Z wudaća: pjatk, 12 januara 2018

Njezbožo strowotneho problema dla

Jitk. Njekedźbliwosć abo přewulka spěšnosć njeběštej zawčerawšim po připołdnju přičina wobchadneho njezboža, kotrež sta so na kromje Jitka: 79lětny wodźer Golfa bě tam w prawej křiwicy na lěwym boku jězdnje frontalnje do štoma zrazył. Kaž Zhorjelska policajska direkcija zdźěli, bě šofer do toho tak mjenowany cokorowy šok poćerpjeł. Wón kaž tež jeho 77lětna sobujěduca so při zražce zraništaj, a wobeju dowjezechu do chorownje, hdźež jeju lěkarsce zastarachu. Kaž w zdźělence policije dale rěka, nětko přepytuja, hač bě muž snano lochkomyslnje jed­nał.­ Na wosobowym awće nasta ně­hdźe 6 000 eurow škody. Dokelž njebě hižo kmane dale jěć, dyrbjachu je wot­wlec.

Rowno (JoS/SN). Wot spočatka tohole tydźenja knježitej na Rownjanskim Njepilic statoku hołk a tołk. Tam přihotuja jutřiše swinjorězanje. Mjeztym 17. tajke zarjadowanje lubi zaso wulki wuspěch. Wutoru započachu kołbasu měšeć a do črjewow a škleńcow pjelnić. „Dźěła je dosć“, praji předsyda spěchowanskeho towarstwa Njepilic dwór Manfred Nikel. „Prócujemy so telko kołbasy dźěłać, zo nichtó z prózdnymaj rukomaj domoj hić nje­trjeba.“ Nimale wšitkich 40 čłonow towarstwa je zapřijatych, wšako trjebaja rěznicy tójšto pomocnikow, šoferow, tepjerjow a žony, kotrež wulku ličbu na­pjelnjenych škleńcow sortěruja. Dalši wjesnjenjo tohorunja pomhaja. Za zhotowjenje kołbasy maja mjeztym nowe mašiny a připrawy, kotrež nětko hišće lěpje hygieniskim žadanjam nastupajo žiwidła wotpowěduja.

Nałožki a tradicije pěstować je ludźom we Łužicy wažne. Tak widźiš hižo nětkole na někotrych wsach camprowarjow zymu wuho­njeć a nalěćo witać. Wobydlerjo Pěchča (Pechern) w gmejnje Krušwica su tradicionelnje prěni w běhu lěta, kotřiž w swojich pisanych a lóštnych kostimach camprujo po wsy chodźa (na wobrazu). Bórze tež na wsach wokoło Wojerec, kaž na přikład w Blunju, camprowansku sezonu zahaja. Foto: Joachim Rjela

Nowe lěto je drje hižo dwanaće dnjow stare­,­­ přiwšěm chcu tři delnjoserbske nowostki předstajić, kotrež su hišće w dwanatym měsacu lońšeho lěta wušli.

Znata a woblubowana rozhłosownica Jutta Kaiserowa z Górow w Bórkowskej gmejnje běše lětdźesatki po domiznje z mikrofonom po puću. Jeje powołanske kredo bě: „Sćerpnje přisłuchać, to wuznamjeni žurnalista. Tak mnohe lěpje rozumiš, a to nic jenož rěčnje.“ Z jeje bohatych dožiwjenjow a nazhonjenjow je nastała kniha „Ducy pó domowni. Spomnjeńki repor­tarki“. Čućiwje a wobrazliwje pisa w njej wo našich wsach a ludźoch, ry­suje bjez čornoběłeho molowanja małe a wulke podawki, na přikład powójnske wu­wiće ratarstwa. Takle radźi so jej, ze sta­wizničkami stawizny wěrnje předstajić.

njedźelu hornjoserbsce

11:00 Łužica tónle tydźeń, mjez druhim wo jolka-swjedźenju 

11:20 Minority SafePack – Wo čo poprawom dźe?

11:45 Hudźba k njedźeli

12:00 Nabožne wusyłanje

 (Wito Sćapan)

po tym zbožopřeća

delnjoserbsce

12:30 Aktualne powěsće

13:00 Wróćozhladowanje

 na lěto 2017 (2. dźěl)

13:30 Nabožne wusyłanje

 (Hartmut Leipner)

po tym zbožopřeća

Pjatk 12. do 14.1.  Přehladka modelowych železnicow w Lubijskej wikowej hali

  19:45 „Lěto pčołarja“ – Konječan Jan Šołta přednošuje w Chróšćanskej putniskej hospodźe

Sobotu 13.1. 10:00 Tradicionalne swinjorězanje pod hesłom „Kak to jo­ bylo“ na Rownjanskim Njepilic statoku

  14:00 Dźeń wotewrjenych duri we Wóslinčanskej šuli

  15:00 Přednošk „Wohrožena mnohostronskosć – naše dźiwje pčołki a jich škit“ w Muzeju Budyšin

  16:00 Dźěćace kino w Chróšćanskej putniskej hospodźe

  17:00 Nowolětny koncert z chórom Pisany swět w Budyskim Gersdorffskim palaisu

  20:00 Jolka-swjedźeń w Nuknicy

Njedźelu 14.1. 10:00 Kwasne wiki „Haj, ja chcu“ w Choćebuzu

  10:00 Pućowanje z Čornym młynkom po Čornym Chołmcu

  16:00 Předstajenje komedije „Kurowa klinika ,Wjesoła mysl‘“ lajskeje dźiwadłoweje skupiny Šunow-Konje­cy w Radworskim hosćencu „Meja“

  16:00 Wosebity koncert k nowemu lětu na Wojerowskim hrodźe

  16:00 Nowolětny koncert z Nowej Łužiskej filharmoniju na žurli Kamjenskeho hotela „Město Drježdźany“

  17:00 Koncert chóra Slavica z chórom Lipa w Drjež­dźan­skej cyrkwi Třoch kralow

Póndźelu 15.1. 19:00 Dny Messiaen w Zhorjelskim Europskim centrumje dopomnjeća, kultury a kubłanja

Budyšin (SN). Wot awgusta budźe Judith Kubicec jako intendantka Budyski Serbski ludowy ansambl nawjedować. Dotalna jednaćelka ansambla Diana Wagnerec twori w přichodźe zhromadnje z njej nawodnistwo. Judith Kubicec je jako dirigentka po cyłym swěće prašana a bu loni z čestnym mytom Royal Academy of Music w Londonje wuznamjenjena. Wo podpisanju zrěčenja ze Załožbu za serbski lud wusyła januarske Wuhladko jutře w 11.45 hodź. Dalše temy serbskeho maga­cina telewizijneho sćelaka MDR su złoty­ měšniski jubilej Baćońskeho fararja Gerata Wornarja, Dom swj. Wincenta w čěskim Dolnim Podluží a pjenjezy z programa Leader za rjeńše wsy.

„Jolka“ swjeći jubilej

Nuknica. Lubowarjo šćipateho serbskeho humora a słódneje jědźe su jutře, 13. januara, zaso do Nuknicy přeprošeni: na 20. jolka-swjedźeń. Jako hesło su sej za­rjadowarjo „20 lět jolka – tajki cirkus“ wumyslili. Program započnje so w 20 hodź., zastup je wot 18 hodź.

Do šule załožić

Wóslink. Wjednistwo Wóslinčanskeje srjedźneje šule přeproša staršich a dalšich zajimcow, zo bychu jutře w 15 hodź. do kubłanišća załožili. Wot 15.30 hodź. předstaja šulerjo w jědźerni mały program. Wučerjo wjedu wopytowarjow rady­­ po rjadownjach a na jich prašenja tež k serbskej wučbje wotmołwjeja.

Koncert w palaisu

Budyšin. Spěwarjo Budyskeho chóra Pisany swět pod wjednistwom Beaty Tarrach­ a Reinharda Simmgena bychu so wjeselili, by-li jutře w 17 hodź. prawje wjele hosći do Budyskeho Gersdorff­skeho palaisa na mjezynarodny koncert přišło. Z darjenymi pjenjezami chcedźa załožbu Lichtblick podpěrać.

Tež Lipa sobu spěwa

Koparske wokrjesne mišterstwa

Zapadołužiski koparski zwjazk zarja­duje jutře, sobotu, wot 15 do 20 hodź. w sportowni při Kamjenskim lětanišću njeoficialne halowe mišterstwa WFV. Loni je sej pokal tak mjenowaneho 6. RB-cupa cyłk LSV Hory 1990 zawěsćił, pře­winywši w finalu Wojerowski FC z 3:2. W stafli A hraja nětko ST Mały Wjelkow, SC Mały Wosyk, Arnsdorfske KT, FSV Bretnig-Hauswalde a ST Budissa 08 ­Budyšink. W stafli B nastupja mustwa Natwar Němske Pazlicy. LSV Hory 1990, Wojerowski FC, Módro-běli Njeswačidło a ST Ćisk II.

Na ptačokwasny wolejbul

Wólnočasni wolejbulisća Žołto-módrych Kulow wuhotuja póndźelu, 15. januara, „ptačokwasny turněr“ za prošene mustwa. Wot 19.15 hodź. wubědźuje so na dwěmaj hrajnišćomaj sportoweje hale šěsć cyłkow.

Běhi po hali

W Złym Komorowje budu wot 26. do 28. januara běhanske wubědźowanja. Pjatk w 11 hodź. startuja běh na sto kilometrow. Za sobotu a njedźelu su potom wjacore čary planowane. Nadrob­niše informacije pod www.hallen­marathon.de

Blidotenisowe hry

12.01. 19:00 DJK Konjecy

  – TTV 97 Kamjenc

13.01. 16:00 Viktoria Worklecy

  – TTC Nowosólc-Hródk

15.01. 19:30 ST 1922 Radwor

  – MSV Budyšin 04 VII

24.01. 19:30 SV Seeligstadt

Wodorunje: 3 počas, 5 rěka w Pólskej, 6 nic muž, 7 sudobjo, 10 kupa w Srjedźnym morju, 13 nic wjele, 14 pohib k hudźbje, 15 nic pozdźe

Padorunje: 1 ton, 2 rěka přez Mnichow, 3 nic pózdnja, 4 francoski moler (1840–1926), 8 arabski zaliw, 9 lubosć italsce, 11 nic powołanski akter, 12 horiny w Aziji