Kamjenej (UM/SN). W kaolinowni w Kamjenej na sewjeru Budyskeho wokrjesa njejsu na wažny termin w stawiznach zawoda zabyli: 25. měrca 1981 mějachu tam wulki statny wopyt. Willi Stoph, te­hdyši předsyda ministerskeje rady NDR, bě z wulkej delegaciju do zawoda přijěł, zo by zwoprawdźenje noweho „inwesti­ciskeho objekta“ sobu dožiwił, nimale dospołnje ponowjenu připrawu za transport a rjedźenje kaolina w zawodźe pola Rakec. Samo nowina Neues Deutschland bě na prěnjej stronje wo tym rozprawjała. „Tehdy knježeše tu nalada rozmacha“, rozłoži Mathias Haase. Wón dyrbi to wědźeć, wšako je wot lěta 1980 hač do 2024 w zawodźe dźěłał.

Nowa Wjeska (SN/MiP). We wjesnym towarstwowym domje w Nowej Wjesce su so srjedu Worklečanscy gmejnscy radźićeljo zešli. Hłowny dypk na posedźenju běše diskusija a wothłosowanje wo přepodaću wjacorych twarskich nadawkow w zwisku z přetwarom Worklečanskeje Serbskeje wyšeje šule „Michał Hórnik“. Nadawk za wohnjoškit a za zatwar lifta we wobjimje 176 000 eurow su radźićeljo Łazowskej firmje Swanenberg přepodali. Nadawk za instalowanje elektroniki z cyłkownym wobjimom 418 000 eurow dóstanje firma Gerold Zieschang z Němcow a nadawk za zatwar tepjenskeje, sanitarneje a přewětrjenskeje techniki z wobjimom 518 000 eurow dadźa firmje HSKG z Kamjenca.

Nimo toho informowaše zastupjer energijoweho předewzaća Sachsen Energie přitomnych wo móžnosćach nadróžneho wobswětlenja w gmejnje. Po tym předstaji wjesnjanosta Clemens Poldrack (njestronjan) nowu internetnu stronu gmejny, kotruž je Nowosličan Tomaš Kutter zhotowił. Design noweje strony je přehladniši a atraktiwniši a wopytowar nadeńdźe tam nětko rubriku ze zjimanjemi wjesnjanosty wo najnowšich podawkach w gmejnje.

Z pokradnjenym dźěćacym kolesom chcyše muž w hornjej Frankskej dener zapłaćić. Njeznaty bě wobsedźerjej wobchoda w Marktredwitzu rjekł, zo drje pjenjezy nima, zo pak by jemu za dener koleso přewostajił. Předawarjej bě to podhladne, zazwoni policiju. Prjed hač zastojnicy dojědźechu, bě so njeznaty zminył. Policisća pak zwěsćichu, zo bě paduch sto eurow drohe koleso w měsće pokradnył. Policija pyta nětko za swědkami.

Šefowka drogoweho wotrjada policije w francoskim Marseillu je podhladna, zo njeje swoje winowatosće spjelniła, jako so 400 kilogramow kokaina ze składa policije zhubi. Tež přećiwo jeje zastupjerjej nětko přepytuja. Dalšeju policistow, kotrajž staj přećiwo drogowym cwólbam slědźiłoj, su zajeli. Njeje wuzamknjene, zo su wobdźěleni kriminelnym pomhali, kokain ze składa pokradnyć.

Zapósłancy Serbskeho sejma su sobotu tydźenja w Choćebuzu wuradźowali

Po konstituowanju 2. Serbskeho sejma 12. apryla we Łazu su so zapósłancy w nowej konstelaciji prěni raz njedawno w Choćebuskim Měšćanskim domje zetkali. Nawoda posedźenja Tomaš Wornar wšitkich přitomnych postrowi, wosebje witajo zamołwitu za naležnosće Serbow Choćebuza Annu Kosacojc-Kozelowu, kotraž wyšeho měšćanostu Choćebuza Tobiasa Schicka zastupowaše. Tobias Schick wšak bě hosćićel posedźenja. Nažel so wobdźělić njemóžeše, město toho spo­srědkowa sejmikarjam list, kiž bu na spočatku předčitany. W nim wobkrući, zo je Choćebuz jako najwjetša komuna w serbskim sydlenskim rumje w Braniborskej spušćomna partnerka Serbskeho sejma a zo chce zapósłancow podpěrać. To zdobom Anna Kosacojc-Kozelowa w swojich postrownych słowach podšmórny a na to skedźbni, zo bě wyši měšćanosta kaž hižo za wólby Serbskeje rady tež za wólby 2. Serbskeho sejma wabił.

Tomaš Wornar so w mjenje sejma za podpěru ze stron města podźakowa. Wón zwěsći, zo su z 15 přitomnymi zapósłancami wobzamknjenjakmani.