Berlin (dpa/SN). Šef krajneje skupiny CSU Alexander Dobrindt je amplowej koaliciji wumjetował, zo Němsku w Europje izoluje. Zwjazkowy kancler Olaf Scholz (SPD) bě so z francoskim prezidentom Emmanuelom Macronom zwadźił. Poćahi su so tuž pohubjeńšili. „Koalicija njetwari ­mosty, ale je spotorhuje“, Dobrindt wčera w zwjazkowym sejmje po knježerstwowym wozjewjenju Scholza wuzběhny. ­Politikar CSU je z dźěłom amploweje koalicije přewšo njespokojom.

Trjebaja nuznje medikamenty

Berlin (dpa/SN). Tuchwilu njeje na wikach dosć medikamentow za dźěći na přikład přećiwo zymicy. Powołanski zwjazk dźěćacych a młodźinskich lěkarjow chce tuž, zo zwjazkowe knježerstwo spěšnje jedna. „Trjebamy nětko podpěru ze stron politikarjow, kotřiž měli medikamenty wobstarać“, podšmórny dźensa prezident zwjazka Thomas Fisch­bach. Wot zwjazkoweho strowotniskeho ministra Karla Lauterbacha (SPD) předstajene plany za změnu zakonja předołho traja. „Tuchwilu je ekstremnje wjele dźěći chorych a trjebaja nuznje jednore medikamenty, pře zymicu.“

W krizy chcedźa pomhać

W Jerusalemje bydlacy wupućowarjo ze Šwedskeje su zawčerawšim swjatu Luciju swjećili. „Swjata Lucija“ z wěncom na hłowje procesion nawjedowaše. Po legendźe je Lucija přesćěhanym wěriwym jědź nosyła. Zo móhła za to wobě ruce wužiwać, je sej wěnc ze swěčkami na hłowu stajiła. Foto: pa/EPA/Atef Safadi

Choćebuz (dpa/SN). Carla Thiemowy klinikum nachwilnje hižo žane planowane operacije a lěkowanja njepřewjeduje. Přičina je, zo su mnozy sobudźěłaćerjo chori. To zdźěli wčera rěčnica chorownje Anja Kabisch. Wšitke operacije, kotrež njejsu na kóždy pad trěbne, so přesunu. Hdy so situacija změni, njeje jasne. Lěkarska direktorka klinikuma Cornelia Schmidt, pohódnoći situaciju jako přewšo napjatu. „We wšěch wobłukach personal pobrachuje, w lěkarskim a hladanskim wobłuku, ale tež w transporće a serwisu.“

Ćežišćo je nětko nuzowe zastaranje. Onkologiska stacija, hdźež lěkuja na rak schorjenych ludźi, kaž tež porodna stacija normalnje dźěłatej.

Lěkarska direktorka skedźbni w tym zwisku na wosebite rjadowanje za wopytowarjow. Nětko smě pacient jónu wob dźeń wopyt měć. Wězo dyrbja wopytowarjo FFP2-nahubnik wužiwać a maja negatiwny test předpołožić.

Je prawje, zo chce zwjazkowa nutřkowna ministerka Nancy Faeser brónjowe prawo přiwótřić. Stajnje zaso wšak w powěsćach wo nadpadach z brónjemi tež w Němskej zhonimy. Prawdźepodobnje je wjele móžnosćow sej bróń wobstarać. Strašna je situacija, jelizo so krizy wujewjeja. Wjele ludźi je potom njespokojne a chce tole tež někak zwuraznić. Za někotrych je namóc móžnosć, na njespokojnosć pokazać. Kaž ze statistiki towaršnosće za kriminalistiku, prawo a justicu wuchadźa, registrowachu zarjady w Němskej nimale 8 000 njeskutkow w zwisku z brónjemi. Tole je mjenje hač minjene lěta, ale wězo přewjele. Bróń wobsedźeć dyrbi wuwzaće wostać. Čim krućišo so to kontroluje, ćim lěpje! W USA je dawno z wašnjom, zo so wosoby z brónju do šulow, běrowow, kina abo uniwer­sity zadobywaja a ze swojeje hidy ludźi ­zatřěleja. Tajke situacije w Němskej do­žiwić nochcemy, a tuž měła wěstota ­wobydlerjow za politikarjow na prěnim městnje stać. Bianka Šeferowa