Z wudaća: póndźela, 11 januara 2021

Praha (dpa/SN). Čěski ministerski prezident Andrej Babiš je po nadběhowanju Kapitola přez přiwisnikow wotwoleneho prezidenta Donalda Trumpa swój profil w socialnych syćach změnił. Dotal bě tam 66lětny z čerwjenej baseballowej čapku z napisom „Za sylnu Čěsku“ widźeć. To wšak wobhladowachu mnozy jako­ referencu na republikanskeho prezidenta USA, kiž bě čerwjenu čapku z hes­łom „Make America great again“ (Čińmy Ameriku zaso wulkotnu) na swoje wosobinske politiske znamjo wuwił.

Na swojim nowym profilowym foće je Andrej Babiš nětko z nahubnikom widźeć­, pyšenym z čěskej chorhoju. Namócnosće w stolicy USA Washingtonje miliardar a załožer populistiskeje strony ANO wuraznje zasudźa. Krawale wokoło Kapitola běchu „njesłyšany nadpad na demokratiju“, wón praji.

W zašłosći bě Babiš stajnje zhromadnosće z Trumpom wuzběhował, na přikład, zo je runja jemu z hospodarstwa. Čěske nowiny pak změnu hlada Babiša kritizuja, dokelž je „přepozdźe“.

Předsydstwo strony na klawsurje zakładny dokument schwaliło

Berlin (dpa/SN). Zeleni chcedźa ze socialnymi polěpšenjemi a inwesticijemi sćěhi koronakrizy přewinyć. „W lěće 2021 dyrbi politika zaso na nowej zmužitosći nabyć, wěcy hinak činić, zo njeby system našeho derjeměća jenož porjedźała, ale sprawniši a lěpši činiła“, rěka w naćisku dokumenta, kotryž chcyše zwjazkowe předsydstwo dźensa wobzamknyć. Šěsć stron wopřijacy dokument z hesłom „Zhromadnje lěpje, lěpje zhromadnje“ powěsćerni dpa předleži.

Spočatk noweho lěta bě nawodnistwo Zelenych na tři dny trajacej klawsurje wo strategiskich prašenjach a wo wupućach z koronakrizy wuradźowało. W běhu dnja chcyštaj předsydaj Annalena Baerbock a Robert Habeck wuhlady na lěto předstajić, w kotrymž su wólby zwjazkoweho sejma a wólby krajnych sejmow w šěsć zwjazkowych krajach.

Drjowkowske krosna jako hudźbne instrumenty, ornamentika jutrownych jejkow jako pozadkowa projekcija na koncertach abo „kaprowanje zapróšenych zarjadowanjow“ – na wirtuelnej rozmołwje njejsu łužiscy (sub)kulturni akterojo ze zajimawymi namjetami runjewon lutowali. Sep mjenje abo bóle njewšědnych myslow, kak serbstwo na festiwalach sylnić, předewšěm wo tym swědči, zo je scena čiła a kreatiwna, zhromadne dźěło je njehladajo žanrow a spartow we Łužicomaj witane. Špak wšak dale je, kak hodźała so serbskosć zaměrnje prezentować. Młodźi wuměłcy so jasnje spjećuja takrjec rólu eksotow zaběrać. Zarjadowarjo přeja sej z pohladnicow znate motiwy jako zachodowe durje. Woboje je zrozumliwe, a snano trjebamy nałožki a narodnu drastu woprawdźe jako wehikl – to pak jenož na wobmjezowany čas w kónčinach, hdźež serbstwo runje znowa wotuća. Naposledk pak publikum rozsudźa, što jako awtentiske začuwa. Bosćan Nawka

POSLEŠĆO wutřasć a je čerstwje přewětrić słuša samozrozumliwje k prawi­dłownym wobstaranjam při rjedźenju spanskeje stwy. W morawskej Ostravje je tak tež rentnarka činiła, bydlaca z mandźelskim w 9. poschodźe platoweho wysokodoma. Tola hinak hač pola bajkoweje knjeni Holdy (Holle) njejsu při tym sněhowe mjetele na zemju padali, ale z balkona krónowe bankowki wšěch móžnych hódnotow přisamom so sypali. Wboha seniorka je tak njezbožownje cyłe swójbne, za čas žiwjenja nalutowane zamóženje we wysokosći 170 000 krónow do powětra wuklepała. Poprawom běchu myslene za stare dny a za dźěći.

A po hodźoch wšo wróćo ... Rysowanka: ŠNAK

Wjelk stadło wowčerja Gerata Šmita nadpadnył

Smječkecy (SN/BŠe). Jako wowčer Gerat Šmit wčera na pastwu pola Smječkec přijědźe, bě wona prózdna a skoćata do wšěch kóncow rozćěkane. „Jedna wjetša skupina steješe na łuce, hnydom při prěnich chěžach wsy“, wón rozprawješe. Tamne wowcy su swójbni w běhu dnja w bliskim lěsu do směra na Róžant a Pěskecy namakali. Kelko wowcow je stadłu zwostało, nje­ho­dźi so dokładnje rjec. „Zwěrjata su spłóšiwe a ćěkaja, tuž nje­móžu je ličić“, Hórčan wujasni. Tři wowcy, kotrež dyrbjachu lětsa porodźić, bě wjelk zakusał, šěsć dalšich je zranjenych.

Fachowcy wjelčeho běrowa su hišće wčera dopołdnja pokazki na pastwje zawěsćili. „Wjelk jako skućićel je wěsty, wšako su jeho slědy w sněze na pastwje widźeć“, Gerat Šmit rozłoži. Dale je spóznajomne, zo bě so stadło na dwěmaj blakomaj z pastwy wudobyło, po tym zo bě je wjelk honił. Hač wowčer za swoje mortwe skoćata zarunanje dóstanje, so pruwuje.

Pančicy-Kukow (mwe/SN). Prjedy hač móža sej ludźo w apotekach dalše škitne nahubniki FFP2 za mały obolus wote­wzać, dyrbja jim chorobne kasy wotpowědny dobropis připósłać. Wot wčera­wšeho postajenje płaći.

Mějićel apoteki swj. Bosćana w Pan­čicach-Kukowje Gert Müller-Gottschlick rjekny, zo dotal hišće tajki dopropis widźał njeje, dokelž „ma nowa akcija hakle prawje zaběžeć“. Potom dóstanje kóždy, kiž je starši hač 60 lět abo je chronisce chory, za dwaj euraj šěsć nahubnikow. Někotryžkuli, kiž móžeše sej dotal w Pančičanskej lěkarni tři tajke FFP2-škity za hubu a nós darmotnje wotewzać, drje nowe postajenje scyła hišće njeznaje. Kopica tuchwilnych aktualnych informacijow wokoło korony je tak wulka, zo drje tón abo tamny wobydler spěšnje přehlad zhubi.

Wulke wjeselo wobradźi sněh zašłeho tydźenja tež swójbje Tobiasa Škody we Wotrowje. Wón je nětko sobotu dopołdnja zbytny sněh z ležownosće a wjesneho puća ­na dołhu sankowansku čaru zesuwał. Tak mějachu dźěći zabawu w nadźiji, zo njebě to posledni króć. Wjedrarjo wšak wěšća, zo ma lětuša zyma woprawdźe hišće ­zymska być. Cyle wěsći pak sej dotal hišće njejsu, w kotrych kónčinach Němskeje budźe so sněžić a hdźe změja ­ludźo pancate wjedro. Foto: Lucija Škodźina

Z Kretschmerom diskutowali

Wulki Šunow. Njedźelu dopołdnja je skupina něhdźe 30 ludźi před priwatnej ležownosću sakskeho ministerskeho ­prezidenta Michaela Kretschmera (CDU) we Wulkim Šunowje demonstrowało. Kretsch­mer, kiž w tym času tam přeby­waše, je z nimi woměrje diskutował. Wjetšina wobdźělenych měješe nahubnik, často pak trěbny wotstawk njedodźeržachu. Zastojnicy policije zwěsćichu wosobinske daty ­někotrych demonstrantow. Zdobom pruwuja, hač su so wobdźělnicy přećiwo prawu zhromadźowanja přešli.

Awta bjez kolesow

Budyšin. Njeluboznu překwapjenku dožiwił je wobsedźer Audija A 4 sobotu dopołdnja w Budyšinje. Jeho awto steješe na parkowanišću na cyhelach a bjez kolesow. Zastojnicy Budyskeje policije pak móžachu jemu zdźělić, zo běchu zastojnicy zwjazkoweje policije w nocy na awtodróze A 4 we wosobowym awće marki Renault kolesa jeho awta namakali. Šofer běše 28lětny Polak.

Běła Woda (CK/SN). Njewšědny měr tuchwilu w Běłowodźanskim škleńčerskim muzeju knježi. Normalnje by so tam do a po hodźoch z wopytowarjemi a pućowanskimi skupinami z cyłeje Němskeje jenož tak mjerwiło. Ale wot nowembra je muzej korony dla zawrjeny. Tomu wšak bě hižo loni nalěto tak. Za to mějachu w lěću wjace wopytowarjow hač hewak, dokelž su mnozy hosćo Mužakowskeho parka tež do škleńčerskeho muzeja pohladnyli. Tohodla njebě kónclětna bilanca ani tak špatna, kaž su wočakowali.