Netanjahu chce Gazu wobsadźić
Gaza/Tel Aviv (dpa/SN). Israelski ministerski prezident Benjamin Netanjahu je so po informacijach medijow rozsudźił, zo Gazaske pasmo dospołnje wobsadźi. Za to chce sej přichodne dny podpěru knježerstwa a nawodnistwa wójska zaručić. Medije cituja w tym zwisku sobudźěłaćerja Netanjahuwa ze słowami: „Smy so rozsudźili: Mamy wotpohlad, zo Gazaske pasmo dospołnje wobsadźimy.“
Israelske wójsko kontroluje tuchwilu 75 procentow zawrjeneho a dospołnje zničeneho pobrjóžneho pasma. W tutym regionje tuchwilu dwaj milionaj Palestinjanow pod surowymi wuměnjenjemi žiwori. Gazaske pasmo je po płoninje tak wulke kaž Mnichow. Israelske wójsko na to tuka, zo chowa islamistiska Hamas poslednich zastajencow w kónčinach, kotrež Israel hišće njekontroluje.
Nawodnistwo wójska je so dotal přećiwo dospołnemu wobsadźenju Gazaskeho pasma wuprajiło. Wotstronjenje wšitkich tunlow a bunkrow Hamas móhło lěta trać. Nimo toho hrozy zastajencam smjerć, hdyž so wojacy bliža.
Zanjerodźenju so wobaraja
Mjezynarodna konferenca za wobmjezowanje plasty w Genfje
Genf (dpa/SN). W šwicarskim Genfje su dźensa nowe wuradźowanja wo swět wopřijace zrěčenje nastupajo wužiwanje plasty zahajili. Zaměr je, zo po wšěm swěće płaćiwe naprawy za wobmjezowanje zanjerodźenja z plastowymi wotpadkami wobzamknu a tež přesadźa.
Dotalne wuradźowanja, kaž naposledk w južnokorejskim Busanje kónc minjeneho lěta, skónčichu bjez wuslědka. Tehdy běchu so zastupnicy něhdźe sto krajow, mjez nimi Němska, za hišće naročniše zrěčenje zasadźowali. Woni pak zwrěšćichu – poměrnje mała skupina wolij produkowacych krajow předewšěm z arabskeje kónčiny so tomu spjećowaše.
Hižo nětko plastowe wotpadki wšitke žiwjenske rumy zanjerodźa a tež čłowjekej zeškodźa. Slědźerjo USA su w mozach a jatrach zemrětych ludźi loni wo wjele wjace nano- a mikroplastiki našli hač hišće 2016. Konferenca w Genfje je posledni pospyt, zo so na powšitkownje płaćiwe zrěčenje za redukowanje zanjerodźenja z plastu dojednaja. Hač do 14. awgusta wuradźuja zastupnicy wjace hač 160 krajow.
Starodawny nałožk dale pěstuja
Za jednotne rjadowanja
To a tamne (05.08.25)
W jastwje wostać dyrbi rapper Sean „Diddy“ Combs z USA hač do spočatk oktobra planowaneho sudniskeho wusuda přećiwo njemu. Přisłušny sudnik w New Yorku je próstwu rappera wo dočasne pušćenje z jastwa wotpokazał. Prawiznicy hudźbnika su próstwu z tym wopodstatnili, zo rapper nikoho njewohrožuje a zo nochce ćeknyć. Woni poskićichu kawciju 50 milionow dolarow, zo by Diddy w domjacym aresće přebywał.
Atomowu milinarnju na měsačku planuje NASA, swětnišćowa agentura USA. Po internych rozprawach přiwza NASA w přichodnych 60 dnjach konkretne poskitki ze stron industrije za reaktor z wukonitosću sto kilowattow. Reaktor ma najpozdźišo 2030 na měsačku dźěłać. Pozadk je přiběraca konkurenca ze stron Chiny. Kraj planuje runočasnje misiju kosmonawtow na trabanće zemje.
Metropolit pola bamža
Vatikan (B/SN) Poćah mjez rusko-ortodoksnej a katolskej cyrkwju njebě za čas bamža Franciskusa najwuši. Spočatk junija je bamž Leo XIV. z prezidentom Ruskeje Wladimirom Putinom telefonował a sej rozrisanje konflikta žadał. Poskićenu městnosć za měrowe jednanja Putin wotpokaza. Z metropolitom Antonijom rěčeše bamž zašły tydźeń wo ortodoksnej a katolskej cyrkwi a wo konfliktach w Ukrainje a na Bliskim wuchodźe.
Młodźina w Romje była
Vatikan (B/SN). Milion młodostnych ze 146 krajow přebywaše minjeny tydźeń w Romje. Tysac měšnikow přijimowaše spowědź za dospołny wotpusk. Tysac ludźi je so wo wěstotu starało, 3 000 dobrowólnikow je wobdźělnikow škitało. 122 kamerow a wjacore truty su zarjadowanja wobkedźbowali. Dźesać chorobnych stacijow je młodźinu medicinsce zastarało.
Hudźba jako wěrywuznaće
Milion młodych ludźi w Romje
Rom (dpa/SN). Młodźi ludźo ze 146 krajow su z bamžom Lejom XIV. zakónčacu Božu mšu wurjadneho zetkanja młodźiny składnostnje Swjateho lěta w Romje swjećili. Zamołwići trochuja, zo je so w kónčinje Tor Vergata a wokolinje něhdźe milion ludźi zhromadźił. Na kóncu Božeje mšě bamž młodych wěriwych namołwješe: „Pytajće za swjatosću, hdźežkuli sće. Njebudźće z mjenje spokojom!“
W modlitwje spominaše bamž na wopory wójny po wšěm swěće: „Stejimy po boku młodych ludźi w Gazy, w Ukrainje a we wšěch krajach, kotrež su wot wójny střasene. Wy sće žiwe znamjo, zo je swět bratrowstwa a přećelstwa móžny“, Leo XIV. rjekny. Zetkanje młodźiny je centralny podawk Swjateho lěta.
Pósłanc Trumpa do Moskwy
Washington (dpa/SN). Prezident USA Donald Trump sćele swojeho wurjadneho posoła Steve Witkoffa srjedź tydźenja do Ruskeje. Witkoff pojědźe tam srjedu abo štwórtk, rjekny Trump žurnalistam w swojim lětadle po puću do Washingtona. To by bjezposrědnje do kónca dźesać dnjow trajaceho ultimatuma było, kotryž bě Trump ruskemu prezidentej Putinej za přiměr w Ukrainje stajił. Po tym chce Trump sankcije přećiwo wikowanskim partneram Ruskeje wukazać.
Kritizuje Södera ćěkancow dla
Berlin (dpa/SN). W debaće wo wobydlerski pjenjez za ludźi z Ukrainy je socialny politikar CDU Dennis Radtke předsydu bayerskeje CSU Markusa Södera raznje kritizował. Söder bě sej w rozmołwje ze sćelakom ZDF w Berlinje žadał, Ukrainjanam w Němskej wobydlerski pjenjez šmórnyć. Radtke mjenuje tole „klemjenje hermankarja“. Wón na to pokazuje, zo knježerstwo tuchwilu změnu dotalneje praksy přihotuje, po kotrejž dóstanu nowi ćěkancy popłatki po azylowym prawje.
Kóždy šesty by wojował
Bamž Leo XIV. je wčera z něhdźe milionom młodych wěriwych na ...
Klingbeil w USA na rozmołwach
Washington (dpa/SN). Z dojednanja mjez EU a USA wo mjezsobnych cłach dyrbjała Němska po měnjenju financneho ministra Larsa Klingbeila (SPD) konsekwency sćahnyć. „Swoje słabosće smy w zwadźe w Američanami jasnje pokazali“, rjekny Klingbeil rozhłosownikam do swojeho zetkanja z financnym ministrom USA Scottom Bessentom. Němska dyrbjała tuž sylnišo z partnerami kaž Kanadu a Wulkej Britaniskej hromadźe dźěłać, wón rjekny. Prócowanja wo swobodne swětowe wikowanje su po nowych cłach USA „poražku“ poćerpjeli. Klingbeil bě wčera do Washingtona dolećał.
EU a USA běchu so w cłownej zwadźe dojednali. USA žadaja sej wotnětka 15 procentow cła na importy z Europy.
