Sakska přihotuje nowy plan za wuwiće kraja z wjac sobuskutkowanjom

Drježdźany (dpa/SN). Sakske knježerstwo chce w tutej wólbnej dobje nowy plan za wuwiće kraja (LEP) předpołožić a při tym komunam wjace sobuskutkowanja zmóžnjeć. „Tole ma so kaž čerwjena nitka přez cyły plan ćahnyć. Chcemy nowe móžnosće wotkrywać, město toho zo jim zadźěwamy. Z planom chcemy nowym idejam durje wotewrěć“, rjekny Regina Kraushaar (CDU), ministerka za infrastrukturu a krajne wuwiće powěsćerni dpa.

Předwidźany plan za wuwiće kraja je fachowe wobłuki přesahowacy cyłkowny koncept za přichod swobodneho stata. Wón wobsahuje strategije za wuwiće sy­dlišćow, za hospodarske spěchowanje, za škit přirody a wobswěta abo za wobchadnu infrastrukturu. Tež rozdźělenje płoninow za bydlenje, přemysło, ratarstwo abo wočerstwjenišća tam zapisaja.

Měniće, zo je nadpismo tohole přilopka derje sformulowane? Bohužel tajke wuprajenja dźeń a husćišo słyšimy a tola ­njemóžemy a nochcemy tych, kiž takle rěča, nastajnosći korigować. Widźo, zo drje šula dočinić njemóže, štož by trěbne było, zo by naš dorost nic jenož někak, ale derje serbsce rěčał, měł so kóždy wo dobru a čistu serbšćinu prócować. Wězo je wliw ­medijow wulki, a tola słyša dźěći w direktnej komunikaciji najprjedy raz swojeju staršeju, wowku a dźěda, ćetu a wuja, kubłarku a kubłarja a hakle po tym wučerja a wučerku. Smy sej toho wědomi? Kóždy, kotremuž je zachowanje našeje rěče ­wažne, njech sam dobru serbšćinu pěstuje. Při tym njetrjeba sej nichtó jazyk złamać. Wulki krok budźe hižo zmištrowany, hdyž smy wšě ejmore a zofty za sobu ­wostajili. A „měnju, zo ludźo to lěpje móža“ klinči tola rjeńšo hač „ja namakam ...“, abo? Weronika Žurowa

Na wšěch 25 awtow typa Mercedes z 1950tych, 60tych a 70tych lět bě předwčerawšim, njedźelu na Błótowskich dróhach po puću a dojědźe sej na kóncu do Bór­kowow. Tam cyłkownje 45 wobdźělnikow w Krajnym hotelu pozasta. Zhromadnje podachu so na wulět z čołmikami. Dwójce wob lěto sej čłonojo Berlinsko-Braniborskeje wotnožki po wšej Europje aktiwneho kluba lubowarjow tutych awtow do najrjeńšich kónčin regiona wuleća. Wšěch jednoća lubosć k starym awtam typa Mercedes-Benz. Wulět běchu w Rangsdorfje južnje Berlina zahajili. Wopyt w Bórkowach chcedźa na přichodnym zetkanju kluba wuhódnoćić. Foto: Michael Helbig

Pjeršćeń w žołdku kruwy je rěznik w bayerskim Vilshofenje namakał. Młody ratar bě pjeršćeń do toho při picowanju přisadźił a njemóžeše jón hižo namakać. Štyri měsacy po tym dowjezechu mjeztym dwě lěće staru jałojcu k rězanju do małeho rězniskeho zawoda. Bychu-li skoćo we wulkorězarni rozebrali, njeby nichtó wjace do žołdka pohladał. Tak pak je so pjeršćeń do swójby ratarja nawróćił. Tež toho mandźelska je zbožowna.

Wody we wulětniskej łódźi „Baltica“ dla bu jězba mjez Kühlungsbornom a Warnemünde na Baltiskim morju njejapcy skónčena. Dźesać mjeńšin po wotjězdźe łódźe bě so woda zadobyła. Kapitan so na to do Kühlungsborna nawróći. Pasažěrojo móžachu njezranjeni wulězć, policija zdźěli. „Baltica“ poča so na to podnurić. Mjeztym pak maja situaciju pod kontrolu. Přičinu hawarije nětko pruwuja.