Z wudaća: pjatk, 26 junija 2020

Pjatk 26. do 28.6.   49. jěchanski a skakanski turněr w Kulowje (koronakrizy dla dyrbja jón bjez publikuma přewjesć)

Pjatk 26.6. 21:00 Lětni filmowy wječor Zjednoćenych Kulowskich klubow na dworje Jakubec wustawa

Sobotu 27.6. 9:00 Kurs wo prawym klepanju kosy w Čornochołmčanskim Krabatowym młynje

  20:00 Lětni filmowy wječor Zjednoćenych Kulowskich klubow na dworje Jakubec wustawa

Njedźelu 28.6. 10:00 Wodźene kolesowanje Wojerowskeho měšćanskeho muzeja k sakskim industrijnym kulturnišćam (přizjewić so je trjeba!)

  20:00 Lětni filmowy wječor Zjednoćenych Kulowskich klubow na dworje Jakubec wustawa

Póndźelu 29.6.   Swjedźeń swj. Pětra a Pawoła

Srjedu 1.7. 19:00 Přednošk k stawiznam wsow Dołha Boršć, Dołha Boršć-wuchod a Lipinki w Stróžanskim Domje tysac­ hatow

Štwórtk 2.7. 21:30 Filmowe nocy w Čornochołmčanskim Krabatowym młynje: „Bohemian Rhapsody“ (přistup na areal wot 19:30 hodź.)

Pjatk 3.7. 21:30 Filmowe nocy w Čornochołmčanskim Krabatowym młynje za swójby: „Fantastiske pućowanje dr. Dolittlea“ (přistup na areal wot 19:30 hodź.)

Sobotu 4.7. 21:30 Filmowe nocy w Čornochołmčanskim Krabatowym młynje: „Perfektna potajnosć“ (přistup na areal wot 19:30 hodź.)

Kak prawje kosu klepać?

Čorny Chołmc. W Čornochołmčanskim Krabatowym młynje móža zajimcy jutře, 27. junija, wot 9 hodź. přihladować, kak so prawje kosa klepa. Při tym móže kóždy tute rjemjesło nawuknyć. Tež dźěći wot dźesać lět su rady witane. Wobdźělenje płaći 15 eurow. Byrnjež datum přizjewjenja wotběžał, móža so zajimcy pod telefonowym čisłom (03 57 22) 95 11 33 informować, hač su hišće městna.

Wosebite wiki w parku

Großharthau. Wot dźensnišeho do nje­dźele wotměja w hrodowym parku w Großharthauwje 13. wiki LebensArt. Pod wotstawkowymi a hygieniskimi regulemi korony dla móža sej wopytowarjo wobhladać, što wšo k žiwjenskemu wašnju w domjacnosći a zahrodźe kaž tež při wólnočasnej zaběrje k tomu słuša. Pjatk a sobotu je areal wot 9 do 19 hodź. a njedźelu wot 9 do 18 hodź. přistupny.

Dźiwadło na zahrodźe

Jěchanski a skakanski turněr

49. jěchanski a skakanski turněr přewjedźe Jěchanske sportowe towarstwo Kulow jutře a njedźelu, 28. meje, stajnje wot 8 do 18 hodź. na jěchanišćomaj w Kulowje. Lětsa pak budźe tójšto hinak, dokelž so přihladowarjo wobdźělić njesmědźa, štož zaleži na koronapande­miji. Čłonojo a zamołwići Kulowskeho jěchanskeho towarstwa pak so přiwšěm wjesela, zo smědźa so zaso wubědźować a wukonliwosć jěcharkow, jěcharjow a koni testować.

Dumperowy běh wotprajeny

Tež třeći běh wo Němske dumperowe mišterstwa 2020 so koronapandemije dla njepřewjedźe. Po wotprajenymaj běhomaj w aprylu w Adelsdorfje a w meji w Bad Freienwalde chcychu zazběhowe wubědźowanje poprawom 9. awgusta w Baćonju pola Donatec wuhotować. Nětko stejitej we wubědźowanskim planje­ jenož hišće wurisani w Drjowku a w Hórkach. W Delnjej Łužicy chcedźa spočatk septembra jěz­dźić a w Hórkach potom kónc septembra.

Kónctydźenska kopańca

Wodorunje: 3 dźěl trawnika, 5 spisar, 6 přećiwo, 7 wołanje k hotowosći, 10 nutřkowny organ ćěła, 13 sicilski wulkan, 14 tuchwilu, 15 sudobjo

Padorunje: 1 njeměr, 2 dźěl by­dlenja, 3 dźiwadłowa hra, 4 dźěl helikoptera, 8 Flugblatt serbsce, 9 so lubjaca, 11 ju dóstanje šulski nowačk, 12 postrow namór­nikow a tež Čechow

Na njewšědne wašnje so tuchwilu Budyska firma Knorre wo štomy podłu noweho kolesowanskeho puća mjez Pančicami­Kukowom a Zejicami stara. Za čas twarskich dźěłow dyrbjachu zemju hač ke korjenjam štomow wotnosyć, pozdźišo ju zaso nasypa­chu. Zo bychu so korjenje zaso derje přimnyli, připrawichu wosebite měchi, z kotrychž woda pomału wukapuje a so tak wo wobstajnu włóžnotu stara. Měchi je Sven Harnisch tele dny z wodu napjelnił. Foto: Feliks Haza

Krabatowe swjedźenske hry drje dyrbja­chu lětsa w Čornym Chołmcu wotprajić. Za to pak so tam přichodny tydźeń z kinowym lěćom event hinašeho razu započnje.

Čorny Chołmc (SN/MWj). Tež w koronowych časach so Čornochołmčanski Krabatowy młyn wot 2. julija hač do 30. awgusta na wulke kino pod hołym njebjom přeměni. Krabatowe filmowe nocy přeprošuja lětsa na 35 wječorach na kinowe předstajenje z wotstawkom. Stajnje wot štwórtka hač do njedźele pokazaja nowe filmy z Hollywooda, klasikarjow, kultowe filmy a najwšelakoriše němske paski, praji zamołwita za zjawnostne dźěło ­Katja Wersch. Předpředań je so hižo minjenu wutoru započała.

Na terenje bywšeho hosćenca hišće wjele dźěła čaka

Pančicy-Kukow (SN/MWj). Nimojěducy móhł sej myslić, zo je na terenje bywšeho stareho hosćenca w Pančicach-Kukowje wšitko dotwarjene. Bager drje tam hi­šće je, ale kontury su hižo derje spó­znać. Štomy a kerki rosć abo samo hrajkanišćo nastać pak tam dawno hišće móc njebudu. Tule iluziju skóncować dyrbješe wjesnjanosta Markus Kreuz (CDU) na wčerawšim posedźenju gmejnskeje rady we Wotrowskej starej šuli. „Hdźež je stary hosćenc stał, lětsa hišće žadyn perfektny park njebudźe“, wón rjekny.

Hruby profil drje je hotowy, na gmejnu a twarsku firmu pak čaka hišće wjele dźěła. Na terenje dyrbja dalšu worštu pjeršće nasypać. Nimo toho maja puć wutworić a schód twarić. Planowane přepołoženje wotrězka Klóšterskeje wody drje stanje so po słowach Kreuza hakle 2022. Na druhim boku to gmejnje zmóžnja, so na planach wobdźělić a swoje předstawy sobu zapřijeć. Jedyn z přichodnych nadawkow budźe, jednotliwe wysokosće wuměrić, zo móhli porjadny schód twarić, wjesnjanosta wčera zdźěli.

Budyšin. Njedźelu zaklinča w Budyskej tachantskej cyrkwi we 18 hodź. kantaty a psalmy Felixa Mendelsona Bartoldyja. Pod nawodom Michaela Vettera zanjese twórby wokalny ansambl ewangelskeho kantorstwa swj. Pětra, přewodźeny wot orchestra Serbskeho ludoweho ansambla. Dalše předstajenje slěduje w 20 hodź. tohorunja w tachantskej cyrkwi. Wšitcy zajimcy su přeprošeni.

Wojerecy (SN/MWj). Po 110 dnjach nanuzowaneje koronoweje přestawki Wo­jerowska Łužiska kupjel srjedu, 1. julija, w 10 hodź. zaso wočini. Minjene měsacy su čas wužili a w kupjeli wulke rjedźenje přewjedli. Tuž lětsa hižo žane dalše za­wrjenje kupjele njebudźe, zdźěli jednaćel Matthias Brauer. Wšitke basenki su napjelnjene, wšitko je wurjedźene a sobudźěłaćerjo so na regularne dźěło w kupjeli a sawnje wjesela. Na prěnich dźesać wopytowarjow přichodnu srjedu čaka překwapjenka. Na prašenja wo kupanju, sawnje a wo najwšelakorišich kursach sobudźěłaćerjo rady wotmołwja. Wobdźělnikow hižo započatych kursow chce­dźa­ wo pokročowanju informować. Pod telefonowym čisłom 0 35 71 / 46 95 80 móža so zajimcy tež sami wobhonić. Wosebje zbožowni w kupjeli su, zo móža prózdninski camp kaž planowany přewjesć. Wobkedźbowanja hygieniskeho koncepta dla móže w kupjeli nachwilnje k wobmjezowanjam dóńć.

Paducha lepił

Kamjenc. Sobudźěłaćer Kamjenskeho nakupowanišća je předwčerawšim paducha lepił. Podhladny bě bjez toboły do wobchoda šoł a jón bórze na to z tobołu a tołstym nachribjetnikom wopušćił. Jako jeho sobudźěłaćer narěča, poča tamny agresiwny być a jeho snadnje zrani. Paduch wostaji rubiznu stejo a z kolesom ćekny. Daloko přišoł pak njeje, přetož alarmowana policija jeho bórze dosahny. Rubiznu – drastu a kapsnu lampu w hódnoće 400 eurow – móžachu kupnicy wróćić.