Z wudaća: wutora, 03 decembera 2019

Nawodnistwo zaso dospołne

Choćebuz. Ruth Heynen je nowa direktorka činohrajneho studija a Alexander Mercyn nowy generalny hudźbny di­rek­tor Choćebuskeho Statneho dźiwadła. To je rada Braniborskeje kulturneje załožby Choćebuz-Frankfurt nad Wódru wčera wob­zam­knyła. Wuměłstwowe nawodnistwo hłowneho dźiwadła delnjołužiskeje metropole je tuž zaso dospołne.

Nowe płaćizny schwalili

Budyšin. Nowy popłatkowy porjad płaći za Budyski Serbski muzej a za Kamjenski Muzej zapadneje Łužicy w nošerstwje wokrjesa wot 1. januara 2020. To je Budyski wokrjesny sejmik wčera wobzamknył. Zastupny pjenjez w sku­pinje, normalny a potuńšeny je jedyn, swójbna karta wo dwaj euraj dróše. Runje tak zwyša podruž za zarjadowanja w rumnosćach na 75 do 150 eurow. Wšitke tamne płaćizny wostanu njezměnjene.

Lěwica z nowym předsydu

Originelne dary poskića Susanne Reichelt w swojim wobchodźe Mamitschka na Budyskej Jerjowej. Drjewjane knefle a wšelke debjenki wona sama zhotowja, tamne wudźěłki skaza sej we wukraju, kaž w Čěskej abo Francoskej. Hižo wot lětušeho měrca zawje­sela kupcow w Budyšinje z dekoracijemi. Do toho měješe wobchod w Niederseifersdorfje. Foto: SN/Hanka Šěnec

Towarstwo Škit Budyšin je na lětušej schadźowance za „1. serbsko-němske adwentne spěwanje na Wjacławskich wikach“ wabiło. Bosćan Nawka je so z Florianom Brězanom wo pozadkach akcije rozmołwjał.

Knježe Brězano, što je waše towarstwo pohnuło tajke spěwanje na dohodownych wikach wuhotować?

F. Brězan: Na lětušej Romantice smy so wopytowarjow prašeli, što jich z Budyšinom zwjazuje. Wuslědk bě wostrózbjacy: Žonop a wěže drje su často naspomnili, ale jeničce dźesaćo z cyłkownje sto naprašowanych mjenowachu Serbow. A wjetšina tychle dźesać procentow běchu turisća! To je nam pokazało, zo je serbstwo w měsće přemało prezentne. Po intensiwnej internej diskusiji, kak móhli na tym něšto změnić, smy so rozsudźili, serbsko-němske adwentne spěwanje jako jednu naprawu namjetować.

Kak je město na namjet reagowało?

Zwjazkowe předsydstwo Domowiny wo změnje wustawkow rěčało

Budyšin (SN/JaW). Starosće serbskich hudźbutwórcow, swoje nowe twórby w online-masce Towaršnosće za prawa hudźbnych předstajenjow a mechaniskeho rozmnoženja (Gema) hižo w maćeršćinje zapodać njemóc, bě mjez druhim tema zetkanja poradźowaceho wuběrka za serbske naležnosće w zwjazkowym ministerstwje nutřkowneho, kotrež přewjedźechu w nowembrje w Čornym Chołmcu. Wo tym informowaše před­syda Domowiny Dawid Statnik přitomnych na wuradźowanju jeje zwjazkoweho předsydstwa minjeny pjatk w Budyšinje.

Choćebuz (SN). „Anka, ty brune wócko – Serbske a druge słowjańske ludowe spiwy“ rěka nowa CD chóra Łužyca a duwa Słowjańske barwy, kotruž je Załožba za serbski lud nětko wudała.

Spěwny cyłk Łužyca wobsteji dlěje hač 25 lět a je ze swojim wobstajnym skut­ko­wanjom, wobšěrnym repertoirom a wysokim wuměłskim niwowom dźensa naj­wuspěšniši delnjoserbski chór. Duwo Słowjańske barwy – Lubina Žurec-Pu­ka­čowa a Jaroslav Pukač – je hižo před 15 lětami prěnje razy wustupowało. Na wšelakich zarjadowanjach hrajetaj a spěwataj delnjo- a hornjoserbske, słowakske a dalše słowjanske pěsnje. Jeju swojora­zne instrumenty su słowakska pa­styrska fleta fujara, dudlawka a brumladło.

Wuprajenja nastupajo serbske zajimy w koaliciskim zrěčenju CDU, Zwjazka 90/Zelenych a SPD za zhromadne sakske­ knježerstwo w dobje 2019–2024 žněja w Domowinje kaž tež w Serbskim sejmje pozitiwny wothłós.

Budyšin (SN/at). Wšitke žadanja Domowiny na přichodnych koalicionarow su wobdźělene strony do swojeho knježerstwoweho programa zapřijeli, štož organizacija jara wita. „Hódnoćimy to jako politiske připóznaće našeho dotalneho dźěła, je pak nam tež nastork, zo pokročujemy ze swojim stronsce njewotwisnym a strony přesahowacym skutkowanjom“, wu­zběhnje předsyda Dawid Statnik.

W Budyšinje su dźensa znowa tři kopolaki połožili, z kotrymiž wopominaja wopory nacionalsocialistiskeho knjejstwa před jich poslednim swobodnje wuzwolenym bydlenišćom. Tak počesćichu na Kamjentnej 21 Christinu E. Petrich, 30. decembra 1943 zamordowany wopor eutanazije. Před Hornčerskej 35 dopomina nětko kopolak na bywšu židow­sku měšćanku Elisu Sussmann, kotruž běchu zawlekli a 1943 zamor­dowali. Na samsne wašnje česćimy na Hasy Berthy von Suttner Kurta Pchaleka. Anti­fašist bu 11. oktobra 1944 wotprawjeny. Foto: SN/Hanka Šěnec

London (dpa/SN). Statni a knježerstwowi šefojo NATO zetkachu so dźensa w Londonje na wjeršk, w kotrehož wobłuku chcychu 70. róčnicu załoženja wojerskeje alian­cy woswjećić. Při tym dźěše tež wo přichod zwjazka, kotremuž je francoski prezident Emmanuel Macron wobswědčił, zo ma „wotemrěte mozy“. Mjez hosćimi běštaj zwjazkowa kanclerka Angela Merkel (CDU) a prezident USA Donald Trump. Oficialnje zahaja wjeršk wječor z přijećom pola kralowny Elizabeth II.

Němscy šulerjo popušćili

Berlin (dpa/SN). W mjezynarodnym kubłanskim přirunanju su němscy šulerjo porno wuslědkam lěta 2016 trochu popušćili. To je wuslědk najnowšeho přepytowanja Organizacije za hospodarske zhromadne dźěło a wuwiće (OECD). Po tym su so wuknjacy w předmjetach čitanje, matematika a přirodowěda snadnje pohubjeńšili. Přiwšěm wostawaja dale nad přerězkom OECD a tak na wysokim niwowje. Najlěpje kubłani su šulerjo w Singapurje, Hongkongu, Japanskej a Estiskej.

Chce z koaliciju pokročować

Francoski statny prezident Emmanuel Macron (nalěwo, srjedźa) rozžohnowa so wčera w Parisu z 13 francoskimi wojakami, kotřiž­ běchu při zražce dweju helikopterow w afriskim Maliju žiwjenje přisadźili. Macron předčita jich mjena a wuzběhny zmužitosć přisłušnikow­ francoskeje armeje. Wona wojuje w Maliju ze 4 500 wojakami přećiwo islamistiskim teroristam. Foto: dpa/Li Yang

Šoferka, kotraž bě njedźelu ze swojim awtom do šachta awtoweho lifta Drježdźanskeho parkowanskeho domu zrazyła, steješe pod wliwom drogow a njewobsedźeše ani jězbnu dowolnosć. Při tesće je policija amfetaminy dopokazała. 33lětna bě zawrjene durje lifta přerazyła a šěsć metrow do hłubiny padnyła. Kaž dźiw pak so wona jeno snadnje zrani. Wěcna škoda na lifće a wosobowym awće wšak wučinja dohromady 70 000 eurow.

Na wosuški a hodowne chłóšćenki su so­ paduši na adwentnych wikach w Drježdźanach-nowym měsće měrili. Kaž policija zdźěla, běchu so njeznaći w nocy na njedźelu do jednoho z natwarjenych předawanskich stanow zadobyli a so tam posłužowali. Mjez druhim pokradnychu 50 wosuškow. Spakosćene twory su wjacore sta eurow hódne.