W Němskej smy tuchwilu w času demografiskeje změny žiwi. Wjace dźěłopřijimarjow so na wuměnk rozžohnuje, hač so nowych přistaji. Hospodarska ministerka Katherina Reiche (CDU) namołwja ludźi, zo bychu so pozdźišo na wuměnk podali. Nimo wjele kritiki žněješe wona za to wosebje wot młodych dobry wothłós. To wšak nikoho njezadźiwa, wšako su woni ći, kotřiž dyrbja tu rentu zapłaćić. Tak je zwjazkowe knježerstwo připowědźiło, zo so rentowy přinošk wot 18,6 procentow na 22,3 procenty zwyši. Nimo toho chce knježerstwo lětsa 121 miliardow eurow za zakonske rentowe zawěsćenje přewostajić. To je wjele pjenjez, kiž potom w tamnych wobłukach faluje. Wězo ma so diferencować. Dźěłaćerjo na twarnišćach swoje dźěło ze 60 lětami hustodosć ze strowotnych přičin hižo wukonjeć njemóžeja. Štóž njetrjeba ćežke ćělne dźěło wukonjeć, problem strowoty nima. Tohodla měli ći, kotrymž je to móžno, dlěje dźěłać, zo bychu rentowe ­kasy wolóžili. Milan Jurk

Samotwarjene pławidło a třoch muži na nim je policija na jězoru njedaloko města Roth južnje Nürnberga sćazała. Mužojo běchu surfowanske deski zwjazali a piwowe blido z ławku na nje stajili. Z tutej konstrukciju jědźechu po jězorje, doniž so jich policija njedohlada. „Kapitan“ pławidła steješe sylnje pod wliwom alkohola. Kaž zastojnicy zwěsćichu, drje bě tež drogi brał. Mužojo dyrbjachu swój spław wopušćić.

Powostanki britiskeje wójnskeje łódźe z Prěnjeje swětoweje wójny je skupina mjezynarodnych nurjerjow před britiskim pobrjohom sewjerneho morja namakała. Při tym jedna so wo křižak HMS Nottingham. 16. awgusta 1916 bě němski podnurjak U 52 wójnsku łódź z torpedom trjechił a podnurił. 38 jendźelskich namórnikow je tehdy žiwjenje přisadźiło. Za łódźu běchu wjele lět pytali.

Doha (dpa/SN). W rozestajenju Gazaskeje wójny dla su USA swoju delegaciju z Katarskeje stolicy Doha domoj zwołali. ­Hamas nima chutny zajim, přiměr docpěć, rjekny wurjadny pósłanc USA Steve Witkoff. Do toho bě tež Israel swoju ­delegaciju cofnył. Planowany bě 60 dnjow trajacy přiměr a pušćenje zastajencow. Přiwuzni zastajencow regowachu zludani. W Gazy je hišće 50 israelskich zastajencow. 20 z nich je hišće žiwych.

Signale wotputanja

Berlin (dpa/SN). Hladajo na rozkoru w koaliciji zwrěšćeneje kandidatki SPD za zastojnstwo sudnicy na zwjazkowym wustawowym sudnistwje Frauke Brosius-Gersdorf dla jewja so ze stron CDU/CSU signale wotputanja. Šef kanclerskeho zarjada Thorsten Frei potwjerdźi, zo je Brosius-Gersdorf „wulce wustojna juristka“. Pječa na tym dźěłaja, zo wona wjetšinu hłosow zwjazkoweho sejma dóstanje. Wotpokazanje žony ze stron unije bě ­koalicisku zwadu z SPD zbudźiło.

Tójšto pjenjez a mało ludźi

Zadwělowani wojuja wobydlerjo městačka Omodos na cypernskej kupje přećiwo lěsnym wohenjam, kotrež sydlišćo wohrožuja. Wohenje na juhu srjedźomórskeje kupy njedaloko města Limassol su najhórše minjenych lět. Dotal staj dwaj wobydlerjej ­žiwjenje přisadźiłoj. Płomjenja běchu jeju překwapili, jako spytaštaj z awtom ćeknyć. Foto: dpa/Petros Karadijas