Drježdźany (dpa/SN). Sakska zwyši stupacych twarskich płaćiznow dla přiražki za socialny bydlenjotwar. To wobzamkny kabinet wčera w Drježdźanach. Maksimalna wysokosć spěchowanja na kwadratny meter wučinja wotnětka 4,80 eurow město dotal 3,80 eurow, rozłoži twarski minister Thomas Schmidt (CDU). Wyša přiražka ma inwestoram powabk dać, tež přichodnje spěchowanski program wužiwać, zo móhli domjacnosćam z mało dochodami bydlenski rum ­za znjesliwu podruž poskićić. Přez spěchowanje nowonatwarjene abo mo­dernizowane bydlenja smědźa so jenož ­domjacnosćam ze snadnymi dochodami přenajeć, ministerstwo wujasni.

Berlin (dpa/SN). Předsyda dźěłarnistwa zwjazkoweje wobory André Wüstner je přichodnemu zakitowanskemu minis­trej Borisej Pistoriusej (SPD) podpěru ­přilubił. Jeho zwjazk budźe jeho „skutkownje a kaž po zwučenym wašnju ­konstruktiwnje podpěrać“, wón wčera zwurazni. „Smy sej našeje zamołwitosće runje w času wójny wjace hač wědomi.“ Wüstner so na zhromadne dźěło wjeseli. Delnjosakski nutřkowny minister Pistorius je naslědnik Christine Lambrecht (SPD). Změna ma so jutře přewjesć.

Předsyda dźěłarnistwa Pistoriusa mjeztym jara chwali. Jako wobdźělnik koaliciskich jednanjow je wón dopo­kazał, zo ma politiski sylny hłós. „Štóž zamóže so přesadźić, žadyn strach před trěbnymi reformami nima.“ Połoženje Zwjazkoweje wobory je tak hubjene kaž nihdy do toho“, wón rozjasni. Tuž změje sej Pistorius spěšnje wobraz wo situaciji činić. Po krótkej fazy zadźěłanja měł wón jasnu wiziju za přichod měć“.

Tež předsyda CDU Friedrich Merz přeje nowemu ministrej wjele wuspěcha.

W Sakskej njejsu ani wólby zastupowacych załožbowych radźićelow dokónčić móhli, dokelž bě politisce „wopačnych“ kandidatow. W Braniborskej su najebać ­diskusiju w třěšnym zwjazku wo politiskim mandaće a serbskim zastojnstwje ­zapósłanca krajneho sejma jako zastu­powaceho radźićela do koła serbskich ­zastupjerjow z kraja wolili. Znajmjeńša je w direktnych listowych wólbach po cyłym kraju demokratisce legitimowana braniborska serbska rada njewotwisna wot spěchowanskich strukturow załožby, nic pak dalši wčera woleny zastupowacy čłon ­załožboweje rady, jednaćel Domowiny. Wěste je tuchwilu jenož, zo su wólby załožbowych radźićelow na braniborskim boku bjezdwěla płaćiwe. Zo njeswěći narodna organizacija, ale załožbowy direktor jako swětłownja demokratije prajo, zo móže załožba z kóždej wolenej kandidatku žiwa być, je nachwilnje najlěpša pointa w chaosu, kotryž su w Budyšinje na kóšty našeho ludu naparali. Marcel Brauman

Njebjelčicy/Berlin (SN). Zastupjerjo Serbskeho sejma su so předwčerawšim w Berlinje z braniborskim zapósłancom zwjazkoweho sejma Knutom Abrahamom (CDU) zetkali, kotryž je zdobom ­zastupowacy čłon parlamentariskeje přirady Załožby za serbski lud.

Hromadźe su temy kaž medialny pilotowy projekt za cyłu Europu z hranicy překročacej syću za młodych ludźi AKTIS, kotryž ma so 2024 zahajić, w Njebjelčicach iniciěrowany šulski projekt IANUA kaž tež w kubłanskim wobłuku zasydleny němsko-čěski-pólski uniwersitny projekt ETULIS rozjimali. Róle hraještej dale „nadhódnota serbskeje rěče a přez lětdźesatki zrosćene sebjewědomje serbskich wobydlerjow“. Na wobě bě wjelelětny wjesnjanosta „wnučkakmaneje gmejny“ Njebjelčicy Tomaš Čornak skedźbnił, kaž w zdźělence Serbskeho sejma rěka.

Runje tak su so Tomaš Čornak, Harald Baumann-Hasske, dr. Měrćin Wałda, Hanzo Wylem-Kell a David Chmelik, prezident Slavonic Europe, ze zapósłancom wo dialogu z Domowinu wo změnje strukturow kaž turistisko-hospodarske prašenja nastupajo wuměnili.