Z wudaća: pjatk, 18 septembera 2020

Kóždu póndźelu za bulom honić

SJ Njebjelčicy poskići wot 28. septembra kóždu póndźelu wot 16.30 hodź. kopańcu za dźěći w starobje pjeć do sydom lět. Zwučować a hrać budu na sportnišću w Serbskich Pazlicach. Za to zamołwitu Dianu Kralowu docpějeće pod telefonowym čisłom 0177/7586866.

Stara garda njehraje

Koparski turněr starych knjezow wo pokal Serbskeho Sokoła, kotryž bě za 9. oktober w Kamjencu planowany, njebudźe. Jednota Kamjenc trjeba hrajnišćo tón wječor za trening dorosta.

Kónctydźenska kopańca

18.09. 19:00  Budissa Budyšin

  – FSV Nowosólc-Hródk

19.09.  14:00  Jednota Kamjenc

  – Großenhainske KT 90

19.09.  15:00  Rakečanske ST

  – Drježdźanski SC 1898

19.09.  15:00  TSV Wachau

  – ST Marijina hwězda

19.09.  15:00  Biskopičanske KT II

  – Módro-běli Kulow

20.09.  12:30  SJ Chrósćicy II

  – ST Radwor

20.09.  15:00  SJ Chrósćicy

  – Drohotka Ramnow

20.09.  13:00  SJ Njebjelčicy II – HZ Bu-    dyšink/Malešecy II

20.09.  15:00  SJ Njebjelčicy – HZ Hór-    nikečanski jězor

20.09.  13:00  Sokoł Ralbicy/Hórki

  – Wojerowski FC

Schiebock běha ekstremnje

1 hrib, 2 dalši hrib

3 počas, 4 druhe syno

5 dźěl cirkusa

6 kraj centralneje Ameriki

7 nic w nocy

8 kruty kow

9 wučinjene hesło

Šula za delnjoserbsku rěč a kulturu Choćebuz je swój nazymski semester hižo w awgusće zahajiła. Zarjadnišćo je tójšto zarjadowanjow lětsa hinak planowało, štož bě koronapandemije dla trěbne.

Choćebuz (SN). Korony dla njebě Šuli ­za delnjoserbsku rěč a kulturu Choćebuz móžno organizować studijne jězby do wukraja abo do serbskeje wokoliny. Tak je sej nawodnistwo přemysliło něšto ­hinaše za maćernorěčnych a přećelow delnjoserbšćiny přihotować. Tak zetka so 10. septembra połsta z nich w Bórkowach, zo bychu čołmikowali, zhromadnje spěwali a so rozmołwjeli. Zajimcy ­běchu ze Šejnhejdy, z Depska, Barbuka, z Wulkeho Dobrynja, Turjeja, Choćebuza, Stopišćow, Hochozy, Prjawoza a Drjenowa. Hochoženjo běchu samo z wulkim kremserom přijěli. Zdobom su ze serbskej chorhoju kóždemu pokazali, zo su Serbja po puću.

Witanje běše jara wutrobne, wšako njeběchu so wosebje ći starši ludźo dlěje widźeli. Wotjěli su woni z čołmom wot přistawa Rehnus w Bórkowach. Po niłkej wodźe staj čołmarjej po krutej čarje jěłoj, štož zbudźi w pućowacych zajim. Wšako njebě nowa wódna dróha hišće wšěm znata.

Z koncertom „Muzikaliska jězba po časach“ w Bartskej ewangelskej cyrkwi zahaji so předwčerawšim nowy festiwal „Hornjołužiski swjedźeń komorneje hudźby“. Mjez druhim staj tam rodźeny Dobranečan Johannes Krahl (na foće) a Josua Velten z Gießena simultanje na wobojich Eulowych pišćelach Božeho domu „Sonatu a due Organi“ Franza Danzija přednjesłoj. Foto: Jurij Helgest

Gmejnska rada trjeba rozsudy a podpěru z Drježdźan

Łaz (AK/SN). Spěchowanske srědki za dróhu do Złyčina (Litschen) su zasadnje přizwolene, dotal pak njewupłaćene. ­Njespokojnosć zwuraznichu předewšěm Drěwčenjo tónle tydźeń na posedźenju Łazowskeje gmejnskeje rady. Hižo wot lěta 2012 trěbny wutwar 3,7 kilometrow dołheho puća Drěwcy–Złyčin njehodźi so přeco hišće zahajić. Přičina toho je njewěste financowanje.

Něhdźe 305 000 eurow je z wupisanja wušło. Wěstej stej podźěl 152 000 eurow Němskeje železnicy AG a swójski podźěl gmejny Łaz 50 000 eurow. Čakaja pak hišće na 129 000 eurow ze sakskeho krajneho zarjada za twar dróhow a wobchad Mišno. „W Mišnje nam k stawej wotdźěłanja nadawkow rjeknychu, zo je nětčiši staw rozdawanja lěto 2018 ... Smy so na to na sakske hospodarske ministerstwo wobroćili, prošo zapósłanca krajneho sejma Marka Šimana (CDU) a Franka Hirchu (2009–2019 zapósłanc CDU) wo podpěru. Budźemy nětko ćišć na Drježdźany wukonjeć“, rjekny Drěwčanski wjesny předstejićel Frank Linge, „štož so tule stawa, swědči w našich wočach wo zaprajenju krajneho knježerstwa.“

Z awtom do chěže zrazyłoj

Wóspork. Njeznateje přičiny dla je wčera Škoda do chěže we Wósporku zrazył, drje bjeztoho zo by borzdźił. Wohnjowi wobornicy dyrbjachu 81lětnu sobujěducu z ćežkim gratom z awta wuswobodźić, na čož ju z helikopterom a šofera z wuchowanskim wozom do chorownje dowje­zechu. Policija pad přepytuje.

Pytaja swědkow

Komorow. Njeznaty šofer módreho VWja z Pirnaskim Kfz-znamješkom a připowěšakom je předwčerawšim na zwjazkowej dróze B 156 mjez Komorowom a Lěskej wobchad wohrozył. Wulko­du­brawska wobydlerska policija prosy swědkow, so pola njeje přizjewić.

Spěšnosć přepruwowali

Klukš. Tohorunja na B 156 su zastojnicy srjedu mjez Klukšom a Minakałom spěšnosć něhdźe 1 500 jězdźidłow kontrolowali. Dohromady 32 šoferam wuprajichu porok. Wodźerjej Audija, kiž bě ze 163 km/h po puću, hrozy pokuta znajmjeńša 600 eurow a sćazanje jězbneje dowolnosće na tři měsacy.

Wulka rozhorjenosć knježeše wčera dopołdnja při Naumannowym puću, sewjernje dźiwinoweho mosta přez awtodróhu A 4 njedaloko Ramnowa. Dwanaće zastoj­nikow sakskeje policajskeje stafle nurjerjow z Lipska bě na próstwu Kamjenskeho policajskeho rewěra přijěło, zo bychu mysterioznu namakanku přepytali. Hižo ­wutoru bě přechodźowar nad wodu čerwjeny powjaz wuhladał. Tón wisaše na štom přiwjazany nad małej skału. Muž spyta za powjazom ćahnyć, njeměješe pak wuspěch. Zawołana policija a wohnjowa wobora z Porchowa njeběštej tohorunja ­wuspěšnej. Wčera krótko do 11 hodź. podachu so nětko nurjerjo do wody. We hłubokosći sydom metrow woni widźachu, zo je powjaz mjez kamjenjomaj zatłusnjeny. ­Skónčnje wućahnychu zastojnicy z wody wulki magnet, kotryž drje běchu ludźo ­při wudźenju za starym železom wužiwali. Zastojnicy móžachu so tuž po spěšnym rozjasnjenju na přichodne zasadźenje podać. Foto: Rocci Klein

Radwor. Radworska młodźina měješe ideju, wuhotować „kino w klubje“. Před něšto dnjemi witachu na njón tam 90 hosći, zdźěli Jakub Wowčer. Wosebje swójby z dźěćimi, wjesnjenjo a młodo­stni z Radworja a wokoliny běchu přeprošeni. Serbski synchronizowany kanadiski film „Peeweje“ bě zazběh kinoweje nocy pod hołym njebjom. Hornjoserbsku premjeru měješe pask „SMY“, Sophije Cyžec z Njebjelčic a Luizy Nawkec z Wotrowa. Wonej běštej z nim hłowne myto lońšeho krótkofilmoweho festiwala w Choćebuzu dobyłoj. Wokoło połnocy zakónči so Radworski kinowy wječor z filmom „The Imitation Game“.

Wjace pjenjez třěchikryjerjam

Budyšin. Něhdźe 500 třěchikryjerjow Budyskeho wokrjesa je za čas pandemije dale dźěłało. Nětko chcedźa woni na hospodarskim wužitku wobdźěleni być. To žada sej industrijne dźěłarnistwo Twarić–ratarstwo–wobswět (IG BAU). „Knihi z nadawkami su pjelnjene, zajimcy dyrbja dołho čakać. Za sobudźěłaćerjow ma so ćělne napinanje tež w móšni pokazać“, rjekny Peter Schubert, wobwodny předsyda IG BAU wuchodneje Sakskeje.

Benedikt Dyrlich

Wot měsačka so njedaj zawjesć

Chce jenož zo by sutał

Do wupalenych hwězdow

Łójił ćmu do měchow hłowy

Wohladaj so žedźbow maznych

Dźi z puća wětrec hólcam

Přez rozwalinu hwizdajo na dźeń

Snowaja złósć a wichor wójny

Wostań swěrny sebi

Dźerž so zbytka jasnosće

A skutka krutych rjapow

(2006)

Lawdacija na lawreatku Myta Zejlerja 2020 Chrystu Meškankowu

Dźens tydźenja bu Chrysta Meškankowa w Kamjenskim sakralnym muzeju, Haninej cyrkwi, z Mytom Zejlerja, wu­znamjenjenjom za serbsku rěč, počesćena. Dokumentujemy tule lawdaciju bywšeje direktorki Serbskeho gymnazija Budyšin Rejzy Šěnoweje.

Jednoho ranja słyšachmoj z mužom w serbskim rozhłosu rozsud jury Myta Zejlerja, zo počesća lětsa Chrystu ­Meškankowu z mytom za serbsku rěč, z Mytom Zejlerja. Zo počesća ju za wobstajne a přikładne tworjenje w nałožowanju a wuwiwanju serbskeje rěče a kultury, za jeje žiwjenski skutk.

Wjele zboža, luba Chrysta, ći dźensa hišće raz z cyłeje wutroby přeju.

Słowje, kotrejž sebi prajimy na narodninach, do noweho lěta abo młodemu čłowjekej, kiž so hotuje na nowy wotrězk žiwjenja, słušatej dźensa tebi.