Wadephul na ćežkej misiji w Israelu
Berlin (dpa/SN). Wonkowny minister Johann Wadephul (CDU) je so dźensa na dwaj dnjej trajacy wopyt do Israela a do kraja zapadnje Jordana podał. W Tel Avivje wočakowaše jeho israelski wonkowny minister Gideon Saar.
Jutře chce so Wadephul w Jerusalemje ze sobudźěłaćerjemi UNO a w Ramallahu ze zastupnikami palestinskeho awtonomneho zarjadnistwa zetkać. Wotběh rozmołwow budźe rozsudny za dalše postupowanje Němskeje, tak zwjazkowy kancler Friedrich Merz.
Minjene dny běchu Francoska, Wulka Britaniska a mjeztym tež Kanada připowědźili, zo chcedźa stat Palestinjanow oficialnje připóznać. Němska porno tomu měni, zo měli tutón krok skerje na kóncu dołheho procesa po puću k rozrisanju dweju statow zwoprawdźić. Doraznje pak žada sej Němska wot Israela, zo ciwilnu ludnosć w Gazaskim pasmje zastaraja. Merz njebě hladajo na to naprawy přećiwo Israelej wuzamknył. Jeho předchadnik Olaf Scholz (SPD) bě Israel stajnje jenož powšitkownje namołwjał.
„Klimowa politika skepsana“
Předsyda dźěłarnistwa IGBCE warnuje před dalšim wotpućowanjom firmow
Berlin (dpa/SN). Industrijne dźěłarnistwo hórnistwa, chemije a energije (IGBCE) warnuje před přiběracym wotpućowanjom a zawrjenjom industrijnych zawodow w Němskej. Zo bychu tomu zadźěwali, žada sej předsyda dźěłarnistwa Michael Vassiliadis nowe wusměrjenje industrijneje a klimoweje politiki.
„Dyrbimy třiróžk hospodarjenja, socialneje zamołwitosće a škita klimy zaso wurunać. Za to trjebamy aliancu Zwjazka, krajow a socialnych partnerow“, wón měni.
Nawoda dźěłarnistwa rěči hladajo na to wo problemach, kotrež je Němska sama zawinowała. „Jedyn z nich je skepsana klimowa politika“, Vassiliadis rjekny. Najwjetši problem je popłatk za wuhlikowy dioksyd. „Politika je na wiki so złožowacy system natwariła, kotryž nětko radikalne wične wuslědki prezentuje. A to dosć a nadosć: Wotpinjenje, wotpućowanje a wottwar dźěłowych městnow.“
Puć do Absurdistana
W Dešnje hordźi na swoje baćony
Žana hnada za „rozkuskowarja“
Drježdźany/Waldheim (dpa/SN). Sakski ministerski prezident Michael Kretschmer (CDU) wotpokazuje, wobhnadźenje „rozkuskowarja“ Detleva G. Tole wuchadźa z informacije nowinarjow. Statna kenclije so wo tym njewupraja, pokazujo na wosebitosće prawa wobhnadźenja.
Zwjazkowe sudnistwo bě Detleva G. lěta 2018 mordarstwa dla k jastwu na čas žiwjenja zasudźiło, dokelž bě tón předewzaćela z Hannovera morił a toho ćěło rozkuskował. Do toho bě Drježdźanske krajne sudnistwo dwójce snadniše chłostanja wukazało, zo by wosebitosći sudniskeho pada wotpowědowało: Wopor Detleva G. bě njeskutkej přihłosował. Mužej běštaj so w internetnym forumje zeznałoj a sej fantazije wo kanibalizmje wuměniłoj.
Pad bě swojeje njenormalnosće dla wulku kedźbnosć zbudźił a juristow zaběrał. Naposledk žadachu sej wjacori profesorojo prawnistwa w nětko wotpokazanej zhromadnej próstwje wobhnadźenje Detleva G. Fachowcam je pad dopokaz, zo dyrbi stat zakonik předźěłać: Zamordowanje čłowjeka njesmě so w kóždym padźe z jastwom na čas žiwjenja chłostać. Trěbne je diferencowanje.
Pytaja za třećim pilotom
To a tamne (31.07.25)
Prochsrěbak w nócnych hodźinach je w Neu-Isenburgu pola Frankfurta nad Mohanom zasadźenje policije zawinował. Swědk bě na parkowanišću wobkedźbował, kak mužej z elektriskej piłu awto „wobdźěłataj“, wočiwidnje, zo byštaj so do njeho zadobyłoj. Přiwołani policisća nańdźechu woprawdźe dwě wosobje, kotrajž pak runje kófrowu rumnosć awta wusrěbaštaj. Zastojnicy jimaj wobkrućichu, zo je awto nětko čiste. Nócnu rjedźensku akciju přiwšěm skónčichu.
Wjace mikroplastiki hač dotal myslene kóždy čłowjek wšědnje zadycha. Tole su fachowcy uniwersity w francoskim Toulouse zwěsćili. Wosebje w nutřkownych rumnosćach a w awtach je mnóstwo zadychaneje plasty jara wulke, přerěznje 68 000 móličkich dźělčkow wšědnje. Te zadobywaja so do płucow a zawinuja tam zahorjenja a dalše škody organa.
Ultimatum Trumpa zahajeny
Washington (dpa/SN). Dźesać dnjow trajacy ultimatum prezidenta USA Donalda Trumpa nastupajo wyše cła za ruskich wikowanskich partnerow je zahajeny. „Dźesać dnjow wot dźensa“, rjekny Trump wčera wječor žurnalistam w lětadle ze Šotiskeje do USA. Po tutym puću chce Trump Rusku k měrowym jednanjam z Ukrainu nuzować. Poprawom bě Trump Ruskej 50 dnjowski ultimatum stajił, pozdźišo pak tole na „dźesać do dwanaće dnjow“ přikrótšił.
Kabinet etat 2026 schwalił
Berlin (dpa/SN). Zwjazkowe knježerstwo je dźensa naćisk zwjazkoweho etata 2026 wobzamknyło. Budget předwidźi wudawki dobrych 520 miliardow eurow a nowe kredity 174 miliardow eurow. Zwjazkowy financnym minister Lars Klingbeil (SPD) je plany w Berlinje přestajił. Centralne ćežišća knježerstwa su po jeho słowach mjez druhim inwesticije za spěšny rozrost hospodarstwa a wjace dźěłowych městnow kaž tež za wěstotu.
Söder hrozy wupowědźić
Pomocnicy čakaja na lěpše wjedro
Islamabad (dpa/SN). W horinach Karakoruma w Pakistanje znjezboženu bywšu němsku biatletku Lauru Dahlmeier njejsu dotal hišće wuchowali. Tole zdźěli rěčnik městneho Alpoweho towarstwa a zamołwiteho ekspediciskeho předewzaća powěsćerni dpa.
Wuchowansku akciju za 31lětnu dyrbjachu wčera wječor ćmy dla přetorhnyć. Přičina su wichory a špatne wjedro z kurjawu. Dźensa rano chcychu nazhonitych krosnowarjow na horu pósłać. Dahlmeier poda so póndźelu z dalšej krosnowarku na 6 069 metrow wysoku horu Laila Peak, jako ju na wysokosći 5 700 lawina kamjenjow trjechi. Wot toho časa nimaja wjace kontakt k njej.
