Drježdźany (dpa/SN). Tysacy ludźi su Dźeń jednoty Němskeje w sakskim sejmje swjećili. Prezident parlamenta Alexander Dierks (CDU) wupraji so w swojej narěči na oficialnym swjatočnym zarjadowanju za demokratiju. „Sym přeswědčeny, zo demokratija diskusije trjeba“, wón zwurazni. „Demokratija je to najdrohotniše, štož wobsedźimy.“ Zhromadny nadawk tuž je, „w dobrych debatach tež ze zwadami pokazać, zo smy kmani, na tutym fundamenće centralne prašenja ludźi w našim kraju rozrisać“. Dale skedźbni Dierks na zmužitych wobydlerjow, kotřiž běchu nazymu 1989 na dróhu šli a jednotu Němskeje zmóžnili.

Prezident Sakskeho wustawoweho sudnistwa Matthias Grünberg je hladajo na diskusije wo pozdatnych deficitach demokratije na wuchodźe Němskeje zadźiwany. Wólbne wobdźělenje je w potrjechenych krajach wysoke. „Z tym ludźo dopokazuja, zo je jim politika wažna.“

Mnichow (dpa/SN). Ćěriwa za jězdźidła su dźeń a tuńše. Bencin družiny Super E10 je mjeztym tak tuni, kaž w oktobrje lěta 2021, zdźěli wčera němski awtomobilny klub ADAC. Hladajo na přerězk po cyłej Němskej płaćeše zawčerawšim liter 1,631 eurow. To bě 1,2 centaj mjenje hač před dźewjeć dnjemi. Pła­ćizna za diesel je so tohorunja znižiła, tola nic tak sylnje kaž bencin. Tak bě tomu jenož 0,5 centow mjenje. Za liter diesela dyrbjachu kupcy w Němskej zawčerawšim 1,529 eurow zapłaćić.

Wobě płaćiznje za ćěriwo stej so minjene měsacy tendencielnje znižiłoj. Zańdźeny tydźeń bě to krótkodobnje hinak. Najwažniši signal za wuwiće je płaćizna za wolij.

Drježdźany (dpa/SN). Předsydaj sakskeje Lěwicy Susanne Schaper a Stefan Hartmann swoje zastojnstwo złožitaj. „Hač do krajneho stronskeho zjězda w nowembrje chcetaj swoje dźěło hišće wukonjeć“, zdźěli jednaćel Lěwicy Lars Kleba. Do toho běchu wšelake medije wo tym rozprawjeli. Kaž strona wčera informowaše, zwisuje rozsud z přesłapjacym wólbnym wuslědkom. Lěwica w Sakskej je jenož 4,5 procentow hłosow wolerjow na zašłych wólbach krajneho sejma dóstała. Zapósłancy su Susann Schaper minjeny tydźeń za předsydku frakcije wu­zwolili, Hartmanna za městopředsydu.

Wobaj běštaj zańdźenu wutoru stronjanow internje přez mejlku wo rozsudźe informowałoj a zmylki přiznałoj. „Fakt je, zo njemóžachmoj swojemu narokej wotpowědować a wólbne wuslědki našeje strony stabilizować. Nochcemoj na našimaj křesłomaj lěpić“, wonaj rozkładźe­štaj. Dale wuzběhnyštaj, zo je tež nadawk předsydy, w ćežkich krizach nowy započatk zmóžnić. „Połoženje je chutne a dyrbimy nowy započatk zmištrować.“

Lipsk/Drježdźany (dpa/SN). Warnowanske stawki přistajenych posłužbowych wotnožkow Lufthansy su na lětanišćomaj w Lipsku/Halle a Drježdźanach zapozdźenja a wupady zawinili. W Lipsku dyrbjachu pjeć lětow šmórnyć, w Drježdźanach samo jědnaće.

Pozadk je cyły dźeń trajacy warnowanski stawk posłužboweho wobłuka, kotryž bě dźěłarnistwo ver.di organizowało. Nawoda tarifoweje skupiny ver.di Paul Schmidt bě z wobdźělenjom spokojom. Wón nochcyše wuzamknyć, zo k tajkim stawkam tež w času nazymskich prózdnin dóńdźe. Dźěłarnistwo wojuje wo jasnje lěpše zapłaćenje něhdźe 140 přistajenych. Po informacijach dźěłarnistwa zasłuža woni zdźěla tysac eurow mjenje hač kolegojo na zapadźe. Tarifowe jednanja z dźěłodawarjemi Lipšćanskeho a Drježdźanskeho lětanišća njejsu dotal žane dojednanje wunjesli.

Lufthansa je mjeztym připowědźiła, zo chcyła wobě předewzaći zawrěć. Nadawki kaž přihot lětadłow za wotlět chcedźa z eksternymi firmami zmištrować. Dźěłarnistwo wojuje w tym padźe tež wo socialne tarifowe rjadowanje.