Budyšin (SN/bn). „Wjeselu so stać so z dźělom cyłka a dźakuju so předsydstwu a cyłemu mustwu, kotrež je minjene měsacy přechada přewšo profesionelnje zmištrowało.“ Z tymle słowami předstaji so dźensa Madeleine Tost, nowa jednaćelka Budyskeho towarstwa Kamjentny dom, kotraž po nimale lětnej wakancy Torstena Wiegela naslěduje. Z „Rudnych horin pochadźaca“ Tost je so po studiju europskich studijow a stawiznow na Techniskej uniwersiće Kamjenica w Annaberg-Bucholzu čestnohamtsce sociokulturje wěnowała. Mjez druhim je filmowe zetkawanišćo Neues Konsulat sobu załožiła a němsko-čěski festiwal Land-Art-Treffen w Loučné pod Klínovcem sobu organizowała. Powołansce skutkowaše w Rudnohórskim dźiwadle, Měšćanskich dźiwadłach Kamjenica a jako jednaćelka sociokulturneho centruma Alte Brauerei w Annaberg-Bucholzu.

Budyšin (SN/bn). Němska sekcija mjezynarodneho komiteja zarjadowarjow festiwalow folklory a tradicionalneho wuměłstwa CIOFF je swoju lětušu hłownu zhromadźiznu předwčerawšim w Budyskej Röhrscheidtowej bašće wuhotowała. Wobšěrny dnjowy porjad wopřijimaše mjez druhim rozprawy předsydstwa, pokładnicy a zamołwiteje za koordinaciju naležnosćow z Towaršnosću za hudźbne předstajenja a mechaniske prawa rozmnožowanja GEMA. Po wuwjazanju předsydstwa přihłosowaše dohromady něhdźe 20 delegatow přiwzać Andréja ­Eikermanna do nawodnistwa němskeje sekcije CIOFF. Dokelž wotměje so regularna wólbna zhromadźizna hakle klětu, wukonja tele zastojnstwo přechodnje jako přisydnik.

Składnostnje 70. narodnin w Kulowje narodźeneho a w Choćebuzu skutkowaceho komponista Ulricha Pogody ­wuhotowa Serbski ludowy ansambl njedawno w Choćebuskim konserwatoriju portretowy koncert. Solist na pišćelach běše Tomaš Žur, bywši kantor ­při katedrali swj. Jadwigi w Berlinje, kiž woswjeći njedawno tohorunja swoje ­jubilejne sydomdźesaćiny běše so ­tohorunja w Kulowje narodźił. Wobeju serbskeju hudźbnikow zwjazuje kolegialne přećelstwo.