Berlin (dpa/SN). Społnomócnjeny zwjazkoweho knježerstwa přećiwo anticigani­zmej je hłuboko sahacu diskriminaciju Sintow a Romow w Němskej šwikał. „Mamy rasistiske rozeznawanje we wobłukach policija a justica, kubłanje, bydlenske wiki a socialne zarjadnistwo“, rjekny społnomócnjeny Mehmet Daimagüler powěsćerni dpa. Tež ludomordarstwo nacionalsocialistow dotal předźěłane njeje. Tuž planuje wón klětu wutworić komisiju za wěrnosć a wujednanje.

Připowědźena komisija za wěrnosć ma z wida społnomócnjeneho mytos wurumować, zo běše wuchadźišćo NS-přesćěhowanja Sintow a Romow pozdatny bój přećiwo kriminaliće. Přičina běše rasizm. „Za mnje njeje nastupajo zamordowanje Židow a Sintow a Romow žanoho strukturelneho rozdźěla w nadměru nacionalistiskim błudźe, w zymnokrejnosći a w industrijnym zwoprawdźenju ludomordarstwa“, rjekny Daimagüler.

Wón je so wuprajił do dźensnišeho swjedźenskeho akta k dźesaćlětnemu wobstaću pomnika za w nacionalsocializmje zamordowanych Sintow a Romow Europy w Berlinje.

Yangon (dpa/SN). Wójsko w Myanmarje je při powětrowym nadpadźe na koncert w staće Kachin na sewjeru kraja znajmjeńša 60 ludźi moriło. To swědkojo dźensa wobkrućichu. Z koncertom w Hpakant Town­shipje chcychu wobdźělnicy 62. róčnicu załoženja organizacije njewotwisnosće Kachin Independence Organization (KIO) swjećić, kotraž so za prawa myanmarskeje ludoweje skupiny Kachin zasadźuje.

Kretschmer za płun z Ruskeje

Berlin (dpa/SN). Sakski ministerski prezident Michael Kretschmer (CDU) je so za znowazahajenje ruskich dodawanjow płuna po wójnje wuprajił. „Trjebamy dołhodobne zrěčenja za dodawanje běžiteho płuna z USA, Katara a druhich arabskich krajow. Nimo toho dyrbimy skónčnje zemski płun w Sewjernym morju wotkryć. A hdyž budźe wójna nimo, měli tež zaso płun z Ruskeje importować“, jeho wčera nowina Bild am Sonntag citowaše. Podobnje kaž Kretschmer wupraji so tež předsyda frakcije Lěwicy w zwjazkowym sejmje Dietmar Bartsch.

Nowy ukrainski pósłanc

Drježdźany (dpa/SN). Kónc spěchowanja za spěšny internet wubudźi w Sakskej kritiku a přesłapjenje. Zwjazk běše Gigabit-spěchowanje falowacych pjenjez dla lětsa dočasnje zastajił. Po zwjazkowym wobchadnym ministrje Volkeru Wissingu (FDP) je přewostajena spěchowanska suma třoch miliardow eurow wučerpana. Sakska hospodarska statna ministerka Ines Fröhlich je Zwjazk namołwiła, wšitke komuny, kotrež su próstwu zapodali, financielnje podpěrać, tež hdyž je to hakle w lěće 2023 móžne.

Po Fröhlich dyrbjał Zwjazk nimo toho spěšnje ramikowe wuměnjenja za nowy spěchowanski program předpołožić, zo by so wokrjesam a komunam wěstota planowanja zmóžniła. Zaměr je, šěrokopasmowy wutwar ze škleńčanej nitku tež jako zakład za solidne zastaranje z 5G pospěšić a hač do lěta 2030 zastaranje po cyłej přestrjeni zawěsćić. Zwjazk chce z Gigabit-strategiju digitalny přewrót docpěć. Homeoffice, streaming w ICE-ćahu abo přijimanje na hórskej hěće maja potom skónčnje móžne być.

Předrasćeni jako hotdog abo gladiator – Newyorkske psy a jich wobsedźerjo zetkachu so hižo zawčerawšim we wšelakich kreatiwnych halloweenskich kostimach. Na tak mjenowanym „Tompkins House Halloween Dog Festival“ wobdźělnicy kóždolětneho wubědźowanja swoje předrasćenske kumšty a kreatiwitu dopokazachu. Hišće hač do kónca oktobra móža ludźo wo najlěpšim kostimje wothłosować.

Pašowar bu při zapućowanju do Indiskeje z trjenjemi lepjeny, kotrež bě wón do toho do złota tunknył. Cłowny zarjad w zwjazkowym staće Kerala jeho wučušli, jako mokre rubiška pola potrjecheneho nańdźe, kiž bě z Dubaja do kraja přilećał, kaž nowina w Indiskej minjeny pjatk zdźěli. Kaž zarjady rozprawja, su pašowarjo w Indiskej přeco hibićiwiši a kreatiwniši. Pola lepjeneho muža su cłownicy cyłkownje pjeć „złotych“ trjenjow našli.