Mnichow (dpa/SN). Po tydźenje trajacym hłodowym stawku za lěpši škit klimy dalšeho wobdźělnika akcije „Hłód tradać, doniž njebudźeće sprawni“ z chutnymi strowotniskimi problemami w chorowni lěkuja. 61lětny Michael Winter je wčera wječor sam do nuzoweje přijimarnje Mnichowskeje chorownje přišoł. Jeho tam stacionarnje zaměstnichu. Hodźiny do toho běchu 35lětnu wosobu hłodoweho stawka dla w jednej z Berlinskich chorownjow lěkować dyrbjeli. Zaměr stawka je, zwjazkoweho kanclera Olafa Scholza (SPD) nuzować, so w knježerstwowym stejišću k stracham klimoweje krizy wuprajić. Scholz tole wotpokazuje.

London/Tel Aviv (dpa/SN). Łódź z Wulkeje Britaniskeje je z nimale sto tonami techniskich srědkow za nuzowe kwartěry po puću do Gazaskeho pasma. Posyłka ma jedna z prěnich być, kotruž w prowizoriskim přistawje wukładuja a do Gazaskeho pasma dowjezu. Jedna so wo 8 400 nuzowych kwartěrow z plastikowych planow w hódnoće 2,3 milionow eurow, britiske wonkowne ministerstwo zdźěla.

Při třěleńcy na sewjeru Gazaskeho pasma su po informacijach wójska pjeć israelskich wojakow zatřělili. Třo dalši wojacy so zranichu. Israelske medije rozprawjeja, zo su wojacy přez brónje swojich towaršow žiwjenje přisadźili. Israelske tanki běchu wčera z granatami na twarjenje w lěhwje ćěkancow Dshabalia třěleli, w kotrymž wojacy běchu. Wobsadka tanka měješe jich mylnje za wobrónjenych Palestinjanow. Tankisća stejachu w tymle času pod wulkim ćišćom, dokelž Palestinjenjo na nich z tanki ničacymi granatami třělachu. Wot spočatka Gazaskeje wójny je tam 626 israelskich wojakow padnyło. 3 500 so zrani.

Zo njeje naša maćeršćina jenož rěč domizny we Łužicy, ale tež zastupny lisćik do słowjanskeho swěta, drje wěmy a nimale kóždy dźeń Němcam powědamy. Faktisce je pak samo młodych Hornich Serbow, kiž ani Delnich Serbow njerozumja. A hdyž bychmy reprezentatiwne woprašowanje činili, kelko našich ludźi so na zakładźe swojeje maćeršćiny wo „słowjanske esperanto“ na wulětach do susodnych krajow prócuje a kelko radšo jendźelsce abo němsce rěči, njebych sej wěsty był, hač wuslědk našemu powědanju wotpowěduje. Je prawje, Němcow na komunikatiwny pokład serbšćiny skedźbnjeć. Ale tón argument za dobre serbske kubłanje, kiž je wjac hač jenož kluč do swójbneje komunikacije w kuchni („maći, daj mi prošu butru!“), budźe hakle wěryhódny, hdyž sami w našej europskej rěčnej praksy tomu wotpowědujemy. To zaruča – připódla prajene – wjele rjanych dožiwjenjow. A dopóznaće, zo njejsmy jenož we Łužicy kaž doma. Marcel Brauman

New York (dpa/SN). Hłowny wobskóržnik Mjezynarodneho swětoweho chłostanskeho sudnistwa je potwjerdźił, zo njebudźe so pospytam zatrašenja po­dwoleć. Karim Khan reagowaše předwčerawšim, wutoru w Bjezstrašnostnej radźe UNO na komentar nastupajo ćišć z USA: Tam su znjeměrnjeni informacijow dla, po kotrychž chcyło sudnistwo zajeće israelskeho ministerskeho prezidenta Benjamina Netanjahuwa wukazać. „Njedamy so zatrašić, ani přez wukaz zajeća přećiwo mi ani ze zajećom wolenych dostojnikow sudnistwa“, rjekny Khan najwyšemu gremijej UNO a tam přitomnym zastupnikam wetowych mocow. „Smy winowaći, so za sprawnosć zasadźić, zo móhli wopory zastupować a sym sej toho dospołnje wědomy, zo je w tutej rumnosći čłowječich hobrow z wulkej mocu a wliwom“, Khan dale rjekny. Eksistuje pak tajke něšto kaž zakoń, kotremuž je mjezynarodna organizacija zawjazana.