemše. Božu słužbu wusy­łaja w interneće přez livestream. Wot­­powědny link Katolski Posoł pod www. posol.­de wozjewi. Kaž pak farar­ Měrćin­ Deleńk­ zdźěli, nyšpor ze žohno­wanjom rowow­ Wšěch swjatych njedźelu njebudźe, jón na pozdźiši termin přestorča.

W Radworju změja na swjedźenju Wšěch swjatych njedźelu, 1. nowembra tež zaso kemše po zwučenym wašnju w 9 hodź. (serbsce) a w 10.30 hodź. (němsce).­ Žohnowanje rowow 1. nowembra tam a 2. nowembra w Zdźěri tohorunja njebudźe. Wobrjad pozdźišo nachwataja. K wopomnjeću Chudych dušow póndźelu, 2. nowembra, budźe w Radworju Boža mša we 18.30 hodź. W Zdźěri kemšow njebudźe. Cyrkej w Radworju je wodnjo stajnje k wosobinskemu modlenju wotewrjena, zdźěla Katolski Posoł.

W Ralbicach su kemše na swjedźenju Wšěch swjatych njedźelu, 1. nowembra, w 10.30 hodź. Nyšpor je w 14 hodź. Boža mša k wopomnjeću Chudych dušow z požohnowanjom rowow njebudźe póndźelu, 2. nowembra, ale pozdźišo.