Měr ludźom najwažniši
Berlin dawa Kijewej dowolnosć
Washington (dpa/SN). Zwjazkowe knježerstwo je Ukrainje dowoliło, wot Němskeje dodawane brónje přećiwo wojerskim objektam na ruskim teritoriju zasadźić. Ruska je Ukrainu minjeny čas wosebje w Charkiwskej kónčinje wot zepěranišćow w bjezposrědnym pomjeznej ruskim teritoriju nadběhowała, zdźěli rěčnik knježerstwa Steffen Hebestreit. Z tym přizamknje su Berlin znowa knježerstwje USA. Te bě Ukrainje wčera wječor dowoliło, brónje USA we wobmjezowanym wobjimje přećiwo wojerskim objektam w Ruskej zasadźić. Ukrainske wójsko dyrbjało kmane być, „ruske wójsko nadběhować“, we Washingtonje rěkaše. Němski zakitowanski minister Boris Pistorius (SPD) je Ukrainje mjeztym nowy paket brónjow w hódnoće 500 milionow eurow přilubił.
Hač směła Ukraina wšě wot zapada přewostajene brónje za nadpady na wojerske objekty w Ruskej wužiwać, w NATO dale kontrowersnje diskutuja.
Idealny pad
Twarja inkluziwne hrajkanišćo
Štyrjo mortwi při njezbožu w Awstriskej
To a tamne (31.05.24)
Samo sudnik bě bjezradny: W USA je so muž k sudniskemu jednanju jězdźenja bjez jězbneje dowolnosće dla internetnje přizamknył – sedźo za wodźidłom awta. Sudnik Cedric Simpson w staće Michiganje nochcyše swojimaj wočomaj wěrić. Wobskorženy bě po puću k lěkarjej, kaž rjekny a pytaše runje za parkowanišćom. Rozhorjeny sudnik mužej kazaše, so hišće samsny dźeń w jastwje přizjewić. Po dwěmaj dnjomaj jeho zaso pušćichu. Přichodny sudniski termin je srjedu.
Na drjewjanym mosće so přełamał je kóń we wokrjesu Trier-Saarburg. Jěcharka chcyše wčera rano konja pěši po mosće wjesć, jako so zwěrjo ze zadnimaj nohomaj přełama a so snadnje zrani. Kóń njemóžeše wjace sam stanyć. Alarmowane wohnjowe wobory wjacorych wsow přijědźechu a konja skónčnje wuswobodźichu. 54lětna jěcharka so njezrani.
SSW pola Serbow na wuměnje
Budyšin (SN). We wobłuku informaciskeje jězby wopytuje skupina frakcije Južnoschleswigskeho wolerskeho zwjazka (SSW) w krajnym sejmje Schleswigsko-Holsteinskeje hač do dźensnišeho Serbow w Budyšinje. „Jako narodne mjeńšiny móžemy wjele wot druheho wuknyć. Dyrbimy styki wutworić a so wuměnjeć, zo bychmy dobre ideje sobu domoj wzali a tam zwoprawdźili“, praji Lars Harms, předsyda frakcije SSW.
Program wobsahuje wopyt Serbskeho muzeja, Serbskeho šulskeho towarstwa a medijopedagogiskeho projekta LUCIJA, Serbskeho instituta, Rěčneho centruma WITAJ kaž tež wopomnišća Budyšin.
Wažna tema, za kotruž so SSW a Domowina zasadźujetej, je přiwzaće mjeńšinoweho škita do zakładneho zakonja. Aktualne podawki z prawicarskoekstremnymi parolemi, wohroženjemi politikarjow we wólbnym boju, kóždežkuli nadpady na demokratiju SSW a Domowinu raznje zasudźujetej. W zhromadnej zdźělence rěka: „Stejimy zhromadnje za žiwu mnohotnosć. Zasadźujemy so za měrliwe zhromadne žiwjenje wšelakich kulturow a rěčow.“
NATO hotuje so na Trumpa
Praha (dpa/SN). Wonkowni ministrojo 32 čłonskich statow NATO chcedźa dźensa a jutře na swojim informelnym zetkanju w Praze přichodne wjerškowe zetkanje zakitowanskeje aliancy přihotować. Na wjeršku w juliju we Washingtonje chcedźa mjez druhim wobzamknyć, nadawki na dobro Ukrainy, kotrež su USA spjelnili, druhim krajam přepodać. Pozadk je móžnosć, zo so Donald Trump klětu jako nowy prezident USA do Běłeho domu nawróći. Tón je hižo připowědźił, zo chcył podpěru Ukrainy znowa rjadować.
FDP žada sej polěpšenja
Berlin (dpa/SN). Po wobzamknjenju zwjazkoweho knježerstwa nastupajo nowy rentowy paket maja politikarjo FDP dalše debaty wo financowanju za trěbne. „Zo móža so naše wnučki hišće na stabilny rentowy system spušćeć, dyrbimy rólu generaciskeho kapitala zesylnić“, rjekny městopředsyda frakcije FDP w zwjazkowym sejmje nowinarjam. Tež předsydka Młodych liberalnych, Franziska Brandmann, žada sej polěpšenja.
Israel w pomjeznym pasmje
