Kontrole mjezow jara napinace
Berlin (dpa/SN). Pomjezne kontrole a wotpokazanja při mjezach Němskeje njehodźa so po měnjenju dźěłarnistwa policistow GdP personalnje dołho předźeržeć. Tuchwilu zastojnicy dźěło jenož tohodla hišće zmištruja, „dokelž su słužbne plany přestajene, dalekubłanja jednotkow přetorhnjene a wottwar nadhodźinow zakazane“, rjekny předsyda dźěłarnistwa Andreas Roßkopf nowinarjam. Napinace kontrole kaž tuchwilu móže policija jenož hišće něšto tydźenjow zwoprawdźić, wón rjekny. Wjace hač tysac policistow je hižo dny dołho w pomjeznej kónčinje zasadźenych.
Zwjazkowy nutřkowny minister Alexander Dobrindt (CSU) bě hnydom po nastupje intensiwne kontrole wukazał.
Pandemije lěpje zmištrować
Genf (dpa/SN). Swětowa strowotniska organizacija WHO je na swojej dźensnišej hłownej zhromadźiznje w Genfje mjezynarodne zrěčenje wo zhromadnym dźěle w časach pandemije schwaliła. Zhladujo na wučby koronapandemije chcedźa chaotiskim poměram při wobstaranju pomocnych srědkow zadźěwać a šćěpiwa přichodnje sprawnišo rozdźělić.
Prezident WHA Tedros Ghebreyesus mjenuje zrěčenje „dobru powěsć“. Němska je organizaciji dalšu podpěru tež w financnej formje přilubiła. Berlin słuša k najwjetšim pjenjezydawarjam WHO, po tym zo su USA jako najwjetši přinošowar z organizacije wustupili. Na to bě WHO masiwne lutowanske naprawy a pušćenje přistajenych připowědźiła.
Paris, London a Ottawa hroža Israelej
Tel Aviv/Gaza (dpa/SN). Statni a knježerstwowi šefojo Francoskeje, Wulkeje Britaniskeje a Kanady su postupowanje Israela w Gazaskej wójnje jako „dospołnje přehnatu“ eskalaciju kritizowali a warnowanje wuprajili. „Njedyrbjał-li Israel wojersku ofensiwu skónčić a wobmjezowanje humanitarneje pomocy zběhnyć, reagujemy z dalšimi konkretnymi naprawami“, zdźělichu francoski prezident Emmanuel Macron, britiski premier Keir Starmer a toho kanadski kolega Mark Carey po wuradźowanjach.
„Ćerpjenje ludźi w Gazy je njeznjesliwe“, rěka w stejišću. Rozšěrjenje ofensiwy w tak a tak hižo dospołnje zničenym pobrjóžnym pasmje podpisarjo lista raznje wotpokazuja. Kraje nochcedźa tomu přihladować, zo knježerstwo Netanjahuwa „ze swojimi grawoćiwymi naprawami pokročuje.“ Kajke konsekwency tři kraje planuja, njeje znate.
Israelski ministerski prezident Benjamin Netanjahu stejišćo třoch statnych šefow kritizuje. Israel chce wójnu hakle skónčić, hdyž je wojersce dobył.
Trump za spěšne jednanja
Po telefonaće prezidenta USA z ruskim prezidentom Putinom
Kijew/Moskwa/Washington (dpa/SN). Po swojim telefonaće z ruskim prezidentom Wladimirom Putinom spyta prezident USA Donald Trump nadźiju na bórzomny přiměr zbudźić. Ruska wójna přećiwo Ukrainje je „přeliwanje kreje“, rjekny Trump. „Sym sej wěsty, zo chce Putin wójnu skónčić.“ Republikan potwjerdźi, zo bychu hnydomne jednanja wo přiměrje we Vatikanje móžne byli, po tym zo bě bamž Leo XIV. to poskićił. Nadrobnosće Trump njemjenowaše.
Ukrainski prezident Wlodymyr Zelenskyj rjekny, zo ruske wuměnjenja za móžny přiměr kaž cofnjenje wšěch ukrainskich jednotkow z wot Ruskeje wobsadźenych kónčin wotpokazuje. „Hdyž sej Ruska cofnjenje našich wojakow žada, potom to rěka, zo žadyn přiměr a žadyn kónc wójny nochce“, rjekny Zelenskyj w Kijewje. Ukrainske wójsko ma nadawk, teritorij kraja škitać. „Tuž njemóžemy jeho cofnjenju přihłosować.“
Zmysłapołny hobby
Mjedowa sezona je zahajena! To zwěsćam w tutych tydźenjach po chódnikach w swojim Berlinskim susodstwje kročo. Mjedowe škleńčki z mjenom kaž „Dźěłaćerska pčołka“ abo „Snědań mjedwjedźa“ wuhladam we wukładnych woknach małych wobchodow abo na stólčkach před kofejownjemi abo zhromadnymi běrowami. Hižo někotre lěta je pčołarjenje trend, runje tež mjez młodymi ludźimi – a to po cyłej Němskej. Jich njewabi jenož meditatiwny a rjemjeslniski aspekt abo rjany konkretny „wuslědk“ – cyle wědomje chcedźa z tym tež wopróšowanje rostlinow zaručeć. Zo by pčołarjenje prawje nawuknył, přewza w Serbskej pčólnicy nazhonity pčołar kmótřistwo za nowačka.
Bjez biotopow wšak, na kotrychž sej pčołki kćenjowy próšk nazběraja, tež pčołarjenje přichoda njezměje. Z rozsudom přećiwo kamjentnej zahrodźe abo wšědnje z roboterom wotsyčenemu trawnikej móže kóždy z nas w swojim wobswěće pčołkam tutón rum stworić. Milan Pawlik
Rjemjeslnicy wo dorost wabili
To a tamne (20.05.25)
Čerwjeny sněhakowarski woblek, elegantny wječorny šat, róžojty kłobuk: Kónc junija chcedźa wšelake drasty a dopomnjenki britiskeje princesny Diany (1961–1997) w kaliforniskim Beverly Hills přesadźować. K wosebitosćam słušatej kremowy barbny koncertny šat designerki Catherine Walker z lěta 1986 w hódnoće hač do 300 000 dolarow a kwětkaty šat studija Bellville Sassoon z lěta 1988, kotryž trochuja na 200 000 dolarow.
Hrožaceje lawiny kamjenjow dla su w šwicarskej dowolowej kónčinje Lötschental w kantonje Wallisu cyłu wjes ewakuowali. Něhdźe 300 wobydlerjow Blattena dyrbješe swoje domy wopušćić. Blatten leži direktnje pod 4 000 metrow wysokej horu Bietschhorn. Fachowcy su zwěsćili, zo drje so nahła skała hory nad wsu bórze wotłama a zo wulke mnóstwa kamjenjow wšón doł pod nim zapusća.
Stabilita garantowana
Vilnius (B/SN). Arcybiskop Georg Gänswein, kiž bě lětdźesatki sekretar kardinala Ratzingera a pozdźišeho bamža Benedikta XVI., zwěsća wulke wolóženje po wólbach bamža Leja XIV. „Wón je garant za stabilitu płaćiwych strukturow. Čas lubowólnosće je nimo.“ Japoštołski nuncius na Baltikumje Gänswein je přeswědčeny, zo budźe nowy bamž mosty twarić kaž jeho předchadnik a so konsekwentnje wo dušepastyrstwo na dobro cyrkwje tež w Litawskej starać.
Mjelčenje na čas žiwjenja
Vatikan (B/SN). Wólby bamža běchu najtajniše na swěće. Nimo kardinalow je tež kóžda ze 100 wosobow, kotrež su wólby organizatorisce podpěrali, mjelčenje na čas žiwjenja spřisahała. K nim słušachu kucharjo, lěkarjo, chorobne sotry, vatikanska straža, jězdźerjo, technikarjo, rjedźerki a spowědnicy, zdźěli portal Vatican News. Tež hłósne natočenja a fotografowanje běchu zakazane. Přeńdźenja chłostaja so z ekskomunikaciju, z wuzamknjenjom z cyrkwinskeje zhromadnosće.
Mnohotnosć cyrkej wobohaća
79. serbski ewangelski cyrkwinski dźeń wotměli
Huska. Ewangelscy Serbja běchu sobotu a njedźelu do Huski na 79. cyrkwinski dźeń přeprosyli. Serbski superintendent Krystof Rummel swjedźeń sobotu popołdnju pod hesłom „Spěwajće Knjezej nowy kěrluš“ (Psalm 98,1) zahaji. To bě tohorunja hesło wčerawšeje njedźele, kotraž mjenuje so Kantate.
W małej nutrnosći pokaza Rummel na to, zo so spěwanje kaž čerwjena nitka přez bibliju ćehnje, a mjenowaše přikłady z Božeho słowa. Tomu slědowaše přednošk dr. Roberta Lorenca wo Husčanskej wosadźe w statistice łužiskich Serbow Arnošta Muki. Wjac hač 20 wopytowarjow referentej ze zajimom připosłuchaše a na kóncu wuwi so žiwa rozmołwa. Někotři wopytachu hišće němsku Božu słužbu w Husčanskej cyrkwi.
Joe Biden na rak schorjeł
Washington (dpa/SN). Bywši prezident USA Joe Biden je po informacijach medijow na rak prostaty schorjeł. Kaž wjacore sćelaki rozprawjeja, jedna so wo agresiwnu formu chorosće, kotraž pak je najebać to lěkujomna. Zdobom su pola 82lětneho tež metastazy w kosćach zwěsćili. Biden a jeho swójbni z lěkarjemi nětko wo dalšim postupowanju wuradźuja. Wón bě kónc januara zastojnstwo prezidenta Donaldej Trumpej přepodał.
Mortwaj při zražce płachtaka
New York (dpa/SN). Płachtak mexiskeje mariny je do swětosławneho Brooklynoweho mosta w New Yorku zrazył. Při tym so kónčki wšěch třoch sćežorow płachtaka wotłamachu a dwě wosobje na łódźi wo žiwjenje přińdźeštej. Na płachtaku bě cyłkownje 277 ludźi. 22 namórnikow so při njezbožu na wukubłanskej łódźi „Cuauhtémoc“ zrani. Čehodla je swjedźensce pyšena łódź wočiwidnje bjez motora do mosta prasnyła, njeje hišće znate.
Wjacore nadpady z nožom
