Žadaja sej pomoc za region awtow
Šwikawa (dpa/SN). Njewěsteje situacije w awtomobilowej branši dla, kotruž su wosebje produkciske skrótšenja pola VW w Šwikawje zawinili, žadaja sej regionalni akterojo wosebite hospodarske pasmo za juhozapadnu Saksku. Zaměr tutoho pasma je přićahliwosć nowych zawodow z dawkowymi powabkami a spěšnišimi dowolnosćemi. Předewšěm wabja za wobłuki w zakitowanju, kumštnej inteligency a robotice. Tola wulki zadźěwk su kóšty energije a pobrachowacy personal.
Produkciske cofnjenje pola VW, mjez druhim dla šmórnjenja nócneje słužby a redukowanja hotowanskeje linije, wohrožuje mnoho dźěłowych městnow. Agentura za dźěło warnuje před dwucyfrowej kwotu bjezdźěłnosće. Kwota we wokrjesu Šwikawy je hižo wot 5,1 na 6,0 procentow rozrostła. To rěka, zo je něhdźe 9 700 wobydlerjow tuchwilu bjezdźěłnych. Tež wukubłanskich městnow je mało. Krajny rada Carsten Michaelis (CDU) praji, zo njeje awtowa industrija zhubjena. Přiwšěm pak wuzběhuje trěbnosć nowych hospodarskich perspektiwow. Zhorjelc pokaza, kak zawod we brónjenskim wobłuku za twar pancerowych dźělow wužiwaja.
Putnicy dźensa Božu mšu swjećili
ADAC warnuje před haćenjemi
To a tamne (23.07.25)
Uda Jürgensa chcedźa w jeho ródnym měsće w awstriskim Klagenfurće z trajnej wustajeńcu počesćić. Mysličku za wobšěrnu přehladku wo jeho žiwjenju a skutkowanju stej dźěsći Jürgensa John a Jenny předstajiłoj. Dokładnu koncepciju bórze wuwija. Najpozdźišo w lěću 2027 budu wustajeńcu wotewrěć. Udo Jürgens bě so w Klagenfurće narodźił a tam klawěr a kompoziciju studował. 80lětny zemrě 2014 w Šwicarskej.
Legendarny spěwar heavy-metaloweje hudźby Ozzy Osbourne je njeboh. 76lětny zemrě wčera. Tole je jeho swójba zdźěliła. Hakle před tydźenjemi bě Osbourne, kotryž ćerpješe pod Parkinsonom, hišće na přewšo wuspěšnym poslednim koncerće w swojim ródnym měsće Birmingham spěwał. Wón bu jako spěwar sławneje skupiny Black Sabbath znaty a bě wot 1980 hač do srjedź 1990tych lět wosebje wuspěšny.
Berlin a Oslo na dobro Ukrainy
Berlin (dpa/SN). Němska a Norwegska chcetej zesylnjenje ukrainskeho powětroweho wotwobaranja zhromadnje financować. Norwegski ministerski prezident Jonas Gahr Støre rjekny po zetkanju ze zwjazkowym kanclerom Friedrichom Merzom (CDU) w Berlinje, zo je Oslo zwólniwy, tomu přinošować. Němska chce Ukrainu ze systemomaj Patriot podpěrować. Dokelž pak njejstej tuchwilu k dispoziciji, chce zwjazkowa wobora dwaj systemaj ze swójskich składow do Ukrainy pósłać.
Iran: Wuspěch wědomostnikow
Washington (dpa/SN). Iran nochce so po słowach wonkowneho ministra Abbasa Araghtschija swojeho programa k nabohaćenju urana wzdać, je pak k rozmołwam zwólniwy. Kraj njemóže nabohaćenje urana spušćić, dokelž je tole „wulki wuspěch našich wědomostnikow“, rjekny Araghtschi sćelakej USA Fox News. Iran pak chce dale wo tym rěčeć, zo „by zaručene było, so nabohaćenje jenož měrliwym zaměram słuži“, wón rjekny.
Wall Street Journal wuzamknjeny
Wobydlerjo filipinskeje stolicy Manila bědźa so z wozami po ...
Nowe rozmołwy z Ruskej
Kijew (dpa/SN). Po informacijach ukrainskeho prezidenta Wolodymyra Zelenskeho ma so přichodne koło jednanjow z Ruskej wójny w Ukrainje dla jutře w Istanbulu wotměć. Tole je jemu posrědnik Rustem Umjerow zdźělił, Zelenskyj rjekny. W prěnim rjedźe póńdźe wo wuměnu wójnskich jatych.
Ruska njeje planowane rozmołwy dotal oficialnje wobkrućiła. Powěsćernja Tass bě njedawno štwórtk jako móžny termin mjenowała. Zelenskyj připowědźi zdobom nowe nalěty na Rusku. Tute měrja so po jeho słowach přećiwo logistiskim centrumam trutow, kotrež Ruska we wulkej ličbje do Ukrainy sćele. Kijew trjeba nimo toho lěpši powětrowy škit přećiwo tajkim nadpadam.
Racije přećiwo wažnemu zarjadej
Kijew (dpa/SN). Ukrainska tajna słužba SBU je zhromadnje z generalnym statnym rěčnistwom pola wjacorych sobudźěłaćerjow narodneho antikorupciskeho zarjada NABU racije přewjedła. Potrjechenym wumjetuja, zo su ruskej tajnej słužbje informacije dale dawali. Sobudźěłaćerjo NABU su nimo toho pječa ukrainskim předewzaćelam pomhali, Ukrainu ilegalnje wopušćić.
Medije tukaja, zo chce prezident Wolodymyr Zelenskyj z akciju ćišć na zamołwitych NABU wukonjeć, kotřiž přepytuja tež přećiwo Olexijej Černyšowej, dowěrnikej Zelenskeho. Ukraina wojuje přećiwo korupciji. Najebać to słuša kraj k najkoruptnišim po wšěm swěće, štož saha hač do najwyšich kruhow.
Žadaja sej kónc wójny w Gazy
Rom/Gaza (dpa/SN). Wonkowni ministrojo wjace hač 20 krajow žadaja sej w zhromadnej deklaraciji hnydomny kónc wójny w Gazaskim pasmje. Zdobom kritizuja postupowanje Israela w zwisku z humanitarnej pomocu w dospołnje zawrjenym pasmje. „Wójna w Gazy dyrbi so hnydom skónčić“, w dokumenće rěka. W Gazaskim pasmje zawlečeni zastajency měli so hnydom pušćić, sej kraje žadaja.
Israel je deklaraciju wotpokazał měnjo, zo je „bjez poćaha k woprawdźitosći“. Stejišćo je „wopačny signal“ teroristiskej organizaciji Hamas, kotraž je wójnu započała a kiž je „sama“ za to zamołwita, zo njeje najebać tuchwilne rozmołwy přeco hišće k přiměrej dóšło.
Deklaraciju je 25 krajow podpisało, mjez nimi Italska, Francoska, Awstriska, Wulka Britaniska, Belgiska, Kanada kaž tež komisarka EU za runostajenje. Němska njeje mjez podpisarjemi.
Israel je wčera rozdźělowanski centrum UNO nadpadnył a přepytował a sobudźěłaćerjow zajał. Humanitarne połoženje w pasmje je dale katastrofalne.
Hladanje starych zaso dróše
Připłatki w starownjach a hladarnjach mjezu 3 000 eurow překročili
Berlin (dpa/SN). Wothladanje w starownjach je za wobydlerjow dźeń a dróše. Připłatki ze swójskeje kapsy w prěnim lěće přebytka su w cyłoněmskim přerězku mjezu 3 000 eurow wob měsac překročili, kaž z wuhódnoćenja zwjazka narunanskich kasow wuchadźa. 1. julija wučinješe tutón podźěl 3 108 eurow. To je 124 eurow wjace hač 1. januara a 237 eurow wjace hač 1. julija 2024. Hladajo na tute ličby ćišć na zamołwitych w tuchwilnych wuradźowanjach nastupajo wulku reformu wothladanja dale přiběra.
Najdróše je hladanje potrěbnych w cyłoněmskim přirunowanju tuchwilu w Bremenje. Tam płaći městno w hladarni přerěznje 3 449 eurow měsačnje, powěsćernja dpa na zakładźe předležacych ličbow rozprawja. Najniša je płaćizna za wobydlerjow w Saksko-Anhaltskej z 2 595 eurami a w Mecklenburgsko-Předpomorskej z 2 752 eurami.
Suma wobsahuje swójski podźěl za ryzy hladanje a zastaranje. Hladanske zawěsćenje wšak jenož dźěl kóštow přewozmje. Wobydlerjo pak dyrbja swójski podźěl za přebywanje, zastaranje, inwesticije a kóšty wukubłanja připłaćić.
