Wuchod robustny
Halle (dpa/SN). Hospodarstwo na wuchodźe Němskeje móže z energijowej krizu lěpje wobchadźeć hač zawody na zapadźe Němskeje. Loni je produkcija na wuchodźe mjenujcy wo tři procentne dypki přiběrała, na zapadźe bě tomu 1,5 procentow, zdźěli wčera Leibnizowy institut za hospodarske slědźenje w Halle. Tež lětsa wočakuja fachowcy wyšu hódnotu nutřkokrajneho bruttoprodukta na wuchodźe přirunujo z cyłej Němskej. Kwota bjezdźěłnych so wulce njezměni.
Na wuchodźe a zapadźe pak njeje energijowa kriza tajke wulke škody zawinowała, kaž wočakowane. W nowych zwjazkowych krajach pak je hódnota předźěłanskeho přemysła přiběrała. Předewšěm twornja Tesla w Braniborskej je k tomu přinošowała. Twarska produkcija je porno tomu trochu woteběrała.
Jutry so wšitke naprawy kónča
Berlin (dpa/SN). Zwjazkowy strowotniski minister Karl Lauterbach (SPD) je wčera w Berlinje wuzběhnył, zo je koronapandemija w Němskej nimo. Hladajo na wirusowe warianty, šćěpjenja a tuchwilne pady w chorownjach móžemy z toho wuchadźeć, zo je pandemija přewinjena.
Strowotniski minister móže zrozumić, zo wobsteji zajim přepytować, kotre rozsudy a naprawy běchu wopačne. Powšitkownje pak hodźi so rjec, zo bě strategija dobra. Tak Lauterbach přizna, zo njeje poprawom trjeba było, šule tak dołho zawrěć. W času lockdownow běchu šule a pěstowarnje dlěši čas zawrjene.
Předwčerawšim je so fachowa rada ke koronje zwjazkoweho knježerstwa posledni raz w kanclerskim zarjedźe schadźowała. Jutry so wšitke statne škitne naprawy w zwisku z pandemiju skónča. Tež w strowotniskim wobłuku njebudźe wot zajutřišeho wjace předpisane nahubniki wužiwać. Šćěpjenja pře koronu nastupajo ma so hišće rozsudźić, kajke budźe dalše financowanje. Wšako maja wone do regularneho zastaranja přeńć.
„Zhromadnje dobudźemy!“
Ukrainski prezident Wolodymyr Zelenskyj na wopyće w susodnej Pólskej
Waršawa/Kijew (dpa/SN). Pólsku a Ukrainu zwjazuje po měnjenju ukrainskeho prezidenta Wolodymyra Zelenskeho wuske partnerstwo. „Wutroby Ukrainjanow a Polakow bija za swobodu, za njewotwisnosć wobeju krajow, za zhromadny dom – dobudźemy“, rjekny Zelenskyj wčera w narěči před kralowskim palastom we Waršawje. „Njeje žaneje mocy, kiž móhła ukrainsko-pólske přećelstwo přewinyć.“
Bě to prěni wopyt Zelenskeho w Pólskej po zahajenju ruskeho nadpada na kraj 24. februara 2022. We Waršawje wočakowaštaj jeho mjez druhim prezident Andrzej Duda a ministerski prezident Mateusz Morawiecki.
Za Pólsku ma wopyt w prěnim rjedźe wažny symboliski wuznam. Wot prěnjeho wójnskeho dnja su so Polacy ukrainskim wójnskim ćěkancam jako pomocliwi hosćićeljo wopokazali. Miliony přińdźechu přez mjezu, mnozy ćehnjechu dale do směra na zapad. Někotři wróćichu so do swojeje domizny. Tuchwilu ma po informacijach UNO něhdźe 1,6 milionow ludźi z Ukrainy w susodnej Pólskej škitny status.
Su přihotowani
Podstupim (dpa/SN). Braniborske kupjele pod hołym njebjom chcedźa za něhdźe měsac zaso wočinić. Po słowach Němskeje towaršnosće za wuchowanje žiwjenja (DLRG) su čestnohamtscy pomocnicy na sezonu derje přihotowani. Woni su w minjenych měsacach mnohich ludźi, kiž njemóžachu hišće płuwać, nětko wukubłali. Dale přewjedźechu kursy za wuchowanskich płuwarjow. Koronapandemije dla dyrbješe DLRG wjele płuwanskich kursow wotprajić. Tuž je čakanska lisćina zajimcow wotpowědnje dołha. Jara pozitiwne je wuwiće, zo maja w Braniborskej nětko 200 nowych wuchowanskich płuwarjow. Přiwšěm je to hišće přemało, zo móhli wšitkich tych wuwučować, kotřiž hišće płuwać njemóža.
Čestnohamtscy DLRG su w 15 braniborskich kupjelach zasadźeni. Při jězorach a druhich wodźiznach zasadźeja wobhospodarjo swójskich płuwanskich wuchowarjow. Tójšto městnosćow za kupanje pak je njewobsadźenych. Ludźo měli swoje płuwanske kmanosće tuž derje wotwažować. Loni je so po informacijach DLRG w Braniborskej 22 ludźi zatepiło, jedna wosoba mjenje hač lěto do toho.
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje: Manja Bujnowska 577 262
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (06.04.23)
Dokelž njeměješe 11lětna holca prawdźepodobnje wjace lóšt, ze swójbnym psom so wuchodźować, je wona psa prosće bjez wědźenja staršeju cuzemu na dróze předała. Nan holcy přizjewi pad policiji. Minjenu póndźelu bě holca w Landshuće z Yorkshire-terrierom po puću a narěča cuzeho, hač chce psa za něšto stow eurow kupić. Nimo rjaneho fenka pak ma 11lětna wulke mjerzanje ze staršimaj, kotrajž nětko za njeznatym kupcom pytataj. Policija jimaj pomhać njemóže.
Pilot w Južnej Africe dožiwi na lěće 3 300 metrow wysoko njeluboznu překwapjenku. Dokelž bě pytnył, zo so jeho naraz něšto „zymneho“ dótkny, wuhlada pod swojim sydłom jědojtu kobru. Pilot so tuž rozsudźi spěšnje na přichodnym lětanišću přizemić. Wón a štyrjo pasažěrojo mjeńšeje mašiny móžachu so wuchować. Njelubozny hósć, kobra, wšak bě so mjeztym zminył.
Planuja ofensiwu
Kijew (dpa/SN). Ukrainska wicešefina knježerstwa Irina Werešćuk je Ukrainjanow namołwjała, wot ruskich jednotkow wobsadźene kónčiny wopušćić. Tak planuje ukrainske wójsko ofensiwu. „Ukrainjanam radźu, kónčiny wopušćić a so do druhich krajow podać abo so na to přihotować“, wona wčera na syći telegram pisaše. Ukrainski prezident Wolodomyr Zelenskyj je so mjeztym do Pólskeje podał, hdźež chce so dźensa z tamnišim prezidentom Andrzejom Duda zetkać.
Medikamenty zaručić
Berlin (dpa/SN). Zwjazkowy kabinet měješe so dźensa w Berlinje z dowožowanjom medikamentow zaběrać. Tak bě minjene měsacy ćežko, wěste medikamenty schorjenym dodawać. Zwjazkowy minister za strowotnistwo Karl Lauterbach (SPD) namjetuje mjez druhim nowe postajenja za płaćizny. Němska dyrbjała za zhotowjerjow medikamentow zaso atraktiwna być. Předewšěm medikamenty za dźěći a antibiotika njemóžachu apoteki pacientam dodawać.
Płaća nětko wjace danje
Hačrunjež sławny Lipšćanski hosćenc „Auerbachs Keller“ w ...
Wuběrk z tójšto prašenjemi na Olafa Scholza
Berlin (dpa/SN). Unija ma při politiskim předźěłanju dawkoweho skandala wokoło Hamburgskeje banki Warburg tójšto wotewrjenych prašenjow k róli dźensnišeho zwjazkoweho kanclera Olafa Scholza (SPD). Je wjele přećiwkow a njejasnosćow, rjekny Matthias Hauer, zastupnik frakcije CDU/CSU zwjazkoweho sejma w financnym wuběrku wčera w Berlinje. „Amplowa koalicija bě tomu stajnje zaso zadźěwała, zo sej financny wuběrk na žadanje unije Scholza skaza.“ Tuž bě přepytowanski wuběrk zwjazkoweho sejma njewobeńdźomny. Scholz sam dyrbjał na wujasnjenju zajimowany być, wšako dźe wo jeho wěryhódnosć, Hauer potwjerdźi.
Přepytowanski wuběrk ma wujasnić, hač su za čas Scholza jako Hamburgskeho měšćanosty dawkowy pad politisce wobwliwowali a so wotpohladnje toho wzdali, zo ma banka městu 40 milionow eurow wróćić. Scholz twjerdźi, zo njemóže so hižo na podawk dopomnić. Mjeztym wšak je dopokazane, zo je so wón w lětomaj 2016 a 2017 z manageromaj banki zetkał.
Proces samo hakle klětu móžny
Palm Beach/Washington (dpa/SN). Bywši prezident USA Donald Trump na tym wobsteji, zo je njewinowaty. Wčera přečita statne rěčnistwo skóržbu přećiwo njemu. Tak jemu wumjetuja, zo je wobchodne podłožki w cyłkownje 34 padach na swoje dobro změnił. Systematisce je Trump spytał, negatiwne informacije wo nim njewozjewić, za čož je mjez druhim tež pjenjezy za mjelčenje płaćił. Z tym chcyše wón šansy na wólby prezidenta w lěće 2016 pozitiwnje wobwliwować.
Hnydom po přečitanju skóržby statneho rěčnistwa w New Yorku poda so bywši prezident zaso do Floridy, hdźež prěni raz wumjetowanje komentowaše. Tak wón wuzběhny, zo je stajnje wšitko za to činił, narod zakitować. Po jeho słowach spytaja jeho přećiwnicy tomu zadźěwać, zo móže wón znowa za zastojnstwo kandidować. Justicnemu systemej Trump njedowěri.
Dalši procedere w zwisku z procesom přećiwo njemu budźe so trochu dlijić. Tak je nětko móžno hišće próstwy stajić. Prawiznicy Trumpa móhli spytać, wěste podawki do dołhosće ćahnyć, tak zo móhł proces samo zwrěšćić.
