Luxemburg (dpa/SN). Europska unija budźe po podaćach zwjazkoweje wonkowneje ministerki Annaleny Baerbock sankcije přećiwo iranskej policiji pócćiwosće wuprajić. Zaměr je, zamołwitych za brutalne złóstnistwa na žonach, młodostnych a mužach pochłostać, rjekny politikarka Zelenych na kromje zetkanja wonkownych ministrow krajow EU dźensa w Luxemburgu.

Regiony w Ukrainje wobtřělała

Kijew/Moskwa (dpa/SN). Ruska je dźensa, póndźelu, nimo ukrainskeje stolicy Kijewa po informacijach městnych zarjadow tež tamne regiony w Ukrainje wobtřělała. Rozprawy wo rozbuchnjenjach běchu z kónčin Sumy, Dnipropetrowsk a Odesa. Krjemlej bliscy wojerscy bloggerojo rozprawjachu wo wobtřělenju wosebje energijoweje infrastruktury kraja. Tajke ataki bě ruski prezident Wladimir Putin připowědźił. W socialnych syćach su wideja rozšěrjeli, na kotrychž běchu kurowe mróčele nad stolicu Kijewom ­widźeć.

Wočerstwjenje hospodarstwa

Bonn (dpa/SN). Zwjazkowy zjězd Zelenych je so wčera z horcej debatu zakónčił. Jeno ze snadnej wjetšinu su delegaća iniciatiwu přećiwo dojednanju kónca wudobywanja brunicy w Sewjerorynsko-Westfalskej w lěće 2030 dla wotpokazali. Politiske dojednanje wot Zelenych nawjedowaneju hospodarskeju ministerstwow w Zwjazku a kraju z energijowym koncernom RWE mjez druhim předwidźi, brunicowej milinarni hač do 2024 dlěje běžeć dać, kónc wudobywanja brunicy w Porynskim rewěrje pak wo wosom lět na 2030 doprědka ćahnyć. 325 delegatow hłosowaše přećiwo namjetej Zeleneje młodźiny, 295 jón podpěraše.

Sobotu su so delegaća z přemóžacej wjetšinu za to wuprajili, Ukrainje dalše brónje dodawać. Wjacore namjety, kotrež mjenowachu tole wotwobroćenje wot pacifistiskich tradicijow, zwrěšćichu.

Pragmatisce postupować, so wobstejnosćam tež krótkodobnje přiměrjeć, do kisałeho jabłuka kusnyć (dyrbjeć) – tak a po-dobnje so knježace strony rady a často wusprawnjeja, njejsu-li (zaso raz) kmane, wólbne přilubjenja spjelnić. Potom rěča wo „realnej politice“, štož na přikład wo­znamjenja, zo hodźa so křesćanske hódnoty pola CDU lědma hižo spóznawać, zo socialne aspekty za SPD skerje podrjadowanu rólu hraja abo zo FDP liberalizm chětro ekskluziwnje wukładuje. Za Zelenych w zamołwitej poziciji na zwjazkowej runinje je knježić wospjet z dosć twjerdym worjechom. Pacifizma so tele dny runje tak wzdawaja kaž něhdy konsensoweho ćežišća wotstronjenja jadroweje energije. Tajkele kompromisy wšak dźěło w kóždej koaliciji charakterizuja. Přiwšěm hrozy strach, zo tež na dalšu a drje najwažnišu temu zabudu. Je na času, zo nastupajo klimowu katastrofu rjap pokazaja a zo njewostawaja w tym zwisku wot kachlicy pječeni. Bosćan Nawka

Berlin (dpa/SN). Wjace hač 71 procentow fachowych mocow we wuchodnej Němskej zasłuža mjenje hač zapadoněmske fachowe mocy w přerězku. Cyłkownje potrjechi to 1,59 milionow fachowcow w nowych zwjazkowych krajach. Tole wuchadźa z wotmołwy zwjazkoweho knježerstwa na naprašowanje zapósłanca AfD Renéja Springera. Wjace hač tře­ćina fachowych mocow we wuchodźe (38 procentow) zasłuža nimo toho mjenje hač pomocnicy w zapadnej Němskej. Pomocne dźěła su jednore dźěła, kotrež nježadaja sej formalne powołanske wotzamknjenje. Ličby złožuja so na infor­macije Zwjazkoweje agentury za dźěło. Springer widźi w tym hłownu přičinu „njespokojnosće z etablěrowanymi stronami na wuchodźe“.