Wólbny duel mjez SPD a AfD
Beeskow (dpa/SN). Z wulkej napjatosću zhladuja we wokrjesu Wódra-Sprjewja na rozsudne wólby wo zastojnstwo krajneho rady: Zajutřišim, njedźelu póńdźe wo rozsud mjez kandidatom SPD Frankom Steffenom a požadarjom AfD Rainerom Gallu, kiž bě w prěnim kole snadnje nawjedował. Dotal nimaja po informacijach sejma němskich wokrjesow po wšej Němskej žanoho krajneho radu AfD. Wotpowědnje napjeće zhladuja wobkedźbowarjo na rozsudne wólby na wuchodźe Braniborskeje.
Steffen ma podpěru strony přesahowaceho zwjazka: Lěwica wolerjow runje tak namołwja, za Steffena hłosować kaž Zeleni, po tym zo běštej stronje w prěnim kole podležałoj. Wokrjesny zwjazk CDU njeje so dotal jasnje wuprajił ale namołwja ludźi, „swoje demokratiske prawo při wólbach wužiwać“.
Generalny sekretar braniborskeje SPD David Kolesnyk ma wólby krajneho rady we wokrjesu Wódra-Sprjewja za wažne, dokelž njejedna so „wo normalne wólby“. „Trjebamy sylny signal demokratow za swój wokrjes a přećiwo šćuwanju AfD“, wón rjekny.
Nowy rozmołwny format zahajeny
To a tamne (12.05.23)
W tyzce za deskowe hry kaž šach abo halma je sej muž na britiskej kupje Isle of Man drogi domoj pósłać dał. Sobudźěłaćerjam pósty wón napadny, jako so stajnje zaso za posyłku prašeše. Jako pakćik skónčnje dóńdźe, jón přeswětlichu a policiju informowachu. Ta namaka pakćiki konopje w hódnoće 2 200 puntow, rjenje jako dar zapakowane. 24lětneho muža zajachu. Sudnistwo zasudźi jeho na pruwowanski čas dwanaće měsacow.
Młodźo běłeje mjedwjedźicy w Hamburgskim zwěrjencu Hagenbeck je holčka. Splah mjeztym 21 tydźenjow stareje mjedwjedźicy móžachu při šćěpjenju wuslědźić, zwěrjenc zdźěla. Młodźo je njesměrnje mobilne, aktiwne a přeslědźa wšitko, štož hladarjo jemu poskićuja, hałuzy, mlóče, bul z picu abo wodu z hadźicy. Wopytowarjo móža mać a młodźo bórze na wobrazowce wobkedźbować.
?
Zwjazkowe předsydstwo Domowiny zaběra so na swojim posedźenju jutře w Budyšinje z „Přihotom wólbow 4. serbskeho naměstnika ze Sakskeje do rady Załožby za serbski lud 2023–2027“. Kaž Serbske Nowiny zhonichu, je so prezidij Domowiny hakle 17. apryla, krótko do hłowneje zhromadźizny w Choćebuzu, z listom załožboweho direktora tutu naležnosć nastupajo zaběrał. Domowinje bě po napominanju z prawniskodohladoweho stejišća sakskeho ministerstwa za wědomosć, kulturu a turizm ze 6. měrca 2023 jenož jedyn dypk ze štyrjoch přistupny. Dokumentujemy dospołne stejišćo, kotrež je Dagmar Friede, nawodnica referata powšitkowne kulturne naležnosće, Serbja, wopomnjenska kultura, direktorej Załožby za serbski lud Janej Budarjej pósłała, w originalnej rěči:
Rechtsaufsichtliche Stellungnahme zur Benennung und Entsendung der Vertreterinnen und Vertreter des sorbischen Volkes aus dem Freistaat im Stiftungsrat der Stiftung für das sorbische Volk
Mortwaj w tworni Mercedes
Sindelfingen (dpa/SN). Při wutřělach w tworni awtotwarca Mercedes-Benz w Sindelfingenje njedaloko Stuttgarta je dźensa rano wosoba žiwjenje přisadźiła. Dalši čłowjek je hodźiny po tym ćežko zranjeny wudychał. Policija je podhladneho zajała. Po prěnich informacijach statneho rěčnistwa jedna so wo jednotliweho 53lětneho skućićela a nic wo amokowy njeskutk. Dalše informacije wo woporach a wo skućićelu spočatnje njepředležachu.
Ukraina w Bachmuće wuspěšna
Kijew (dpa/SN). Ukraina je po swójskich informacijach dalše wuspěchi w boju wo město Bachmut wuwojowała. Wójsko kraja je frontu na tři kilometry šěrokim pasmje nadběhowało a ruske jednotki wróćo zbiło. Teritorij je wot ruskich jednotkow wuswobodźeny, nawoda ukrainskeho regimenta Azow, Andrij Bileckyj zdźěla. Po informacijach NATO su ruske jednotki přiběrajcy w ćežkim połoženju. Porno tomu su přihoty ukrainskeje přećiwneje ofensiwy wotzamknjene.
Znowa rakety na Israel
Ćah tysacow migrantow z Mexika je južnu mjezu USA docpěł a ju ...
Steinmeier za planowany kónc brunicy 2038
Zły Komorow (dpa/SN). Zwjazkowy prezident Frank-Walter Steinmeier je so přećiwo skónčenju zmilinjenja brunicy do planowaneho termina 2038 we wuchodnej Němskej wuprajił. „Politika dyrbi wěcy rozkłasć a ludźom naležnosće wujasnić“, rjekny Steinmeier wěra wječor w rozmołwje ze sćelakom RBB. Ludźo přeja sej spušćomnosć. „Mamy wuhlowy kompromis. Tón předwidźi skónčenje wudobywanja brunicy w lěće 2038. Při tym měło tež wostać.“
SPD, Zeleni a FDP běchu w swojim koaliciskim zrěčenju postajili, zo chcyli kónc brunicy škita klimy dla w idealnym padźe hižo lěta 2030 přesadźić. W porynsko-westfalskej brunicowej kónčinje je to mjeztym hižo dojednane. We wuchodnych brunicowych kónčinach so tomu hišće spjećuja.
Steinmeier bě wutoru swoje hamtske sydło tři dny dołho do Złeho Komorowa w južnej Braniborskej přepołožił. Tam hižo dołho žanu brunicu wjace njewudobywaja. Na jeje městnje turizm hospodarskemu wuwiću w regionje polěkuje.
Habeck so „kampani“ njepodwoli
Berlin (dpa/SN). Zwjazkowy hospodarski minister Robert Habeck je w aferje wokoło swojeho statneho sekretara Patricka Graichena opoziciji w zwjazkowym sejmje wospjet wumjetował, zo chcyła pad wužić, zo by planam amploweje koalicije na dobro škita klimy zadźěwała. Z tutym zaměrom su „chětro raznje a nimale hižo złowólnje podtykanja, ranjenja a zdźěla łžě rozšěrjeli“, rjekny politikar Zelenych wčera wječor w sćelaku ARD. „Tohodla njejsym zwólniwy, ludźi woprować, zo bych so tutej kampani podwolił.“
Hladajo na wjele diskutowanu personalnu politiku w hospodarskim ministerstwje je opozicija z politiku Habecka zasadnje wotličiła. Generalny sekretar CDU Mario Czaja rjekny wčera w aktualnej hodźinje zwjazkoweho sejma, zo „Habeckowu zelenu swójbnu cwólbu“ starosće ludźi njezajimuja. Hladajo na kóšty přez zakoń k nowym tepjenjam Czaja skoržeše: „To njeje škit klimy, to je socialna zyma.“ Předsyda AfD Tino Chrupalla žadaše sej wotstup Habecka: „Je tuńšo, was wuměnić, hač miliony tepjenjow.“
„Kapka na horcy kamjeń“
Zastupnicy komunow kritizuja wuslědk wjerška ćěkancow dla
Berlin (dpa/SN). Wuslědki wjerškoweho zetkanja Zwjazka a zwjazkowych krajow nastupajo ćěkancow su mjez komunami kaž tež w rjadach opozicije zwjazkoweho sejma kritiku zbudźili. „Dojednanje hakle w nowembru je za lěto 2024 widźomnje přepozdźe a zawinuje w komunach wulke přesłapjenje“, rjekny hłowny jednaćel zwjazka městow a gmejnow Němskeje Gerd Landsberg nowinarjam. Wón wupraji so hladajo na to, zo su trajace rozrisanje wo financowanju zaměstnjenja ćěkancow na nazymu přestorčili. „To je špaty signal městam“, rjekny prezident sejma města Markus Lewe hladajo na wuslědki wčerawšeho wjerška.
Zelene wujowstwo
Štož wulka nowina „Grüne Familienbande – das Netzwerk von Habecks ,Mr. Wärmepumpe‘“ mjenowaše, je nětko takrjec hamtsce wobkrućene. Najebać to zdźěli minister Habeck, zo „njeje zwólniwy, ludźi kampani opozicije woprować“.
Zo běše – to jenož jedyn fakt wo horjeka naspomnjenej syći – „top-sobudźěłaćer hospodarskeho ministra na přepodaću načolneho zastojnstwa swojemu wěrowanskemu swědkej wobdźěleny“ (dpa), je drje „zmylk“, tak Habeck, procedere wobsadźenja čoła „Němskeje agentury za energiju“ cofnjene.
Ale wón chce epochalny přewrót při zastaranju z energiju personelnje po měritkach „bananoweje republiki“ managować. Najbóle fatalny je zaćišć, zo zamołwići strony, kotraž so rady k „diwersiće“ a „multikulti“ wuznawa, na centralnym polu politiki jenož z ludźimi kooperuja, kotřiž samsnemu „miljejej“ přisłušeja. To baza za dowěru w šěršich worštach ludnosće njeje. Marcel Brauman
