Ministrojo na najwyšej horje
Grainau (dpa/SN). Zwjazkowy minister za nutřkowne naležnosće Alexander Dobrindt (CSU) je dźensa swojich kolegow w zastojnstwje na najwyšej horje Němskeje Zugspitze witał. Hłowny zaměr zetkanja je zhromadna deklaracija, z kotrejž žadaja sej ministrojo raznišu europsku migracisku politiku.
Mjez přeprošenymi su ministrojo z Francoskeje, Pólskeje, Awstriskeje, Danskeje a Čěskeje kaž tež komisar EU za nutřkowne naležnosće Magnus Brunner. Zwjazkowe knježerstwo chce azylowe prawo „přiwótřić a skrućić“, bě Dobrindt w rozmołwje z časopisom Focus rjekł. „Hišće w juliju zahajimy zhromadnu iniciatiwu z pjeć krajemi, zo bychmy napřećo Europskej komisiji jasne stejišćo zwuraznili.“ Wobsahowje dźe wo škit wonkownych mjezow EU a wo móžnosć, migrantow tež do krajow wotsunyć, ke kotrymž woni žadyn poćah nimaja.
Nowe pomjezne kontrole Němskeje su w susodnych krajach iritacije zbudźili. Přezjedni pak sej wšitcy su, zo měli so wonkowne mjezy EU lěpje škitać.
Słowakska blokadu skónčiła
Nowe sankcije EU přećiwo Ruskej po přizwolenju Bratisławy wobzamknjene
Brüssel (dpa/SN). Zastupnicy čłonskich statow EU su na swojim wurjadnym posedźenju dźensa dalše sankcije přećiwo Ruskej wobzamknyli. Přičina je wójna Moskwy přećiwo Ukrainje. Je to mjeztym 18. paket naprawow EU.
Słowakski ministerski prezident Robert Fico bě do toho njewočakowano připowědźił, zo swoju blokadu přećiwo nowym sankcijam EU přećiwo Ruskej skónči. Wón je zastupnikam Słowakskeje kazał, hižo dźensa nowemu, mjeztym 18. pakćikej sankcijow přećiwo Ruskej přihłosować, Fico w interneće zdźěli.
Za zajimy Słowakskeje jako čłona EU by „kontraproduktiwne“ było, postupowanje dale blokować. Pozadk Ficoweho dotalneho spjećowanja bě zwada wo wukaz EU, po kotrymž měł so import ruskeho zemskeho płuna wot lěta 2028 skónčić. Słowakska je w dalokej měrje wot ruskeho płuna wotwisna.
Při tym Słowakska poprawom scyła ničo přećiwo sankcijam njeměješe. Knježerstwo w Bratisławje pak chcyše ze wšej mocu wotwobarać, zo je kraj wot lěta 2028 bjez płuna, štož by mjez wobydlerjemi wulki njeměr zbudźiło.
Almsick so nad złotom wjeseli
Stuttgart (dpa/SN). Franziska van Almsick je sej wěsta, zo je němski płuwanski sport na dobrym puću. „Wjeselu so jara nad wuwićom. Złota medalja Floriana Wellbrocka na čarje dźesać kilometrow bě wulkotna. Takle móža so swětowe mišterstwa započeć“, rjekny 47lětna bywša swětoznata płuwarka w rozmołwje z powěsćernju dpa k nowej dokumentaciji „Being Franziska van Almsick“, kotruž pokazaja wot 4. septembra w mediatece ARD a 21. septembra w telewiziji.
W Singapurje bě sej Florian Wellbrock z Magdeburga předwčerawšim, srjedu, prěni dźeń swětowych mišterstwow titul WM w morju wubědźił. Wčera bě wón na čarje pjeć kilometrow wuspěšny.
Almsick ma pozitiwne wuwiće w płuwanskim sporće za wulkotne. „Běch loni přemóžena, jako je Lukas Märtens prěnju olympisku medalju za Němsku po 36 lětach w basenku zdobył. Njejsym so jenož wjeseliła, dokelž je wón čłowjesce w porjadku, ale tež, zo je wón prěnju złotu medalju za cyle němske mustwo při olympiskich hrach domoj přinjesł.“ Almsick je dźesać olympiskich medaljow dobyła a bydli dźensa w Heidelbergu.
Festiwal ze serbskim filmom zahajili
To a tamne (18.07.25)
Felix Baumgartner, awstriski ekstremny sportowc, je smjertnje znjezbožił, jako ze swojim płujadłowym parašutom lećeše. 56lětny zrazy z dotal njeznateje přičiny w italskim pobrjóžnym městačku Adrije, Porto Sant‘Elpidio, na zemju, kaž policija zdźěla. Awstričan bu 2012 po wšěm swěće znaty, jako ze stratosfery na zemju skoči a jako prěni čłowjek zwukowu murju přewiny.
Wolfgang Grupp, bywši šef koncerna Trigema, je spytał sej žiwjenje wzać a je tole mjeztym wozjewił: „Sym w 84. lěće swojeho žiwjenja a ćerpju na tak mjenowanej depresiji starych ludźi. Tohodla sym spytał swoje žiwjenje skónčić“, piše 83lětny w lisće swojim něhdyšim sobudźěłaćerjam. Wón bě so prašał, hač je scyła hišće trěbny. Grupp wobžaruje, štož je so stało, a radźi wšitkim potrjechenym, sej profesionalnu pomoc pytać.
Tójšto mortwych w Syriskej
Damaskus (dpa/SN). Po dny trajacych namócnosćach na juhu Syriskeje su jednotki syriskeho knježerstwa městačko Suwaida, w kotrymž bydla Druzojo, zaso wopušćili. Ličba smjertnych woporow je mjeztym na 360 rozrostła. Po wudyrjenju namocy mjez Druzami a sunitiskimi Beduinami je syriske knježerstwo wójsko pósłało. Israel praji, zo je za škit Druzow zamołwity. Tohodla je objekty w syriskej stolicy Damaskusu bombardował.
Poćahi do Londona pohłubša
London (dpa/SN). Němska a Wulka Britaniska pohłubšitej swoje poćahi z wobšěrnym zrěčenjom wo mjezsobnym přećelstwje. Zwjazkowy kancler Friedrich Merz (CDU) je so dźensa do Londona podał, zo by 27 stron wopřijacy dokument zhromadnje z britiskim premierministrom Keirom Starmerom podpisał. Zrěčenje tematizuje wosebje zhromadne dźěło we wonkownej a wěstotnej politice. Krajej chcetej sej w padźe nadpada pomhać.
UNO kritizuje Israel
Ludźo zhladuja na chaos, kotryž su zapławjenja w měsće Zapopan w ...
Braniborska wukubła serbšćinarjow
Podstupim (SN/mb). Braniborski krajny sejm je na swojim wčerawšim posedźenju na iniciatiwu CDU zhromadny namjet „zachowanje a spěchowanje serbskeje rěče, kultury a identity w Braniborskej“ nimale jednohłósnje wobzamknył. Zapodali su namjet koaliciskej frakciji SPD a BSW a opoziciska CDU. Jeje łužiski zapósłanc Julian Brüning jako prěni w debaće předłohu za wobzamknjenje wopodstatni. Wón pledowaše za „rjećaz rěče wot pěstowarnje do matury“, jenož tak dalewobstaće wohroženeje delnjoserbšćiny zaruča.
Najwažniši praktiski dypk je załoženje wukubłanja wučerjow za serbšćinu na zakładnych šulach. Z tym chcedźa w zymskim semestrje 2026/2027 na uniwersiće Choćebuz/Zły Komorow započeć. Choćebuski wyši měšćanosta Tobias Schick (SPD) je wobzamknjenje jako „wuznamnu kročel za daledawanje delnjoserbskeje rěče“ chwalił. Choćebuz a wokrjes Sprjewja-Nysa podpěrujetej młodych ludźi, kotřiž wučerstwo za serbšćinu studuja, ze swójskim stipendijom.
Němska plany EU wotpokazuje
Brüssel/Berlin (dpa/SN). Zwjazkowe knježerstwo je namjet prezidentki EU komisije Ursule von der Leyen nastupajo nowy dołhodobny etat Europskeje unije wotpokazało. Wobšěrny rozrost etata EU njemóžeš nikomu rozkłasć w časach, w kotrychž čłonske staty wo to wojuja, zo swoje budgety stabilizuja. To rjekny rěčnik knježerstwa Stefan Kornelius a zjima: „Tohodla njemóžemy to akceptować.“
Němska politikarka CDU chce wjelelětny etat EU widźomnje rozšěrić, mjez druhim dla nowych inwesticijow za wěstotu a zakitowanje. Po woli komisije EU ma etat za lěta 2028 hač do 2034 něhdźe dwaj bilionaj eurow wopřijeć, 700 miliardow wjace hač w tuchwilnej sydom lět trajacej dobje planowanja.
Namjetowane zwyšenje budgeta chcedźa w Brüsselu zdźěla tež z nowymi dochodami wurunać. Tak planuja mjez druhim wotedawk za zběrany elektroniski šrot, kotryž přińdźe na deponiju. Wulke wikowanske předewzaća z wobrotom wjace hač sto milionow eurow maja wotedawk płaćić. Tež to Němska wotpokazuje.
Zamołwitosć fairnje rozdźělić
Nowa hospodarska ministerka pruwuje kóšty energijoweje změny
Berlin (dpa/SN). Ministerka za hospodarstwo a energiju Katherina Reiche připowědźa změnu dotalneho kursa energijoweje změny. „Dyrbimy kóšty znižić“, rjekny politikarka CDU powěsćerni dpa w Berlinje. „Minjene lěta smy politiski zaměr jeničce na spěšny wutwar wusměrili. Energijowa změna pak je jenož wuspěšna, hdyž wutwar wobnowjomnych energijow a nastawace kóšty konsekwentnje zwjazujemy.“ Wobhospodarjo připrawow za ekomilinu maja so přichodnje na kóštach za wutwar milinoweje syće wobdźělić.
Kónc lěća chce Reiche rozprawu wo energijowej změnje předpołožić, w kotrejž wona wotpohlady energijoweje změny a woprawdźitosć přirunuje. „Trjebamy nuznje wjace móžnosćow wodźenja za wurunanje chabłanja w produkciji miliny, kotrež wobnowjomne energije zawinuja. Tež składźišća miliny su wažne. Te su pak jenož dźěl rozrisanja. Wobhladamy sej wuslědki pruwowanja jara dokładnje. Potom sformulujemy trěbne konsekwency“, Reiche rjekny.
