Prěnje rozmołwy w Durinskej
Erfurt (dpa/SN). Štyri tydźenje po wólbach krajneho sejma su CDU, BSW a SPD dźensa prěnje sonděrowanske rozmołwy zahajili. Při tym chcychu wodźacy zastupnicy třoch stron móžnosće zhromadneje knježerstwoweje koalicije pruwować. Sonděrowanja su zakład móžnych koaliciskich jednanjow. W Durinskej bě AfD jako najsylniša móc z wólbow krajneho sejma wušła. Wona je sylniša hač CDU, kotraž pak na tym wobstawa, nowe knježerstwo wutworić směć. Roje ruskich trutow na Kijew
Kijew (dpa/SN). Ruska je ukrainsku stolicu Kijew minjenu nóc z rojemi bojowych trutow nadpadnyła. Truty bližachu so z wjacorych směrow, wojerske rozkaznistwo zdźěla. Ukrainske wójsko je wšitke truty wotwobarało. Po dotalnych informacijach njeje so nichtó zranił. Tež škody njejsu žane nastali. Na juhu Ukrainy je ruski lětacy objekt do industrijneje kónčiny zrazył a woheń zawinił. Na juhu Ukrainy je znowa k zasakłym wojowanjam z ruskimi jednotkami dóšło.
Čas korony předźěłać
Rex Liberman spyta, chłódźak z bydlenja njesć, zo by jón ...
Dalši nawoda Hamas morjeny
Planuja próstwu wo zakaz AfD
Berlin (dpa/SN). W zwjazkowym sejmje chcedźa po informacijach nowin přichodnje wo tym wothłosować, zahajić proces zakaza AfD. Wotpowědnu próstwu podpěruja zapósłancy SPD, CDU/CSU, Zelenych a Lěwicy, nic pak cyłe frakcije. Zapósłancy AfD mjez druhim wumjetuja, zo chcyła wona swobodno-demokratiski zakładny porjadk Němskeje wotstronić a zo rani zasady čłowjeskeje dostojnosće.
Předsyda SPD Lars Klingbeil chcył so najprjedy raz fachowcow woprašeć. „To njeje politiske prašenje, ale juristiske“, wón rjekny. Wustawoškit měł pruwować, hač je nazběrany material dosahacy za zakaz politiskeje strony kaž AfD.
FPÖ wólby w Awstriskej dobyła
Wien (dpa/SN). Prawicarska FPÖ je wólby parlamenta w Awstriskej ze 29,2 procentomaj hłosow dobyła. Tole zdźěla nutřkowne ministerstwo kraja jako dotalny kónčny wuslědk wólbow. Dotalna strona zwjazkoweho kanclera ÖVP dyrbi so ze 26,5 procentami z druhim městnom spokojić. Konserwatiwna ÖVP je jědnaće procentow přirunujo z wólbami lěta 2019 přisadźiła. Samsny čas je FPÖ wo 13 procentow rozrostła.
Třeća najsylniša strona w Narodnej radźe, wulkej komorje parlamenta, je přichodnje SPÖ ze 21,1 procentom (-0,1). Liberalna strona Neos dósta dźewjeć procentow (+0,9). Zeleni, kotřiž su dotal z konserwatiwnymi knježili, docpěchu tónkróć jenož wosom procentow (-5,9). Małe strony kaž Piwowa strona abo komunistiska KPÖ wostachu jasnje pod w Awstriskej płaćacej mjezu štyrjoch procentow a njejsu tak hižo w parlamenće zastupjene. Předsyda dobyćerskeje FPÖ Herbert Kickl je tamne strony do koalicije namołwjał. Zwjazkowy kancler Karl Nehammer (ÖVP) tole wotpokazuje.
Pozbudźowacy signal
CSD měrnje wotběžał
Zhorjelc (dpa/SN). Wot prawicarskich protestow přewodźene su sta ludźi mjeztym třeći Christopher Street Day (CSD) w Zhorjelcu swjećili. Pod hesłom „Samsne prawa za wšěch!“ ćehnjechu woni zawčerawšim po hraničnym měsće tež do Pólskeje. W socialnych syćach běchu němscy a pólscy prawicarjo namołwjeli, přećiwo přiwisnikam CSD protestować. Po informacijach policije wobdźěli so wjace hač 700 ludźi na zarjadowanju CSD, při napřećiwnym protesće bě jich něhdźe 460.
Němska kaž tež pólska policija běštej wjetše zasadźenje přihotowałoj. Po informacijach policije su zastojnicy direktnemu zetkanju wobeju zhromadźiznow zadźěwali. „Ćahaj smy w rozdźělnych časach dowolili, najprjedy přećah CSD a potom napřećiwny protest“, rěčnik policije wuswětli. Po informacijach policije je wšitko poměrnje měrnje wotběžało a njedóńdźe k wukročenjam abo namócnym rozestajenjam. Na spočatku napřećiwneje zhromadźizny pod hesłom „Domiznu a tradiciju wobchować“ někotři wobdźělnicy zakazane prawicarske parole pokazachu. Přećiwo potrjechenym je policija přepytowanje zahajiła.
To a tamne (30.09.24)
Při pytanju hribow w lěsu pola Regensburga je 64lětneho muža dźiwje swinjo nadběhało. Kaž muž nowinje „Donaukurier“ rozprawja, měješe wón strach wo swoje žiwjenje a je 20 mjeńšinow ze skoćećom wojował, doniž njeje skónčnje ćeknyło. Muž a dźiwje swinjo staj so při tym zraniłoj. Jako nadpadnjeny k swojemu awtu chwataše, zetka dalšeho muža, kotrehož je skoćo tohorunja atakěrowało. Tón pak móžeše so z kijom wobarać. Wobaj mužej stej na to zhromadnje do chorownje jěłoj. Policija a lěsnicy za dźiwim swinjećom pytachu a je naposledk zatřělichu.
Turistaj z Vietnama staj tele dny spytałoj z sportowymi črijemi a ćeńkimaj cholowomaj na 4 478 metrow wulku horu Matterhorn zalězć, štož so wězo zymy, sněha a loda dla njeporadźi. Pomocnicy dyrbjachu jeju na 3 500 metrach wuchować.
Iran njebudźe přihladować
Teheran (dpa/SN). Iran njewostanje w padźe wobšěrneje wójny Israela přećiwo Libanonej neutralny. Tole je wonkowny minister Abbas Araghchi na zetkanju wonkownych ministrow wjacorych krajow w New Yorku připowědźił. Araghchi žadaše sej zdobom brónjowe a hospodarske sankcije přećiwo Israelej. Mjezynarodnemu zjednoćenstwu statow wumjetowaše wón njekmanosć a zaprajenje hladajo na přiměr na Bliskim wuchodźe.
Braniborska CDU nochce z BSW
Podstupim (dpa/SN). Braniborska CDU nochce w móžnej koaliciji SPD ze Zwjazkom Sahry Wagenknecht (BSW) sobu dźěłać. Po sonděrowanskej rozmołwje wólbneho dobyćerja SPD z CDU wobě stronje zdźělištej, zo njejstej žadyn dalši termin rozmołwow dojednałoj. Tuž zwostanje SPD jenož hišće jenička móžnosć wutworjenja knježerstwa, dokelž nochce nichtó z AfD koaliciju wutworić. SPD zetka so tuž přichodny tydźeń z BSW.
Za wjace solara na balkonach
