Nóc walčika pod hołym njebjom
To a tamne (07.07.25)
Na wšěch 30 kilogramow cannabisa w swojim awće měješe 30lětny muž, jako jeho policisća pjatk dopołdnja připadnje na zwjazkowej dróze 115 njedaloko Cerska na mjezy Braniborskeje a Sakskeje kontrolowachu. Drogi ležachu zapakowane w dwěmaj wačokomaj. Zastojnicy wopojny jěd sćazachu a šofera zajachu. Sudnik je 30lětneho mjeztym do jastwa pósłał. Přećiwo njemu přepytuja ilegalneho wikowanja z drogami dla.
Z balkona třećeho poschoda skočiłoj staj paduchaj w Berlinskej strowotnej studni. Při tym sej wobaj mužej w starobje 48 lět wjacore kosće złamaštaj. Wobeju dowjezechu do chorownje. Swědcy běchu wobkedźbowali, kak so paduchaj do bydlenja zadobyštaj, a zawołachu policiju. Jako mužej policistow wuhladaštaj, skočištaj z balkona. Policisća jeju zastarachu. Wobaj měještaj grat a pjenjezy při sebi.
Witaja wobornu winowatosć
Berlin (dpa/SN). Wjetšina wobydlerjow Němskeje so za to wupraja, wobornu winowatosć w tej abo tamnej formje zaso wukazać. Tole je wuslědk kónctydźenskeho woprašowanja sćelaka ARD. Při tym je 55 procentow ludźi za wobornu a ciwilnu słužbu, kotraž měła za muži a žony w samsnej měrje płaćić. To je dźesać procentow wjace hač w aprylu. Podźěl tych, kotřiž bychu direktnu wobornu winowatosć jenož za mužow witali, je na 18 procentow woteběrała.
Renta za maćerje hakle pozdźišo
Berlin (dpa/SN). Mjez CDU/CSU a SPD wujednana rozšěrjena renta za maćerje je po měnjenju nawodnistwa rentoweje zawěsćernje „chětro komplikowana wěc“. Ju móža tuž najskerje hakle wot lěta 2028 wupłaćić. Najnowše dojednanje koaliciskeho wuběrka, z tym hižo 2027 započeć, posudźuje nawodnica předsydstwa Anja Piel jara skeptisce. Dyrbja wšitko znowa wobličić. Něhdźe dźesać milionow rentow je potrjechenych, wona rjekny.
Prawo na azyl přiwótřili
Nahladnosć SPD dale woteběra
Trumpowy zakoń schwaleny
Washington (dpa/SN). Republikanojo w kongresu USA su prezidentej Donaldej Trumpej nutřkopolitiski wuspěch wobradźili. Dom reprezentantow je wčera wječor wot njeho nastorčenemu zakonjej za dawki a inwesticije přihłosował, z kotrymž chce Trump hłowne přilubjenja wólbneho boja financować. Paket z klinčanym mjenom „Wulki rjany zakoń“ chcedźa Trumpej nětko k podpisanju předpołožić. Tón je na tym wobstał, zo chce zakoń akuratnje 4. julija na Dnju njewotwisnosće podpisać.
Nowy zakoń předwidźi přidatne wudawki za škit mjezow a za zakitowanje. Ze skrótšenjemi na socialnym polu chce Trump tute wudawki wurunać. Wosebje demokraća tole kritizuja, dokelž z nowym zakonjom miliony Američanow swoje chorobne zawěsćenje zhubja. Fachowcy trochuja, zo Trump ze swojim předewzaćom gigantiske zadołženje USA wo dalše 3,3 biliony dolarow zwyši.
Dalše ruske nadpady
Moskwa/Kijew (dpa/SN). Po masiwnych ruskich nadpadach z trutami a raketami na ukrainsku stolicu Kijew je ličba zranjenych na znajmjeńša 23 rozrostła. Tole rozprawja měšćanosta Vitali Kličko. Wjacorych ludźi su do chorownje dowjezli. Po wšěm kraju su zamołwići w Ukrainje 550 nalětow z trutami a raketami zličili. Runočasnje je tež Ukraina Rusku z trutami nadběhowała. W Rostowje je rentnarka žiwjenje přisadźiła, jako trut do jeje bydlenja zrazy. W kónčinje wokoło Moskwy w měsće Sergijew Possad buštaj dwaj wobydlerjej zranjenaj.
Mjeztym je ruske wójsko na wuchodźe a juhu Ukrainy dalše kónčiny zdobyło a staja ukrainske jednotki we wobłuku swojeje lěćneje ofensiwy pod wulki ćišć.
Ruska talibanow připóznawa
Moskwa/Kabul (dpa/SN). Ruska je prěni stat na swěće, kotryž knježerstwo talibanow připóznawa, po tym zo je te w lěće 2021 wospjet móc přewzało. „Wuchadźamy z toho, zo oficialne připóznaće knježerstwa islamskeho emirata Afghanistana wuwiću dobreho zhromadneho dźěła impuls spožči“, wonkowne ministerstwo Ruskeje zdźěla. Moskwa chce Kabul nimo toho w boju přećiwo terorizmej a wikowanju z drogami podpěrować.
Wonkowne ministerstwo talibanow rěčeše wo „historiskej kročeli“ za poćahi mjez woběmaj krajomaj. Ruska je druhim krajam z tym z přikładom, islamisća zdźěleja. Talibanojo su po přewzaću mocy před nimale štyrjomi lětami mjezynarodnje w dalokej měrje izolowani. Jim wosebje wumjetuja, zo prawa žonow sylnje wobmjezuja. Susodne kraje pěstuja porno tomu skerje pragmatiske styki k talibanam. Němski nutřkowny minister Alexander Dobrindt (CSU) so wo direktne styki z nimi prócuje, zo bychu so wo wotsunjenju afghaniskich ćěkancow z Němskeje do jich domizny dorozumili.
Dźěła při mosće derje pokročuja
Drježdźany (dpa/SN). Hač do kónca septembra ma Caroliny móst w Drježdźanach dospołnje zwottorhany być. Wottorhanske dźěła spěšnišo pokročuja hač bě wočakowane. Tuchwilu su samo dwaj měsacaj spěšniše hač po časowym planje, Drježdźanske měšćanske zarjadnistwo zdźěla. Po tym chcedźa Terasowy brjóh zrumować a nastate škody wuporjedźeć. Tole ma hač do kónca oktobra trać. Po informacijach města planowane kóšty 18 milionow euro njepřekroča. „Před dźěłom twarskich dźěłaćerjow móžu jenož kłobuk zejmować. Kak spěšnje su njewšědne dźěła pod wobćežnymi wuměnjenjemi zmištrowali, žada sej najwjetši respekt“, rjekny wyši měšćanosta Dirk Hilbert (FDP) hladajo na horcotu minjenych dnjow. Tysacy tonow betona su dotal wotwozyli.
Najwažniše nětko je, zo jězbnu čaru za łódźe we Łobju zrumuja. Hač do dźesać bagrow za tute dźěła zasadźeja, zo móhli łódźe tam bórze zaso jězdźić. Dźěła traja drje hišće hač do kónca přichodneho tydźenja. Srjedź awgusta budźe Łobjo za łódźe zaso wužiwajomne. Do toho dyrbja čaru hišće dokładnje přepytować.
